ខេត្តបាត់ដំបង ៖ កម្លាំងកងរាជអាវុធហត្ថខេត្តបាត់ដំបង បង្ក្រាបគ្រឿងញៀនបានដល់ទៅ២១៣គីឡូក្រាម។ក្នុងនោះចាប់ខ្លួនជាបន្ដបន្ទាប់ក្រុមឧក្រិដ្ឋជនមេខ្លោងចំនួន១១នាក់។
ប្រភពព័ត៌មានអោយដឹងកាលពាិថ្ងៃទី២៥ ខែមករា ឆ្នាំ២០២៥ ថា ប្រតិបត្តិការនេះធ្វើឡើងដោយមានការចង្អុលបង្ហាញពីនាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស ។
ឯលោកឧត្តមសេនីយ៍ត្រី ហែម វុទ្ធី មេបញ្ជាការកងរាជអាវុធហត្ថខេត្តបាត់ដំបងបានដឹកនាំបញ្ជាផ្ទាល់.ហើយក៏មានការសម្របសម្រួលនីតិវិធីពីលោក កែវ សុជាតិ ព្រះរាជអាជ្ញានៃអយ្យការអមសាលាដំបូងខេត្តបាត់ដំបងផងដែរ ។
ប្រភពបន្តថា : ជាការចាប់ផ្តើមនៅថ្ងៃទី២១ ខែមករា ឆ្នាំ២០២៥ ការិយាល័យជំនាញអាវុធហត្ថឃាត់ខ្លួនជនសង្ស័យ៣នាក់ : ១-ឈ្មោះ ញឹប សាណី អាយុ៣២ឆ្នាំ ទីលំនៅភូមិពាមឯក ឃុំពាមឯក ស្រុកឯកភ្នំ ខេត្តបាត់ដំបង, ២-ឈ្មោះ វិន ផាន់និ ហៅឃីម អាយុ២២ឆ្នាំ ទីលំនៅភូមិករហាល ឃុំពាមឯក ស្រុកឯកភ្នំ ខេត្តបាត់ដំបង និង៣-ឈ្មោះ សុខ វ៉ាន់ដា ហៅទ្រូ អាយុ២៥ឆ្នាំ មានទីលំនៅភូមិចុងព្រែក សង្កាត់ក្តុលដូនទាវ ក្រុងបាត់ដំបង។ ពួកគេពាក់ព័ន្ធករណីជួញដូរដោយខុសច្បាប់នូវសារធាតុញៀន ដោយបានចាប់យកវត្ថុតាងគ្រឿងញៀនប្រភេទម៉ាទឹកកក (ICE) ចំនួន២ កញ្ចប់ ទម្ងន់១០.៦៨ក្រាម។
យោងសួរចម្លើយរបស់ជនសង្ស័យទាំងនេះ នៅថ្ងៃទី២២ ខែមករា ឆ្នាំ២០២៥ លោកឧត្តមសេនីយ៍ត្រី ហែម វុទ្ធី មេបញ្ជាការកងរាជអាវុធហត្ថខេត្តបាត់ដំបងបានដឹកនាំកម្លាំងមន្ទីរស្រាវជ្រាវ និងបង្ក្រាបបទល្មើសកងរាជអាវុធហត្ថខេត្តបាត់ដំបង កម្លាំងកងអន្តរាគមន៍ កម្លាំងកងរាជអាវុធហត្ថក្រុងបាត់ដំបង និងកម្លាំងកងរាជអាវុធហត្ថស្រុកពាក់ព័ន្ធ ដឹកនាំដោយលោកវរសេនីយ៍ឯក ជា តារា មេបញ្ជាការរងខេត្ត បានចុះប្រត្តិបត្តការដល់លំនៅដ្ឋានមេក្លោងជួញដូរគ្រឿងញៀន ស្ថិតនៅបុរីឯកភ្នំវីឡា ភូមិចុងព្រែក សង្កាត់ក្តុលដូនទាវ ក្រុងបាត់ដំបង ខេត្តបាត់ដំបង។
