ខេត្តបាត់ដំបង ៖ បើតាមអគ្គនាយករដ្ឋាករទឹកខេត្តបាត់ដំបងឱ្យដឹងថាគម្រោងរោងចក្រផលិតទឹកស្អាតធំទី៣មួយកន្លែងទៀតក្រុមការងារកំពុងពន្លឿនការសាងសង់ឱ្យរួចតាមផែនការកំណត់ ដើម្បីឆ្លើយតបនឹងសេចក្តីត្រូវការទឹកស្អាតប្រើប្រាស់របស់ប្រជាពលរដ្ឋដែលមានការកើនឡើង។ ឯកឧត្តម អ៊ុត ក្លឹង អគ្គនាយករដ្ឋាករទឹកខេត្តបាត់ដំបងបានឱ្យដឹងថា បច្ចុប្បន្ននេះការសាងសង់រោងចក្រផលិតទឹកស្អាតខ្នាតធំទីបី និងសមិទ្ធផលមួយចំនួនទៀតក្នុងក្រុងបាត់ដំបងអនុវត្តន៍បានជិត៦០ភាគរយហើយ ដែលគ្រោងបញ្ចប់នាពេលខ្លីខាងមុខ ធ្វើឱ្យរដ្ឋាករទឹកខេត្តបាត់ដំបងមានលទ្ធភាពពង្រីកការផលិតទឹកស្អាតជូនប្រជាពលរដ្ឋប្រើប្រាស់ក្នុងមួយថ្ងៃរហូតដល់ជាង៨ម៉ឺនម៉ែត្រគូប ។
ឯកឧត្តមបានបញ្ជាក់ខណៈដែលមន្រ្តីបច្ចេកទេសនៃអគ្គនាយកដ្ឋានទឹកស្អាតនៃក្រសួងឧស្សាហកម្ម និងក្រុមហ៊ុនចុះពិនិត្យវឌ្ឍនភាពការងារអនុវត្តន៍គម្រោងនាពេលថ្មីៗនេះថាក្រុមការងារកំពុងពន្លឿនការសាងសង់ស្ថានីយបូមទឹកឆៅធំ១កន្លែងទៀត និងរោងចក្រប្រព្រឹត្តកម្មទឹកស្អាតមានសមត្ថភាពផលិតទឹកស្អាត ៥ម៉ឺន ម៉ែត្រគូបក្នុង១ថ្ងៃ ដែលមានទីតាំងនៅភូមិកំពង់សីមា សង្កាត់វត្តគរ ក្រុងបាត់ដំបង និងការងារពង្រីកបំពង់មេទឹកស្អាតប្រវែង៩៤គីឡូម៉ែត្រ។ ឯកឧត្តមបន្ថែមថារោងចក្រផលិតទឹកស្អាតធំថ្មីមួយនេះ បូករួមនឹងរោងចក្រផលិតទឹកស្អាត ដែលបាននិងកំពុងដំណើរការបច្ចុប្បន្នចំនួន២ទីតាំង នឹងធ្វើឱ្យរដ្ឋាករទឹកបាត់ដំបង មានសមត្ថភាពផលិតទឹកស្អាត កើនដល់ទៅ៨ម៉ឺន៣ពាន់ ៥២០ម៉ែត្រគូប ក្នុង១ថ្ងៃ និងបំពង់បណ្តាញទឹកស្អាតមានប្រវែង សរុប ៩២២ គីឡូម៉ែត្រ។ ឯកឧត្តមបន្ថែមថា៖«នៅពេលសាងសង់រោងចក្រផលិតទឹកស្អាតធំថ្មីនេះរួចបន្ថែមទៀត ធ្វើឱ្យការផ្គត់ផ្គង់ទឹកស្អាត មានវិសាលភាពគ្របដណ្តប់យ៉ាងទូលំទូលាយ មិនត្រឹមតែអាចគ្របដណ្តប់ ក្នុងដែនសេវាកម្មអាជ្ញាប័ណ្ណរដ្ឋាករទឹកបាត់ដំបងផ្ទាល់នោះទេ គឺអាចមានលទ្ធភាពចែកចាយនៅតំបន់ខាងក្រៅផ្សេងៗទៀត ដែលស្ថិតនៅជុំវិញនោះផងដែរ » ។
ឯកឧត្តម ហ៊ុល ប៊ុណ្ណារិទ្ធ អនុរដ្ឋលេខាធិការក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍និងជានាយកគម្រោងលើកកម្ពស់ការផ្គត់ផ្គង់ទឹកស្អាត និងអនាម័យ ក៏បានជំរុញបន្ថែមលើការសាងសង់រោងចក្រផលិតទឹកស្អាតខ្នាតធំទីបីខាងលើ និងសមិទ្ធផលមួយចំនួនទៀតក្នុងក្រុងបាត់ដំបង ឱ្យសម្រចរួចរាល់នៅក្នុងរយៈពេលបីខែទៀត ពោលគឺធ្វើយ៉ាងណាឱ្យបញ្ចប់នៅខែឧសភាឆ្នាំ២០២៥ ដើម្បីឆ្លើយតបទៅនឹងកំណើនប្រជាពលរដ្ឋ និងតម្រូវការទឹកស្អាតរបស់ប្រជាពលរដ្ឋនៅក្រុងបាត់ដំបង។ ឧត្តម ហ៊ុល ប៊ុណ្ណារិទ្ធ អនុរដ្ឋលេខាធិការក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍និងជានាយកគម្រោងលើកកម្ពស់ការផ្គត់ផ្គង់ទឹកស្អាត និងអនាម័យ បានលើកឡើងនេះខណៈបើកកិច្ចប្រជុំមួយ ដើម្បីពិនិត្យវាយតម្លៃវឌ្ឍនភាពនៃការសាងសង់រោងចក្រផលិតទឹកស្អាត និងសមិទ្ធផលមួយចំនួនទៀត នៅអង្គភាពរដ្ឋាករទឹកខេត្តបាត់ដំបងថ្មីៗនេះ។ ឯកឧត្តម បានលើកឡើងថា ដើម្បីឱ្យការងារនេះមានដំណើរការទៅប្រកបដោយជោគជ័យ និងសម្រេចបានតាមផែនការនោះ គឺទាមទារឱ្យមានការចូលរួមទាំងអស់គ្នា ដូចជា PIU និង PIAC ទាំងក្រុមហ៊ុនសាងសង់ ត្រូវខិតខំប្រឹងប្រែងជាមួយគ្នា ដើម្បីបញ្ចប់ការងារនេះឱ្យបានតាមពេលវេលាកំណត់ខាងលើ ។ ឯកឧត្តម សុខ លូ អភិបាលនៃគណៈអភិបាលខេត្តបាត់ដំបងក៏បានថ្លែងនូវការកោតសរសើរ និងវាយតម្លៃខ្ពស់ចំពោះកិច្ចខំប្រឹងប្រែងរបស់ថ្នាក់ដឹកនាំ បុគ្គលិកនិយោជិតនៃរដ្ឋាករទឹកខេត្តបាត់ដំបង ដែលបានខិតខំប្រឹងប្រែងយកចិត្តទុកដាក់បំពេញភារកិច្ចប្រកបដោយស្មារតីទទួលខុសត្រូវខ្ពស់ក្នុងការបម្រើសេវាកម្មទឹកស្អាតជូនដល់ប្រជាពលរដ្ឋបានយ៉ាងល្អនាពេលកន្លងមក។ ឯកឧត្តម សុខ លូ បានណែនាំបន្ថែមដល់ ថ្នាក់ដឹកនាំ បុគ្គលិកនិយោជិតនៃអង្គភាពរដ្ឋាករទឹកត្រូវយកចិត្តទុកដាក់ក្នុងការពង្រឹងការផ្តល់សេវាផ្គត់ផ្គង់ទឹកស្អាតដែលមានគុណភាព និងសុវត្ថិភាពជូនដល់ប្រជាពលរដ្ឋ ដើម្បីលើកកម្ពស់សុខមាលភាពរបស់ប្រជាជនស្របតាមគោលនយោបាយរបស់រាជរដ្ឋាភិបាលអាណត្តិទី៧។
ការថ្លែងខាងលើនេះខណៈដែលឯកឧត្តមចូលរួមប្រជុំពិនិត្យវឌ្ឍនភាពការងារ និងសំណេះសំណាលជាមួយថ្នាក់ដឹកនាំ កម្មករនិយោជិតអង្គភាពរដ្ឋាករទឹកបាត់ដំបងនាពេលថ្មីៗនេះ។ គួរបញ្ជាក់ថាការអភិវឌ្ឍរោងចក្រផលិតទឹកស្អាតខ្នាតធំទីបីក្នុងខេត្តបាត់ដំបងនេះ គឺដើម្បីឆ្លើយតបនឹងកំណើនប្រជាពលរដ្ឋ និងតម្រូវការទឹកស្អាត ព្រមទាំងការអភិវឌ្ឍន៍ក្រុង និងទីប្រជុំជននានា ក្នុងការលើកសុខភាពសាធារណៈ និងជីវភាពរបស់ប្រជាជនស្របតាមគោលនយោបាយរបស់រាជរដ្ឋាភិបាលកម្ពុជា ដែលផ្តោតសំខាន់លើផែនការយុទ្ធសាស្រ្តបញ្ចកោណដំណាក់កាលទី១ នីតិកាលទី៧ដែលមានសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ដែលបានកំណត់អាទិភាពគន្លឹះចំនួន៥ គឺ ធនធានមនុស្ស ផ្លូវ ទឹក ភ្លើង និងបច្ចេកវិទ្យា ៕ប្រភពអាកាប៉េ
