អន្តរជាតិ ៖ ភ្នំមួយនៅភាគខាងកើតនៃប្រទេសបានផ្ទុះឡើងម្តងទៀត ដោយបញ្ចេញផេះមួយដុំដែលមានកម្ពស់ជាង ៨,០០០ ម៉ែត្រឡើងលើអាកាស នេះបើតាមទីភ្នាក់ងារឃ្លាំមើលភ្នំភ្លើងរបស់ប្រទេសឥណ្ឌូនេស៊ី បានឲ្យដឹង។
មន្ត្រីក្នុងតំបន់ បាននិយាយថា រហូតមកដល់ពេលនេះ មិនទាន់មានរបាយការណ៍អំពីអ្នកស្លាប់ និងរបួសទេ ហើយក៏មិនមានហានិភ័យនៃរលកយក្សស៊ូណាមិដែរ។
មជ្ឈមណ្ឌលសម្រាប់ការកាត់បន្ថយគ្រោះមហន្តរាយភ្នំភ្លើង និងភូគព្ភសាស្ត្រ និយាយថា ការផ្ទុះបានកើតឡើងនៅលើភ្នំ Lewotobi Laki-laki នៅលើកោះ Flores កាលពីថ្ងៃព្រហស្បតិ៍។ ការផ្ទុះនេះគឺជាការផ្ទុះលើកចុងក្រោយបង្អស់នៅលើភ្នំភ្លើងនេះតាំងពីថ្ងៃអាទិត្យមក។
សូមជម្រាបថា យ៉ាងហោចណាស់ មនុស្សជាង 10,000 នាក់រស់នៅក្នុងតំបន់ក្បែរភ្នំដែលផ្ទុះនោះ។ ការផ្ទុះដ៏ធំមួយកាលពីថ្ងៃអាទិត្យកន្លងទៅគឺបណ្តាលឲ្យ មនុស្ស 9 នាក់បានស្លាប់ ខណមនុស្សជាង 60 នាក់ផ្សេងទៀតបានរងរបួស និងជាង 4,000 នាក់ត្រូវបានបង្ខំឱ្យជម្លៀសចេញ។
អាជ្ញាធរក្នុងតំបន់បានបង្កើនស្ថានភាពប្រកាសអាសន្នដល់កម្រិតខ្ពស់បំផុត មុនពេលការផ្ទុះកាលពីថ្ងៃព្រហស្បតិ៍។ ពួកគេក៏បានបង្កើតតំបន់ហានិភ័យ ដោយមិនរាប់បញ្ចូលវិសាលដែលលាតសន្ធឹងចម្ងាយ ៧ គីឡូម៉ែត្រពីមាត់រណ្ដៅ។ ភ្នំភ្លើងនេះក៏បានផ្ទុះ កាលពីក្នុងខែមករាផងដែរ ដោយធ្វើឱ្យអ្នកស្រុកប្រហែល៦.៥០០នាក់ផ្លាស់ទីលំនៅ៕