សមត្ថកិច្ចបានចាប់ខ្លួនមេខ្លោងនិងបក្ខពួកបានចំនួន៨នាក់ទៀត រួមមាន៖
១-ឈ្មោះ វី វិនហាយ អាយុ៣០ឆ្នាំជាមេខ្លោង ស្នាក់នៅចំណុចកន្លែងកើតហេតុខាងលើ ។២-ឈ្មោះ មួង ឌី អាយុ៤០ឆ្នាំ ជាមេខ្លោង ស្នាក់នៅបណ្តោះអាសន្នជាមួយឈ្មោះ វី វិនហាយ។៣-ឈ្មោះ សន បញ្ញា អាយុ៣០ឆ្នាំ ស្នាក់នៅបណ្តោះអាសន្នជាមួយឈ្មោះ វី វិនហាយ។៤-ឈ្មោះ រុំ សុវណ្ណ អាយុ៣៦ឆ្នាំស្នាក់នៅបណ្តោះអាសន្នជាមួយឈ្មោះ វី វិនហាយដែរ ។ ៥-ឈ្មោះ ថេត ស្រីនា ភេទស្រី អាយុ២៨ឆ្នាំ ជាប្រពន្ធរបស់ឈ្មោះ វី វិនហាយ។៦-ឈ្មោះ សុច ចរិយា ភេទស្រី អាយុ១៧ឆ្នាំ ជាប្រពន្ធរបស់ឈ្មោះ មួង ឌី ។៧-ឈ្មោះ រដ្ឋ ចន្ថា អាយុ ៣៥ឆ្នាំ ស្នាក់នៅភូមិចុងព្រែក សង្កាត់ក្តុលដូនទាវ ក្រុងបាត់ដំបង និង៨- ឈ្មោះ ឡឹប លីដា ហៅអឹក អាយុ២៩ឆ្នាំ ស្នាក់នៅ សង្កាត់ស្វាយក្រវ៉ាន់ ក្រុងច្បារមន ខេត្តកំពង់ស្ពឺ។
តមក កម្លាំងជំនាញបានពន្លាតដែនដីចាប់ខ្លួននៅក្រុងច្បារមន ខេត្តកំពង់ស្ពឺ និងបានឆែកឆេរក្នុងរថយន្ត និងលំនៅដ្ឋានរបស់ឈ្មោះ វី វិនហាយ រកឃើញគ្រឿងញៀន២១៣ដុំ ទម្ងន់ប្រមាណ២១៣គីឡូក្រាម ក្នុងនោះមាន៖ ១-
គ្រឿងញៀនប្រភេទម៉ាទឹកកក (ICE) ចំនួន៦៩ដុំ ទម្ងន់ប្រមាណ៦៩គីឡូក្រាម, ២-គ្រឿងញៀនប្រភេទហេរ៉ូអ៊ីន ចំនួន៤៤ដុំ ទម្ងន់ប្រមាណ៤៤គីឡូក្រាម,៣- គ្រឿងញៀនប្រភេទកេតាមីន (Ice K) ចំនួន១០០ដុំ ទម្ងន់ប្រមាណ១០០គីឡូក្រាម, ៤-អាវុធAK៤៧ ចំនួន២ដើម បង់ចំនួន២ គ្រាប់ចំនួន១៣គ្រាប់,៥- អាវុធខ្លី កា៥៤ ចំនួន១ដើម គ្មានគ្រាប់ និងរថយន្ត៦-ចំនួន២គ្រឿង។
វត្ថុតាងនិងជនសង្ស័យត្រូវកម្លាំងអាវុធហត្ថខេត្តបាត់ដំបងនៅថ្ងៃទី២៦ខែមករា បាននឹងកំពុងកសាងសំណុំរឿងបញ្ជូនទៅតុលាការដើម្បីចាត់ការបន្តតាមនីតិវិធី៕
