ខេត្តកំពង់ឆ្នាំង ៖ កម្លាំងសមត្ថកិច្ចចម្រុះខេត្តកំពង់ឆ្នាំង បានចុះបង្ក្រាបទីតាំងមួយ ដែលលួចបើកអាជីវកម្មកម្ចីអនឡាញខុសច្បាប់ នៅក្នុងភូមិទួលក្រឡាញ់ សង្កាត់កំពង់ឆ្នាំង ក្រុងកំពង់ឆ្នាំង និងបានឃាត់ខ្លួនមនុស្សសរុបចំនួន ២៤ នាក់ រួមមានជនជាតិវៀតណាម ២១ នាក់ ជនជាតិចិន ២ នាក់ និងជនជាតិខ្មែរ ១ នាក់ សម្រាប់សាកសួរពាក់ព័ន្ធនឹងសកម្មភាពខុសច្បាប់នេះ។
ការចុះបង្ក្រាបនេះកើតឡើងនៅម៉ោងប្រហែល ១២និង២៥នាទី ថ្ងៃទី ២៣ ខែឧសភា ឆ្នាំ ២០២៥ នៅផ្ទះជួលមួយកន្លែង ដែលត្រូវបានគេប្រើប្រាស់ជាទីតាំងដឹកនាំសកម្មភាពកម្ចីអនឡាញ។ សមត្ថកិច្ចបានទទួលព័ត៌មានពីម្ចាស់ផ្ទះថា ភ្ញៀវជួលបានធ្វើកិច្ចសន្យាជួលក្នុងតម្លៃ ៧៥០ ដុល្លារក្នុងមួយខែ កាលពីថ្ងៃទី ១៩ ខែកុម្ភៈ ឆ្នាំ ២០២៥ ហើយបានឲ្យដឹងថា មករស់នៅសម្រាប់ប្រកបអាជីពស្របច្បាប់។
យ៉ាងណាមិញ ដោយសារមានសកម្មភាពចេញចូលច្រើន បិទទ្វារជាប់ និងសម្លេងអ៊ូអរ ធ្វើឲ្យប្រជាពលរដ្ឋមានការសង្ស័យ និងរាយការណ៍ទៅកាន់សមត្ថកិច្ច។ ក្រោយការចុះពិនិត្យ សមត្ថកិច្ចបានរកឃើញថា ទីតាំងនេះត្រូវបានប្រើសម្រាប់អាជីវកម្មកម្ចីអនឡាញ ដែលទារប្រាក់ពីប្រជាជនវៀតណាមជាចម្បង ជាមួយនឹងអាជ្ញាបណ្ណដែលអស់សុពលភាព។
បច្ចុប្បន្ន សមត្ថកិច្ចបានផ្អាកសកម្មភាពនៅទីតាំងនោះជាបណ្តោះអាសន្ន និងដកហូតវត្ថុតាងផ្សេងៗ រួមមានទូរស័ព្ទច្រើនគ្រឿង និងកុំព្យូទ័រ ៣ គ្រឿង សម្រាប់បន្តនិតិវិធីតាមផ្លូវច្បាប់៕
