ខេត្តបន្ទាយមានជ័យ ៖ ក្នុងសេចក្តីប្រកាសព័ត៌មានមួយ រដ្ឋបាលខេត្តបន្ទាយមានជ័យ សូមជម្រាបជូនដល់សាធារណជន និងអ្នកសារព័ត៌មានទាំងអស់ឱ្យបានជ្រាបថា កាលពីព្រឹកថ្ងៃទី២៩ ខែមករា ឆ្នាំ២០២៥ មានការចុះផ្សាយព័ត៌មានតាមវិទ្យុអាស៊ីសេរី (RFA Khmer) ដែលបានលើកឡើងថា ប្រជាពលរដ្ឋចំនួន២ឃុំ រួមមានឃុំប្រាសាទ និងឃុំភ្នំលៀប ស្រុក ព្រះនេត្រព្រះ ខេត្តបន្ទាយមានជ័យ ពាក់ព័ន្ធករណីដីតំបន់២ នៃតំបន់ទន្លេសាប ស្ថិតក្នុងភូមិសាស្ត្រខេត្តបន្ទាយមានជ័យ។
ពាក់ព័ន្ធនឹងការចុះផ្សាយខាងលើនេះ នៅថ្ងៃទីទី៣០ ខែមករា ឆ្នាំ២០២៥ រដ្ឋបាលខេត្តបន្ទាយមានជ័យ សូមធ្វើការបំភ្លឺជូនសាធារណជន ដូចខាងក្រោម ៖
កន្លងមកទីតាំងដីព្រៃលិចទឹកតំបន់៣ នៃតំបន់ទន្លេសាប ស្ថិតនៅក្នុងភូមិសាស្ត្រឃុំភ្នំលៀប និងឃុំប្រាសាទ ស្រុកព្រះនេត្រព្រះ និងឃុំសំបូរ ស្រុកមង្គលបូរី ខេត្តបន្ទាយមានជ័យ មានបងប្អូនមកពី បណ្តាស្រុក និងខេត្តផ្សេងៗមួយចំនួនទៀតបាននាំគ្នាចូលរុករាន ទន្ទ្រានឈូសឆាយដើម្បីគ្រប់គ្រង កាន់កាប់ និងអាស្រ័យផលយ៉ាងអនាធិបតេយ្យ។
ដោយពិនិត្យឃើញពីផលប៉ះពាល់នានាយ៉ាងធ្ងន់ធ្ងរពាក់ព័ន្ធនឹងដីតំបន់ទន្លេសាប រាជរដ្ឋាភិបាលក្រោមអាណត្តិដឹកនាំរបស់សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រីបានមានបទបញ្ជា ណែនាំឱ្យធ្វើការទប់ស្កាត់ការចូលរុករាន ទន្ទ្រានកាន់កាប់ដីដែនព្រៃលិចទឹកក្នុងតំបន់២ និងតំបន់៣ នៃតំបន់ទន្លេសាប ដើម្បីដកហូតទុកជាដីរបស់រដ្ឋវិញ។
ក្រោយពីធ្វើការដកហូតដីតំបន់២និងតំបន់៣ រដ្ឋបាលខេត្តបន្ទាយមានជ័យបានបង្កើតក្រុមការងារចុះពិនិត្យ ស្រាវជ្រាវ ស្រង់ទិន្នន័យគ្រួសារប្រជាពលរដ្ឋដែលចូលគ្រប់គ្រង កាន់កាប់ ប្រើប្រាស់ និងអាស្រ័យផលជាក់ស្តែងនៅលើទីតាំងដីដែនព្រៃលិចទឹកក្នុងតំបន់៣ និងបានគោរពស្នើសុំកាត់ឆ្កៀលដីក្នុងតំបន់៣ ដើម្បីបែងចែកជូនបងប្អូនប្រជាពលរដ្ឋសម្រាប់ប្រើប្រាស់ និងអាស្រ័យផល។
ហើយសម្តេចអគ្គមហាសេនាបតីតេជោ ហ៊ុន សែន អតីត នាយករដ្ឋមន្ត្រី និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី បានសម្រេចកាត់ឆ្កៀលដីចេញ ពីផ្ទៃដីតំបន់៣ នៃតំបន់ទន្លេសាប តាមអនុក្រឹត្យលេខ៥៧ អនក្រ.បក ចុះថ្ងៃទី០៦ ខែមីនា ឆ្នាំ២០២៣ មានទីតាំងដីស្ថិតក្នុងភូមិសាស្ត្រខេត្តបន្ទាយមានជ័យ ដើម្បីផ្តល់ជូនប្រជាពលរដ្ឋដែលបានកាន់កាប់យូរឆ្នាំ(១០ ឆ្នាំឡើង) ដែលមានផ្ទៃដីសរុបចំនួន៣.៤៤១ហិកតា រួមបញ្ចូលទាំងផ្ទៃដីបម្រុងទុកចំនួន១០% និងផ្ទៃដី សម្រាប់គម្រោងហេដ្ឋារចនាសម្ព័ន្ធចំនួន២០% ។
ក្នុងនោះសម្រាប់ស្រុកព្រះនេត្រព្រះមានទំហំ២.២៨៥ហិកតា ៤០អា និងស្រុកមង្គលបូរី មានទំហំ១.១៥៥ហិកតា ៧០អា សម្រាប់ផ្តល់ជូនប្រជាពលរដ្ឋប្រើប្រាស់ និង អាស្រ័យផល។
