រាជធានីភ្នំពេញ ៖ នៅក្នុងវេទិកាសារព័ត៌មានក្រោមប្រធានបទ «ការគ្រប់គ្រងសក្តានុពលទឹក និងស្ថានភាពប្រព័ន្ធធារាសាស្ត្រកម្ពុជា» ដែលរៀបចំដោយក្លិបអ្នកកាសែតកម្ពុជា នៅទីស្តីការក្រសួងធនធានទឹក និងឧតុនិយម នាព្រឹកថ្ងៃទី០១ ខែមីនា ឆ្នាំ២០២៥ លោករដ្ឋមន្រ្តី ថោ ជេដ្ឋា រដ្ឋមន្រ្តីក្រសួងធនធានទឹក និងឧតុនិយម បានមានប្រសាសន៍បង្ហាញពីមរតកដ៏ធំធេងរបស់សម្ដេចតេជោ ហ៊ុន សែន អតីតនាយករដ្ឋមន្ត្រីនៃកម្ពុជា សម្រាប់នយោបាយទឹក ដែលបានធ្វើឱ្យប្រទេសកម្ពុជាមាន អាងទឹកតូចធំជាច្រើន ប្រឡាយមេនិងប្រឡាយរងខ្វាត់ខ្វែង ដើម្បីស្រោចស្រពដំណាំកសិកម្ម និងការប្រើប្រាស់ប្រចាំថ្ងៃរបស់ប្រជាពលរដ្ឋ។ ជាពិសេសមានទឹកប្រើប្រាស់នៅក្នុងរដូវប្រាំងប្រមាណ ៤,០០០លានម៉ែត្រគូប ដែលអាចឱ្យកសិករមានទឹកប្រើប្រាស់ក្នុងការបង្កបង្កើនផលនារដូវប្រាំងនាពេលកន្លងមក។
ឯកឧត្តមរដ្ឋមន្រ្តី ថោ ជេដ្ឋា បានមានប្រសាសន៍ថា ៖ «ក្នុងអាណត្តិមុនៗដែលដឹកនាំដោយសម្ដេចតេជោ ហ៊ុន សែន អតីតនាយករដ្ឋមន្រ្តីនៃព្រះរាជរាណាចក្រកម្ពុជា បានកសាងច្រើនណាស់ លោកបានកសាងនូវអាងទឹកធំៗទូទាំងប្រទេស គឺមានចំនួន៨អាងទឹករួចមកហើយ នៅក្នុងនោះតូចបំផុតក៏មានទឹកតិចបំផុត ២៥លានម៉ែត្រគូប ក្នុងមួយអាង រហូតដល់អាងខ្លះមានប្រមាន ៣០០លានម៉ែត្រគូប ក្នុងមួយអាង»។សម្ដេអគ្គមហាសេនាបតីតេជោ ហ៊ុន សែន បានកសាងបន្ទាប់ពីអាងទឹកនោះគឺប្រព័ន្ធធារាសាស្រ្ត ដែលយើងមានរហូតដល់សព្វថ្ងៃនេះមានជាង២,០០០ប្រព័ន្ធរួចមកហើយ។ នៅក្នុងនោះមានប្រព័ន្ធធារាសាស្រ្តខ្នាតធំ មានប្រព័ន្ធធារាសាស្រ្តខ្នាតកណ្ដាល និងប្រព័ន្ធធារាសាស្រ្តខ្នាតតូច ដែលខ្នាតតូចនោះគឺយើងអាចស្រោចស្រពពី២០០ ទៅដល់៥០០០ហិកតា ហើយខ្នាតមធ្យមគឺ៥០០ហិកតាឡើង។ នេះគឺជាស្នាដៃរបស់សម្ដេចតេជោ ហ៊ុន សែន ដែលលោកបានដឹកនាំនៅក្នុងអាណត្តិរបស់លោកកន្លងមក»។
ទន្ទឹមនោះ ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម អំពាវនាវឱ្យពលរដ្ឋធ្វើស្រែរដូវប្រាំងត្រូវតាមដានព័ត៌មាន និងស្ដាប់តាមការណែនាំរបស់ក្រសួងពាក់ព័ន្ធ ដើម្បីបង្ការការខូចខាតស្រូវរដូវប្រាំង ដោយសារតែខ្វះទឹកប្រើប្រាស់។ គិតត្រឹមឆ្នាំ២០២៤ ក្រសួងធនធានទឹក និងឧតុនិយម បានបង្កើនលទ្ធភាពស្រោចស្រពលើផ្ទៃដីចំនួន ១,៩៦៩,៨៤៣ហិកតា ក្នុងនោះស្រូវរដូវវស្សាមាន ១,៣៨៧,០៥១ហិកតា និងស្រូវរដូវប្រាំងមានចំនួន ៥៨២,៧៩២ហិកតា។ ដោយសារតែប្រឡាយ និងអាងទឹកមួយចំនួនមានសភាពគោករាក់ ដែលចាំបាច់ត្រូវស្ដាឡើងវិញ និងការប្រែប្រួលអាកាសធាតុធ្វើឱ្យមានទឹកជំនន់និងរាំងស្ងួត ដែលប៉ះពាល់ដល់ការអភិវឌ្ឍ និងគ្រប់គ្រងទឹក។ ខណៈដែលសម្ភាធនៃការប្រើប្រាស់ទឹកសម្រាប់វិស័យកសិកម្មមានការកើនឡើងច្រើន ជាក់ស្ដែងផែនការអនុវត្តស្រូវរដូវប្រាំងឆ្នាំ២០២៤-២០២៥ មានចំនួន ៥៣ម៉ឺនហិកតា ប៉ុន្តែការអនុវត្តជាក់ស្ដែងមានរហូតដល់ទៅ ៩០ម៉ឺនហិកតា ឬស្មើនឹង ១៧០%ឯណោះ។
អាស្រ័យហេតុនេះទើបរដ្ឋមន្ត្រីក្រសួងធនធានទឹក និងឧតុនិយម អំពាវនាវទៅកាន់ប្រជាពលរដ្ឋយ៉ាងដូច្នេះថា៖ «សូមអំពាវនាវដល់បងប្អូនប្រជាពលរដ្ឋថា សូមបងប្អូនប្រជាពលរដ្ឋទាំងអស់ សូមយកចិត្តទុកដាក់ក្នុងការស្ដាប់ នូវការណែនាំរបស់រាជរដ្ឋាភិបាល ក៏ដូចជាក្រសួងធនធានទឹក និងឧតុនិយម ដែលជាសេនាធិការ នៅក្នុងនោះគឺតែងតែប្រកាសជារៀងរាល់ឆ្នាំ ជាពិសេសចុងរដូវវស្សា ដើម្បីឱ្យបងប្អូនប្រជាពលរដ្ឋស្ដាប់ និងទទួលនូវព័ត៌មានទាំងឡាយដែលក្រសួងធនធានទឹកបានផ្ដល់ជូន ហើយមិនត្រឹមតែប៉ុណ្ណោះទេ ក្រសួងក៏បានផ្សព្វផ្សាយទៅដល់ខេត្តទៅដល់ស្រុកទៅដល់ឃុំតែម្ដង។ អញ្ចឹងហើយសូមបងប្អូនយកចិត្តទុកដាក់ក្នុងការសហការណ៍ ជាមួយក្រសួងក៏ដូចជាអាជ្ញាធរដែនដី ដើម្បីធ្វើយ៉ាងណាឱ្យបងប្អូនកុំឱ្យខាត ប្រើប្រាស់ទឹកកុំឱ្យខាត ស្ដាប់តាមការណែនាំគឺបងប្អូនអាចចំណេញពេលវេលា អាចចំណេញថវិកា ហើយកម្លាំងថែមទៀត សូមបងប្អូនយកចិត្តទុកដាក់ក្នុងការប្រើប្រាស់ទឹកជាពិសេសរដូវប្រាំងតែម្ដង»។
សូមជម្រាបថា គិតមកដល់ពេលបច្ចុប្បន្ននេះ ប្រព័ន្ធធារាសាស្រ្តកម្ពុជាមានប្រវែងសរុបប្រហែល ៧០,០០០គីឡូម៉ែត្រ និងអាចស្តុកទឹកបានប្រមាណ ៤,០០០លានម៉ែត្រគូប ពីអាងទឹកធំតូច ប្រហែល១,៥០០អាង។ ក្នុងនោះបរិមាណទឹកប្រមាណ ៨០% ត្រូវបានប្រើប្រាស់ស្រោចស្រពផ្ទៃដីកសិកម្ម ជាពិសេសដំណាំស្រូវ ចំណែកឯការផ្គត់ផ្គង់ទឹកស្អាតសម្រាប់ប្រើប្រាស់ និងបម្រើឱ្យវិស័យឧស្សាហកម្ម មានតម្រូវការប្រមាណ ២០% នៃការប្រើប្រាស់ទឹកសរុប។ កម្ពុជានៅប្រឈមនឹងការខ្វះខាតទឹក ដែលចាំបាច់ត្រូវការអាងទឹក និងប្រព័ន្ធធារាសាស្រ្តឱ្យមានលក្ខណៈពេញលេញបន្ថែមទៀត ដើម្បីធានាបានទឹកស្រោចស្រពដល់ផ្ទៃដីរបស់កសិករ។ ប្រទេសកម្ពុជាមានប្រព័ន្ធធារាសាស្ត្រចំនួន ២,៣៥២ប្រព័ន្ធ ក្នុងនោះប្រព័ន្ធខ្នាតធំចំនួន ៥៦ប្រព័ន្ធ ខ្នាតមធ្យមចំនួន ១,១៦៦ប្រព័ន្ធ និងខ្នាតតូចចំនួន ១,១២២ប្រព័ន្ធ និងអាងទឹកខ្នាតធំចំនួន៨ (អាងទឹកសរុបប្រមាណ១,៥០០អាង) ហើយបានបង្កើនលទ្ធភាពស្រោចស្រពលើផ្ទៃដីចំនួន ១,៩៦៩,៨៤៣ហិកតា៕
