ខេត្តស្ទឹងត្រែង៖ សិប្បកម្មកែច្នៃឈ្រើប្រណីតដ៏ធំមូយ ដែលមានថៅកែជាជនជាតិវៀតណាម មានទីតាំងស្ថិតក្នុងភូមិបាចុង ឃុំព្រះបាទ ស្រុកស្ទឹងត្រែង ខេត្តស្ទឹងត្រែង កំពុងដំណើរយ៉ាងរលូន គ្មានការរំខាននិងមិនហ៊ានក្អក ពីមន្ត្រីជំនាញ មេព្រៃ ឬសមត្ថកិច្ចពាក់ព័ន្ធនោះឡើយ នេះបើតាមប្រភពពត័មានពីប្រជាពលរដ្ឋ។
ប្រជាពលរដ្ឋបានរាយការណ៍ ថាសិប្បកម្មកែច្នៃឈើប្រណីតដ៏ធំ និងជាកន្លែងផ្ទុកឈើដ៏មានសុវត្ថិភាពមួយកន្លែង ដែលត្រូវបានគេដឹងថាជាកម្មសិទ្ធិ របស់ស្រ្តីជនជាតិ
វៀតណាមដ៏មានឥទ្ធិពលម្នាក់ ឈ្មោះខ្មែរហៅ ហេងសំនៀង ឈ្មោះវៀតណាមហៅយាយព្រឿង ត្រូវបានសង្ស័យថាមានអ្នកមានអំណាច នៅពីក្រោយខ្នងទើបយាយព្រឿង
រកស៊ីជួញដូរឈើប្រណឹតខុសច្បាប់ឡើងដុះស្លែ មានខ្សែមានបក្សពួក នាំឈើខុសច្បាប់ទៅលក់នៅស្រុកយួនយ៉ាងរំភើយផាត់។
ប្រភពព័តមានឲ្យដឹងទៀតថា យាយព្រឿងធ្លាប់អះអាងថា គាត់មានច្បាប់សិប្បកម្មឈើចំនួន១០០ម៉ែត្រគូប តែត្រង់ថាឈើដឹកចេញពីព្រៃសម្បទានណា យាយព្រឿង
មិនបានបញ្ជាក់នោះទេ មួយវិញទៀត សិប្បកម្មកែច្នៃឈើរបស់យាយព្រឿងនេះ បានប្រើកម្មករជាជនជាតិវៀតណាមភាគច្រើន។
មុខរបររកស៊ីឈើទាំងស្របច្បាប់ និងមិនស្របច្បាប់របស់ យាយព្រឿងមេឈ្មួញដុះស្លែនេះ មិនដែលមានជំនាញ ឬសមត្ថកិច្ចពាក់ព័ន្ធណាហ៊ានក្អកឡើយ ឯការដឹកជញ្ជូនគ្រឿងសិប្បកម្មឈើ ឬពាក់កណ្តាលកែច្នៃវិញ បង្កប់ដឹកទៅលក់ដល់ប្រទេសវៀតណាម ចេញតាមខេត្តត្បូងឃ្មុំ ភាគច្រើនដឹកតាមរថយន្តដោយប្រើរូបភាពផ្សេងៗ ឬប្រើរថយន្តមានស្លាកឈ្មោះស្រាបៀរអង្គរជាដើមងាយស្រួល លោតឆ័ត្របំភន្ត័ភ្នែកមហាជនតាមផ្លូវ។
ប្រភពបន្ថែមថា ពេលដឹកជញ្ជូនតាមផ្លូវគេពុំឃើញមានមេ ព្រៃតាមផ្លូវរារាំងនោះទេ ព្រោះគេបានសំរួលគ្នាជាមុនអស់ហើយឬដោះស្រាយថា ជា រថយន្តរបស់ក្រុមហ៊ុនស្រាបៀរអង្គរ។
គេពុំដឹងថា តើរថយន្តដឹកឈើរបស់យាយព្រឿង បិតផ្លាកស្រាបៀអង្គរពិតរឺក្លែងក្លាយនោះទេ ហើយតើក្រុមហ៊ុនស្រាបៀអង្គរដឹងដែររឺទេ យើងនឹងព្យាយាមស្វែងរកពត័មានបំភ្លឺនៅពេលក្រោយ។
យើងពុំអាចសុំការបំភ្លឺ ពីយាយព្រឿងជនជាតិវៀតណាម មានឈ្មោះខ្មែរ ហេង សំនាងបានឡើយ តែព្យាយាមនៅពេលក្រោយ៕
