ប្រធានមន្ទីរព័ត៌មានខេត្តសៀមរាប ដែលទើបតែងតំាងថ្មី ត្រូវបង្កើន ការទំនាក់ទំនង ជាមួយស្ថាប័ននានា ក្នុងខេត្ត ដើម្បីទទួលបាន ព័ត៌មានគ្រប់ជ្រុងជ្រោយ

ខេត្តសៀមរាប៖ ឯកឧត្តម ខៀវ កញ្ញារិទ្ធ រដ្ឋមន្រ្តីក្រសួងព័ត៌មាន នៅក្នុងឱកាសប្រកាសតែងតំាង លោក លីវ សុខន ជាប្រធានមន្ទីរព័ត៌មានខេត្តសៀមរាប ជំនួសលោក កែវ ពេជ្រនិមល ដែលបានចូលនិវត្ត នាព្រឹកថ្ងៃទី០៧ ខែតុលា!នេះថា មន្ទីរព័ត៌មាន មានតួនាទីសំខាន់ ក្នុងការផ្សព្វផ្សាយអំពីព្រឹត្តការណ៍នានា ដូចជាព្រឹត្តិការណ៍ សង្គម នយោបាយ និង ការងារអភិវឌ្ឍន៍របស់ខេត្ត ជូនទៅដល់ប្រជាពលរដ្ឋទូទៅបានដឹង ។ ជាមួយន័យនេះដែរ ឯកឧត្តមបានបញ្ជាក់ថា ការបង្កើនកិច្ចទំនាក់ទំនង ជាមួយស្ថាប័ននានាក្នុងខេត្ត ត្រូវតែ បង្កើនឡើងបន្ថែមទៀត ដើម្បីទទួលបានព័ត៌មាន គ្រប់ជ្រុងជ្រោយ និងមានសារសំខាន់ បញ្ជ្រាបការយល់ដឹង ជូនដល់ប្រជាពលរដ្ឋ ឲ្យបានទូលំទូលាយផងដែរ ។

រដ្ឋមន្រ្តីក្រសួងព័ត៌មាន ក៏បានអំពាវ ស្នើដល់ស្ថាប័នរដ្ឋនិងឯកជន នៅក្នុងខេត្តសៀមរា សូមបន្តការផ្សារ ភា្ជប់ទំនាក់ទំនង់ល្អនិងបង្កភាពងាយស្រួល
អ្នកយកព័ត៌មាន ដើម្បីឲ្យអ្នកព័ត៌មាន មានលទ្ធភាពក្នុងការសសេរ ព័ត៌មានបានស៊ីជម្រៅ ហើយមានគុណភាព នឹងស្តែងចេញបានច្បាស់ ព័ត៌មានពិត ចៀសវាងការផ្សាយ ព័ត៌មានដែលគ្មានវិជ្ជាជីវៈ បង្កភាពអាប់អួរឲ្យសង្គម និងមានការយល់ច្រឡំពីសំណាក់សាធារណជន ព្រោះថា ព័ត៌មានវានឹងអាចក្លាយជា
អាវុធមុខ២ បើសិនជាប្រភព ត្រូវបានផ្តល់ព័ត៌មាន មិនច្បាស់ការណ៍ ។

ឯកឧត្តមបានឲ្យដឹងថា ដើម្បីឲ្យប្រព័ន្ធផ្សព្វផ្សាយរបស់រដ្ឋ កាន់តែទូលំទូលាយ ក្រសួងព័ត៌មានកំពុងរៀប ចំបង្កើតឲ្យមានបណ្តាញស្ថានីយ៍ទូរទស្សន៍ជាតិកម្ពុជា ផ្សាយផ្ទាល់នៅខេត្តសៀមរាប ហើយទូរទស្សន៍នេះ និងដំណើរការ ក្នុងពេលឆាប់ៗខាងមុខនេះ ។

ឯកឧត្តម មានប្រសាសន៍ថា ៖ គ្រប់បណ្តាស្ថាប័ន មន្ទីរ អង្គភាពទាំងអស់ ដែលបានចាត់ទុកថា អ្នកយកព័ត៌មានជាបន្លាក្នុងកែវភ្នែក ឬក៏ថា គ្រប់ព្រឹត្តិការណ៍ការងារ ដែលកំពុងដំណើរការ មិនត្រូវការអ្នកយក ព័ត៌មាននោះ គឺប្រៀបបីដូចជា ពុទ្ធបរិស័ទធ្វើបុណ្យ ឥតមេក្រូ យ៉ាងដូច្នោះដែរ ៕
ប៊ុនធឿន (សៀមរាប)