រាជធានីភ្នំពេញ៖ ក្រោយពីលេចឮពាក្យតម្រុយ អំពីគម្រោងជំនួបពិភាក្សា រវាងសម្តេចក្រុមព្រះ និងលោក សម រង្ស៊ី លោក កឹម សុខា នៅឯស្រុកបារាំនោះ លោក សម រង្ស៊ី ប្រធានគណបក្សសង្រ្គោះជាតិ បានប្រញាប់ប្រញាល់អះអាងថា ជំនួបពិភាក្សាជាមួយសម្តេចក្រុមព្រះ គឺជារឿងឥតប្រយោជន៍ មិនមានសារៈសំខាន់ មិនចាំបាច់ ព្រោះសម្តេចក្រុមព្រះ គ្មានសមត្ថភាពដឹកនាំគណបក្សនយោបាយនោះទេ។
ចំណែកលោក កឹម សុខា បានថ្លែងថា គណបក្សសង្គ្រោះជាតិ មិនទាន់មានគម្រោង សរសេរលិខិតថ្វាយ សម្តេចក្រុមព្រះនរោត្តរណប្ញទ្ឋិ ដើម្បីជជែកគ្នានោះទេ ប៉ុន្តែលោកស្វាគមន៍ ការរួបរួមអ្នករាជានិយមទាំងអស់ ។
ការថ្លែងដូច្នេះ ធ្វើឡើងនៅទីស្នាក់ការកណ្តាលគណបក្ស ស្ថិតនៅសង្កាត់ចាក់អង្រែលើ ខណ្ឌមានជ័យ នាព្រឹកថ្ងៃទី១៥ តុលា ២០១៥ ក្នុងឱកាសដែលលោក កឹម សុខា ដឹកនាំពិធីបង្សុកូល គោរពព្រះវិញ្ញាណក្ខន្ឋព្រះបរមរតនកោដ្ឋ ជាខួបគម្រប់៣ឆ្នាំ នៃថ្ងៃយាងចូលព្រះទីវង្គត របស់ព្រះករុណា ព្រះបាទសម្តេច ព្រះនរោត្តម សីហនុ ព្រះបិតាឯករាជ្យជាតិ នៅវេលាម៉ោង ៨៖០០នាទីព្រឹក ។
នៅក្នុងឱកាស នៃថ្ងៃខួបគម្រប់៣ឆ្នាំ នៃថ្ងៃយាងចូលព្រះទីវង្គត របស់ព្រះករុណា ព្រះបាទសម្តេច ព្រះនរោត្តម សីហនុ លោក កឹម សុខា បានរំលឹកដល់ស្នាព្រះហស្ថរបស់ព្រះអង្គ ក្នុងនាមជាអ្នកដឹកនាំប្រទេស៖
-ទាមទារឯករាជ្យ មិនរណបបរទេស
-ការពារបុរណភាពទឹកដី មិនឲ្យបាត់បង់
-រក្សា ការពារធនធានធម្មជាតិ មិនបំផ្លិចបំផ្លាញ
-បង្រួបបង្រួមជាតិ ផ្សះផ្សារជាតិ មិនបំបែកបំបាក់ជាតិ
-ឲ្យតម្លៃគុណភាព សមត្ថភាព គុណធម៌ នៃការអប់រំ
-មិនប្រើពាក្យអសុរស កោងកាច គំរាមកំហែង ហ៊ានធ្វើសមាជជាតិឲ្យប្រជាពលរដ្ឋ ជួបតវ៉ាដោយផ្ទាល់ ជាមួយព្រះអង្គ ក្នុងនាមជាមេដឹកនាំ។ល។ (នេះបើយោងតាម បណ្តាញហ្វេសប៊ុករបស់លោក កឹម សុខា)។
អ្នកវិភាគនយោបាយ ចាត់ទុកការថ្លែងរបស់ មេដឹកនាំ បក្សប្រឆាំង ជាសញ្ញថា នឹងគ្មានការបង្រួបបង្រួមគ្នា គ្រាដែលគណបក្សរាជានិយម ហ្វ៊ុនស៊ិនប៉ិច កំពុងតែធ្លាក់ប្រជាប្រិយភាពយ៉ាងខ្លាំង និងខិតខំប្រមូល អ្នកប្រជាធិបតេយ្យ ដើម្បីបង្រួបបង្រួមកម្លាំងឡើងវិញ ៕
