ខេត្តកំពង់ឆ្នាំង ៖ សមត្ថកិច្ចបានឃាត់ខ្លួនជនជាតិវៀតណាម៣នាក់ ពាក់ព័ន្ធករណីប្រើស្នរចាក់បុរសជនជាតិខ្មែរម្នាក់ ដែលជាអ្នកនេសាទ ធ្វើឲ្យរងរបួសធ្ងន់ ក្នុងស្ថានភាពខឹងចិត្ត ព្រោះបើកកាណូតជាប់នឹងមងបណ្ដែតរបស់ពួកគេ។
ហេតុការណ៍នេះកើតឡើងនៅម៉ោង ៦និង៣០នាទីព្រឹក ថ្ងៃទី២៣ ខែឧសភា ឆ្នាំ២០២៥ ក្នុងបឹងទន្លេសាប តំបន់បាឡត ដែលស្ថិតនៅតំបន់ប្រមូលប្រទល់រវាងឃុំកំពង់លួង ខេត្តពោធិ៍សាត់, ឃុំពាមបាង ខេត្តកំពង់ធំ និងឃុំផាត់សណ្ដាយ ខេត្តកំពង់ធំ។
សមត្ថកិច្ចនគរបាលប៉ុស្តិ៍រដ្ឋបាលឆ្នុកទ្រូ ស្រុកបរិបូណ៌ សហការជាមួយប៉ុស្តិ៍នគរបាលឃុំពាមបាង និងកងកម្លាំងយោធា បានឃាត់ខ្លួនជនសង្ស័យទាំង ៣ នាក់ភ្លាមៗបន្ទាប់ពីកើតហេតុ។ ព័ត៌មានបឋមឱ្យដឹងថា ជនរងគ្រោះឈ្មោះ ដួង ខា អាយុ ៤៣ ឆ្នាំ រស់នៅភូមិកំពង់ព្រះ ឃុំឆ្នុកទ្រូ ស្រុកបរិបូណ៌ ខេត្តកំពង់ឆ្នាំង បានបើកកាណូតទៅនេសាទ ដោយចៃដន្យកាណូតបានជាប់នឹងមងបណ្ដែតរបស់ជនជាតិវៀតណាម។
បន្ទាប់ពីមានការឈ្លោះគ្នា ពួកជនសង្ស័យបានយកស្នរចាក់បុរសជនរងគ្រោះ រហូតធ្វើឲ្យរងរបួសធ្ងន់ពោះ និងគេចខ្លួន។ កម្លាំងសមត្ថកិច្ចនៅក្បែរប្រមូលពលករក្នុងតំបន់នេសាទបានប្រតិបត្តិការបន្តបន្ទាប់ ដេញតាមនិងឃាត់ខ្លួនជនសង្ស័យទាំង ៣ នាក់បានដោយជោគជ័យ។
បុរសជនរងគ្រោះត្រូវបានយកទៅសង្គ្រោះបឋមដោយរថយន្តសង្គ្រោះរបស់មន្ទីរពេទ្យស្រុកបរិបូណ៌ ហើយបញ្ជូនបន្តទៅមន្ទីរពេទ្យនៅរាជធានីភ្នំពេញ ដើម្បីព្យាបាលបន្ថែម។
ជនសង្ស័យទាំង ៣ រូប ដែលត្រូវបានសមត្ថកិច្ចឃាត់ខ្លួនមាន៖
១. ង្វៀង វ៉ាន់លឹក ភេទប្រុស អាយុ ១៩ ឆ្នាំ
២. ង្វៀង វ៉ាន់លត ភេទប្រុស អាយុ ២១ ឆ្នាំ
៣. ចាំង វ៉ាន់នឺ ភេទប្រុស អាយុ ៤១ ឆ្នាំ
ពួកគេរស់នៅភូមិឆ្នុកទ្រូ ឃុំឆ្នុកទ្រូ ស្រុកបរិបូណ៌ ខេត្តកំពង់ឆ្នាំង។ វត្ថុតាងជាស្នរមួយដើមត្រូវបានសមត្ថកិច្ចយកមកជាភស្តុតាងក្នុងសំណុំរឿង។
សមត្ថកិច្ចកំពុងសុំយោបល់ពីថ្នាក់លើស្ដីពីអាជ្ញាធរដែលមានសមត្ថភាពដោះស្រាយសំណុំរឿងនេះ ដោយសារតំបន់កើតហេតុស្ថិតនៅតំបន់ព្រំប្រទល់រវាងខេត្ត៣គឺ ពោធិ៍សាត់ កំពង់ធំ និងកំពង់ឆ្នាំង៕
