ប្រតិកម្មរបស់បារាំងថា ការជ្រៀតជ្រែករបស់រុស្ស៊ី ក៏មិនអាចជួយស្រោចស្រង់ ប្រធានាធិបតីស៊ីរីដែរ

ប្រធានាធិបតីបារំាងបានបញ្ចាក់ថា ការជ្រៀតជ្រែកដោយកម្លាំងយោធារបស់រុស្ស៊ី នៅក្នុងទឹកដីស៊ីរី អាចជួយដល់កម្លាំងទាហានស៊ីរី យកឈ្នះក្រុមអិស្លាមបង្កើតរដ្ឋ តែមិនអាច ជួយស្រោចស្រង់ប្រធានាធិបតីអាលអាសាដនោះដែរ។ មានប្រសាសន៍ក្រោយកិច្ចប្រជុំសហគមន៍អឺរ៉ុប កាលពីថ្ងៃទី១ ៥ខែតុលា ប្រធានាធិបតីបារាំង លោកហ្វ្រាំងស័រហូឡែនបញ្ចាក់ថា ការជ្រៀតជ្រែករបស់រុស្ស៊ី នៅក្នុងប្រទេសស៊ីរី នឹងមិនអាចជួយ ដល់រដ្ឋាភិបាលរបស់ប្រធានាធិបតីអាលអាសាដនោះឡើយ។

មកទល់ពេលនេះអាមេរិក រុស្ស៊ី អង់គ្លេស បារាំង អីរ៉ង អារ៉ាបកាតា និងទួគី បានជ្រៀតជ្រែកចូលរួមនៅក្នុងសង្គ្រាមនៅប្រទេសស៊ីរី ។ ប៉ុន្តែគោលដៅចូលរួមផ្សេងគ្នា ការវាយប្រហារក៏ខុសគ្នាដែរ។ កន្លងមកបារាំងក៏បានសម្រេច ដើរតួនាទីសំខាន់នៅក្នុងការបង្កើនសម្ព័ន្ធមិត្តវាយប្រហារ ទៅលើក្រុមអិស្លាមបង្កើតរដ្ឋ។

ពាក់ព័ន្ធទៅនឹងការប្រតិកម្មរបស់សហគមន៍អឺរ៉ុប ក្រោយពេលរុស្ស៊ីចាប់ផ្តើមវាយប្រហារតាមដែនអាកាស ទៅលើក្រុមអិស្លាមបង្កើតរដ្ឋ ជួយដល់រដ្ឋាភិបាលរបស់ប្រធានាធិបតីអាលអាសាដ ដំណាងសហគមន៍អឺរ៉ុបមិនបានពិភាក្សាបន្ថែមក្នុងការដាក់ទណ្ឌកម្មទៅលើរុស្ស៊ីទៀតឡើយ។ប៉ុន្តែអឺរ៉ុបអាចនឹងអនុម័តដាក់ទណ្ឌកម្មបន្ថែមទៅលើប្រទេសរុស្ស៊ីប្រសិនបើការវាយប្រហារមិនសម្តៅទៅលើក្រុមភេរវកម្មទេនោះ។ អឺរ៉ុបក៏ដូចជាអាមេរិកកំពុងតែតាមដានយ៉ាងយកចិត្តទុកដាក់ រាល់សកម្មភាពយោធារបស់រុស្ស៊ី ខ្លាចរុស្ស៊ីមិនវាយប្រហារទៅលើក្រុមអិស្លាមបង្កើតរដ្ឋ ដោយវាយប្រហារទៅលើកម្លាំងក្រុមប្រឆាំងរដ្ឋាភិបាល ដែលអាមេរិកគាំទ្រនោះវិញ។

ការព្រួយបារម្ភពីការប៉ះទង្គិចគ្នា រវាងអាមេរិកនិងរុស្ស៊ីនៅក្នុងប្រទេសស៊ីរី កាន់តែខ្លាំងឡើងក្រោយពេលយន្តហោះចម្បាំងប្រទេសទាំងពីរ បានហោះហើរកៀកគ្នានៅក្នុងដែនអាកាសតែមួយ។ រដ្ឋមន្ត្រីការពារជាតិអាមេរិក លោក Ash Carter បានថ្លែងថា លោកមានក្តីសង្ឃឹមថា នឹងអាចរកដំណោះស្រាយចំពោះបញ្ហានេះនាពេលឆាប់ៗ ។ភាគីរុស្ស៊ីក៏បានអះអាងដែរថា ខ្លួននឹងបញ្ជូនមនុស្សថ្មីដើម្បីឲ្យធ្វើកិច្ចការនេះ ។ទោះបីយ៉ាងណាក៏ដោយ មានការលើកឡើងថា បើទោះបីមានការពិភាក្សារវាងអាមេរិក នឹងរុស្ស៊ីយ៉ាងណាក្តី ប្រតិបត្តិការយោធារបស់ប្រទេសទាំងពីរនៅលើដែនអាកាសស៊ីរី សុទ្ធតែរឿងមិនត្រឹមត្រូវទាំងអស់ ។

ប្រទេសលោកខាងលិចនិងក្រុមសកម្មជនក្នុងប្រទេសស៊ីរី បាននិយាយថាយន្តហោះចម្បាំងរុស្ស៊ី បានបាញ់ប្រហារទៅលើគោលដៅ ដែលពុំមានក្រុមឧទ្ទាម គឺធ្លាក់ទៅលើគោលដៅជនស៊ីវិលរស់នៅ និងធ្លាក់ទៅលើក្រុមប្រឆាំងរដ្ឋាភិបាលស៊ីរី ។ក្រុមប្រឆាំងរដ្ឋាភិបាលស៊ីរីបាននាំគ្នាធ្វើបាតុកម្ម នៅមុខស្ថានទូតរុស្ស៊ីប្រចាំនៅទីក្រុងដាម៉ាស ប្រឆាំងចំពោះប្រតិបត្តិការតាមដែនអាកាសរបស់កម្លាំងទាហានរុស្ស៊ី៕