ខេត្តកោះកុង៖តាមប្រភពមួយបានឲ្យដឹងថា ម្ចាស់រថយន្តដឹកម៉ូតូស៊េរីទំនើបៗបានគំរាម អ្នកសារព័មានច្រើនអង្គភាព គ្រាដែលអ្នកសារព័ត៌មាន ទាំងនោះ ព្យាយាមតាមផ្តិតយករូបភាព រថយន្តដែលពួកគេសង្ស័យថា ជារថយន្តដឹកម៉ូតូស៊េរីទំនើបៗ គេចពន្ធ របស់ក្រុមហ៊ុនមួយ នាពេលថ្មីនេះ ដោយមានការបើកភ្លើងខៀវ ពីមន្ត្រីគយ នេះបើតាមសេចក្តីរាយការណ៏ របស់អ្នកសារព័តមានប្រចាំខេត្តកោះកុង។
ប្រភពព័ត៌មានរាយការណ៍ថា មន្ត្រីគយប្រចាំខេត្តកោះកុង ជាពិសេសមន្ត្រីគយប្រចាំច្រកទ្វារអន្តរជាតិចាំយាម ទទួលរង ការរិះគន់ថា បានសំរបសំរួល ឲ្យក្រុមហ៊ុនលួចនាំម៉ូតូស៊េរីទំនើបៗអត់បង់ពន្ធចូលពីថៃ ហើយក្រុមមន្ត្រីគយឈរចាំរាប់ក្បាលម៉ូតូ យកលុយដាក់ហោប៉ៅ គ្រាដែលសកម្មភាពល្មើសច្បាប់ ត្រូវបានគេដឹងថា កើតមានយូរឆ្នាំមកហើយ ដែលបណ្តាលឲ្យរដ្ឋបាត់បង់ចំណូលពន្ធយ៉ាងច្រើន ។
តាមការអះអាង ពីក្រុមអ្នកសារព័ត៌មានប្រចាំការនៅខេត្តកោះកុង បានឲ្យដឹងថា បន្ទាប់ពីទទួលបានព័ត៌មាន មានការរត់ពន្ធម៉ូតូដ៏សម្បើមដៃនោះ ពួកគាត់បានព្យាយាម តាមយកព័តមាន គ្រប់សកម្មភាពរបស់ក្រុមឈ្មួញ ដែលសង្ស័យថា បានឃុបឃិតជាមួយមន្ត្រីគយ លួចនាំចូលម៉ូតូស៊េរីទំនើបៗ ចូលដោយមិនបានបង់ពន្ធ ដោយគ្រាន់តែបង់លុយ ឲ្យលោកគយប្រចាំច្រកចាំយាម និងមន្ត្រីគយប្រចាំខេត្តកោះកុង រួមទាំងគយចល័តជាការស្រេច ។
កាលពីពេលកន្លងថ្មីនេះ ក្រុមអ្នកសារព័ត៌មានបាន ឃើញរថយន្តចំនួន២គ្រឿងដឹកម៉ូតូស៊េរីទំនើបៗ ចតនៅតាមផ្លូវ ហើយពួកគេក៏ព្យាយាមថតយករូបភាព រថយន្តដឹកម៉ូតូខាងលើនេះ ប៉ុន្តែម្ចាស់រថយន្តដឹកម៉ូតូ បានចេញមុខមកជេរប្រមាថដល់អាយុជីវិត អ្នកសារព័ត៌មានយើងយ៉ាងអសុរស ហើយអ្វីជាការកត់សម្គាល់ ម្ចាស់រថយន្តបានប្រើពាក្យគំរាម ប្រមាថជីវិតថែមទៀតផង។
តាមការឲ្យដឹងរបស់ អ្នកសារព័ត៌មានប្រចាំខេត្តកោះកុងគឺ រថយន្តទាំងពីរគ្រឿងនោះ សង្ស័យបានដឹកម៉ូតូនាំចូលគេចពន្ធ ព្រោះថាបើឈ្មួញរកស៊ីស្របច្បាប់ គេមិនខ្លាចត្រឹមបើអ្នកកាសែតថតរូបនោះទេ ។
បណ្តាញសារព័ត៌មានប្រចាំខេត្តមួយនេះ បានបញ្ជាក់ថា ក្រុមឈ្មួញបាននិងកំពុងរកស៊ីនាំចូល ម៉ូតូស៊េរីទំនើបៗ គេចពន្ធយ៉ាងគគ្រឹគគគ្រេង ដោយចូលតាមច្រកសមុទ្រ និងច្រកទ្វារអន្តរជាតិចាំយាម ដែលកើតមានរាប់ឆ្នាំមកហើយ មិនដែលមានសមត្ថកិច្ចជំនាញណា បង្ក្រាបបាននោះឡើយ ។
ក្រុមអ្នកសារព័ត៌មានបន្តថា កាលដែលមានផ្ទុះរឿងអាស្រូវ រហូតមានការប្រមាថដល់អាយុជីវិតអ្នកសាព័ត៌មាននោះ ព្រោះតែប៉ុន្មានថ្ងៃនេះ ក្រុមឈ្មួញបានសម្រុកដឹកម៉ូតូចូលពីទឹកដឹថៃ យ៉ាង គគ្រឹគគគ្រេងខុសពីធម្មតា ហើយភាគច្រើនជាម៉ូតូស៊េរីទំនើប នាំចូលគេចពន្ធទាំងស្រុង ឬមានបង់ពន្ធតិចតួចប៉ុណ្ណោះ ដោយទទួលបានព័ត៌មាននោះហើយ ទើបអ្នកសារព័ត៌មានយើង តាមប្រមាញ់យកព័តមាន ។
ការបណ្តែតបណ្តោយ ឲ្យក្រុមឈ្មួញរកស៊ីនាំចូលទំនិញគេចពន្ធខាងលើនេះ គឺជាអំពើពុករលួយទុច្ចរិត ដែលច្បាប់មិនអាចលើកលែងឲ្យបានឡើយ ។
តាមព័ត៌មានទទួលបាន គឺមន្ត្រីគយប្រចាំខេត្តកោះកុងរងការរិះគន់ថា បានទទួលលាភសក្ការៈមិនត្រឹមតែម៉ូតូគេចពន្ធប៉ុណ្ណោះទេ ប៉ុន្តែមានមុខទំនិញគេចពន្ធជាច្រើនទៀតដូចជា ប្រេងឥន្ធនៈ ទំនិញចាប់ហួយ…។ល។ ក៏បាននិងកំពុងនាំចូលគេចពន្ធ យ៉ាងអាណាធិបតេយ្យជាយូរមកហើយដែរ ។
មតិសាធារណៈសុំឲ្យលោក គុណ ញឹម មេគយធំជួយដុំក្អែល លោកគយខេត្តកោះកុងផង ព្រោះករណីមិនប្រក្រតីខាងលើ ធ្វើឲ្យបាត់បង់ចំណូលពន្ធចូលរដ្ឋច្រើនណាស់។
គេពុំអាចសុំការបំភ្លឺពីគយខេត្តកោះកុងបានឡើយ៕