សេចក្តីប្រកាសព័ត៌មានបានបន្តថា: ជាលទ្ធផលរួមនៃការចុះធ្វើអត្តសញ្ញាណកម្មប្រជាពលរដ្ឋជាក់ស្តែង មានចំនួន៨៩០គ្រួសារ ដែលគ្រប់លក្ខខណ្ឌត្រូវទទួលបានដី ក្នុងនោះនៅភូមិសាស្ត្រស្រុកព្រះនេត្រព្រះ មានចំនួន៦៦៣គ្រួសារ ស្មើ នឹង៦៦៣ក្បាលដី និងស្រុកមង្គលបូរី មានចំនួន២២៧គ្រួសារ ស្មើនឹង២២៧ក្បាលដី ការបែងចែកដីនេះ ឆ្នោតទទួលយកក្បាលដីស្រែនៅឡើយ ។
ដោយសារពួកគាត់ទាមទារចង់បានដី គឺអនុវត្តតាមរយៈការចាប់ឆ្នោតទទួលយកក្បាលដីស្រែ ដោយមានការចូលរួមយ៉ាងច្រើនកុះករពីសំណាក់បង ប្អូនដោយផ្ទាល់ ។
ប៉ុន្តែនៅសេសសល់មួយចំនួនតូចដែលពួកគាត់រស់នៅក្នុងខេត្តសៀមរាម មិនទាន់មកចាប់ នៅលើទីតាំងចាស់ដែលពួកគាត់ធ្លាប់បានរំលោភចូលកាន់កាប់កន្លងមក ដែលផ្ទុយពីការសម្រេចរបស់រាជរដ្ឋាភិបាល ដោយមិនអនុញ្ញាត ឱ្យពួកគាត់បន្តកាន់កាប់នៅលើទីតាំងចាស់(ទីតាំងដីតំបន់៣) នោះទេ ។
គឺត្រូវរៀបចំឱ្យពួកគាត់មកទទួលទីតាំង ដីថ្មីនៅមួយកន្លែង ដើម្បីមានភាពយុត្តិធម៌ទាំងអស់គ្នា ពីព្រោះការកាត់ឆ្កៀលដីខាងលើនេះ មិនបានកាត់ ឆ្កៀលតាមបែបស្បែកខ្លានោះទេ ។
និងម្យ៉ាងទៀតពួកគាត់កំពុងជឿលើការញុះញង់ពីមជ្ឈដ្ឋានខាងក្រៅដែល មាននិន្នាការប្រឆាំងរាជរដ្ឋាភិបាលស្របច្បាប់និងទទួលព័ត៌មានតែពីបក្ខពួកខ្លួន ដែលចូលចិត្តបង្កើត បញ្ហាបំភ្លៃខុសការពិតធ្វើឱ្យមានការយល់ខុសមកលើថ្នាក់ដឹកនាំផងដែរ ដែលទង្វើទាំងនេះមិនគួរឱ្យមានការ លើកលែងជាដាច់ខាត។
រដ្ឋបាលខេត្តបន្ទាយមានជ័យអោយដឹងបន្តទៀតថា: ថ្មីៗនេះមានបងប្អូនប្រជាពលមួយចំនួនតូចបានលួចចូលទៅអាស្រ័យផលនៅលើទីតាំងដីតំបន់៣ នៃតំបន់ទន្លេសាប ដែលរាជរដ្ឋាភិបាលបានចេញបទបញ្ជាហាមឃាត់ជាដាច់ខាត មិនឱ្យមានការចូល រុករាន ឈូសឆាយ អាស្រ័យផល ។
ដោយក្នុងនោះរដ្ឋបាលខេត្តបន្ទាយមានជ័យ បានចាត់ក្រុមការងារ ចម្រុះថ្នាក់ខេត្ត ចុះធ្វើការណែនាំ អប់រំ និងបញ្ឈប់ពួកគាត់រួចហើយ បានចំនួន១៨គ្រួសារ ក្នុងចំណោម ១៩គ្រួសារ ស្មើនឹងផ្ទៃដីសរុប១១៨ហិកតា ស្ថិតនៅភូមិសាស្ត្រឃុំភ្នំលៀប ស្រុកព្រះនេត្រព្រះ ខេត្តបន្ទាយ មានជ័យ។
ចំពោះបងប្អូនដែលទទួលបានដីតាមរយៈនៃការចាប់ឆ្នោតកន្លងមកមានចំនួនសរុប៨៦១គ្រួសារ ស្មើនឹង៨៦១ក្បាលដី បានទទួលយកដីរួចហើយ ដោយនៅសល់ចំនួន២៩គ្រួសារ។
ដោយចាត់ទុកព័ត៌មានផ្សាយចេញពីម៉ាស៊ីនឃោសនាមាននិន្នាការប្រឆាំងខេត្តបន្ទាយមានជ័យបានបំភ្លឺយ៉ាងម៉ឺងម៉ាត់ដូច្នេះថា: ក្នុងនោះចំនួន១៩គ្រួសារ មានអាសយដ្ឋានរស់នៅក្នុងខេត្តសៀមរាប មិនព្រមចាប់ឆ្នោតទទួលយកក្បាលដី ។ នោះដោយសារពួកគាត់ជឿលើការញុះញង់ពីមេខ្លោងនិងក្រុមប្រឆាំងរាជរដ្ឋាភិបាលស្របច្បាប់តែប៉ុណ្ណោះ ដែលបច្ចុប្បន្ន កំពុងធ្វើការផ្សព្វផ្សាយបំភ្លៃព័ត៌មានខាងលើនេះ ខុសការពិតទាំងស្រុង ជាទង្វើដែលមិនអាចលើកលែង់បានឡើយ ៕
