ខេត្តសៀមរាប៖ ជំនួបប្រឹក្សាយោបល់រវាង ឯកឧត្តមឧកញ៉ា សៀង ណាំ អ្នកតំណាងរាស្រ្តមណ្ឌលសៀមរាប ជាមួយយុវសិស្ស ក្រីក្រ ថ្នាក់ទី១២ នៃវិទ្យាល័យស្រុកវ៉ារិន ចំនួន១៣នាក់ ដែលទើបនឹងប្រឡងជាប់ យកសញ្ញាបត្រមធ្យមសិក្សា ទុតិយភូមិ ឆ្នាំសិក្សា២០១៤- ២០១៥កន្លងទៅនេះ បានផ្តោតទៅលើការពន្យល់ និងផ្តល់នូវគំនិតយោបល់ដល់ យុវសិស្សទាំងនោះ ត្រូវប្រើប្រាស់ពេលវេលាឲ្យបានត្រឹមត្រូវ ក្នុងជម្រើសចាប់យកមុខជំនាញរបស់ខ្លូន ដើម្បី បន្តការសិក្សានៅថ្នាក់ឧត្តមសិក្សាខាងមុខនេះ ! ឲ្យស្របទៅនឹងតម្រូវការជីវភាពជាក់ស្តែងរបស់ខ្លួន រួមផ្សំនឹង ទេព្យកោសលផងដែរ ។ ឯកឧត្តម បានសង្កត់ធ្ងន់ថា ការរៀបចំគម្រោងផែនការនៃសិក្សា គឺវាមានសារសំខាន់ ខ្លាំងណាស់ ក្នុងជំហានទី១ សម្រាប់ការឈោងចាប់អនាគត ឲ្យបានល្អប្រសើរ ។
គួរំលឹកថា នៅក្នុងសម័យប្រឡង សញ្ញាបត្រមធ្យមសិក្សាទុតិយភូមិឆ្នាំសិក្សា២០១៤-២០១៥នេះ សិស្សនៃវិទ្យាល័យស្រុកវ៉ារិន ដែលជាមូលដ្ឋានជនបទបំផុតនោះ មានសិស្សចំនួន៤១នាក់ ចុះឈ្មោះប្រឡង ។ នៅក្នុងចំណោមសិស្សទាំង៤១នាក់នោះ គឺអវត្តមានម្នាក់ ។ ជាលទ្ធផល សិស្សដែលបានចូលប្រឡងទាំង ៤០នាក់នោះ ប្រឡងទទួលបានជ័យលាភីទាំងអស់គ្នា ។
ផ្តើមចេញពីលក្ខណៈសម្បត្តិទាំងនេះហើយ ឯកឧត្តម បានបង្ករឱកាស បើកឲ្យមានជំនួបប្រឹក្សា និងលើកទឹកចិត្តដល់សិស្សប្រឡងជាប់ទាំង៤០នាក់នេះ ជាលើកទី១ នៅថ្ងៃទី០២ ខែកញ្ញាកន្លងទៅ ដោយសន្យាថា ជួយបង់ថ្លៃជំនួសឲ្យរៀនបន្ត ថ្នាក់ឧត្តមសិក្សា ផ្តល់ការងារធ្វើ មានប្រាក់ខែ១០០ដុល្លា និងផ្តល់កន្លែងស្នាក់នៅផងដែរ ចំនួន១០នាក់ ក្នុងចំណោម៤០នាក់នោះ ។
លុះព្រឹកថ្ងៃទី០៩ ខែតុលានេះ គឺជាពេលវេលានៃកិច្ចសន្យានោះ បានឈានមកដល់ សិស្សប្រុសចំនួន ១០នាក់ បន្ថែមដោយសិស្សនារីចំនួន៣នាក់ បានមកជួប ទទួលយកការប្រឹក្សាយោបល់ជាលើកទី២ ជុំវិញការ រៀបចំវិថីជីវិតសិក្សារបស់ក្មួយៗ នៅការដ្ឋានសំណង់ Woodern Angkor Resort សង្កាត់ស្រង៉ែ ក្រុងសៀមរាប ដែលជាទីតាំងការងាររបស់ក្មួយៗ ក្រោមការរៀបចំឲ្យ ដោយឯកឧត្តម សៀង ណាំ ។
ជាមួយនឹងការពន្យល់ ដែលត្រូវបានបង្ហាញអំពីស្ថានភាព នៃតម្រូវការទីផ្សាការងាររបស់ប្រទេសជាតិ ដែល កំពុងស្ថិតក្នុងដំណើរ នៃការអភិវឌ្ឍន៍នោះ យុវសិស្សទាំងនោះបានរកឃើញ នូវការរៀបចំវិថីជីវិតសិក្សារបស់ខ្លួន បាញ់ឆ្ពោះទៅរកជំនាញឱកាសការងារ ដូចជាឯកទេសវិស្វកម្មស៊ីវិលនិងសំណង់ ឯកទេសវិស្វកម្មអគ្គីសនី និងអេឡិចត្រូនិច ជាដើម ។ បើទោះជាយ៉ាងណា ឯកឧត្តម សៀង ណាំ បានក្រើនរំលឹកក្មួយៗទាំងនោះថា ជំនាញកុំព្យូទ័រ ( I.T ) និង ភាសាបរទេស មិនអាចមើលរំលងបាននោះឡើយ ។
អ្វីៗដែលយុវសិស្សទទួលបាននាពេលនោះ គឺសាកលវិទ្យាល័យ BBU សាខាខេត្តសៀមរាប ត្រូវបានជ្រើស រើស ជាថ្នាលបណ្តុះបណ្តាលរបស់ក្មួយៗទាំង១៣នាក់ ។ ការដ្ឋានសំណង់ Woodern Angkor Resort ជាទីតាំង បំរើការងារ ទទួលបានប្រាក់ខែ ១០០ ដុល្លា ។ យុវសិស្ស ១០នាក់ ទទួលបានរ៉ឺម៉កម៉ូតូ ម្នាក់១គ្រឿង សម្រាប់ រក កម្រៃក្រៅពីការងារនិងការរៀនសូត្រ ចំពោះសិស្សនារី ទទួលបានម៉ូតូម្នាក់១គ្រឿង សម្រាប់ប្រើប្រាស់ ផ្ទាល់ ខ្លួន ។ ឯកឧត្តម បានបញ្ជាក់ថា ក្មួយៗទាំងនេះ មានឆន្ទៈក្នុងការសិក្សាល្អ ដូច្នេះឯកឧត្តមចាត់ទុកជាកូនធម៌ ត្រូវមើលថែក្មួយៗទាំងអស់នេះ រហូតបញ្ចប់ការសិក្សា មានការងារធ្វើ ៕
ប៊ុនធឿន (សៀមរាប)
