ខេត្តសៀមរាប៖ គ្រួសារសព នៃសមាជិកសមាគមអតីតយុទ្ធជនកម្ពុជាខេត្តសៀមរាប ចំនួន ៥១នាក់ និង មុខសញ្ញា អតីតយុទ្ធជន ចំនួន ៦០០នាក់ ត្រូវបានទទួលប្រាក់បេឡាមរណៈសង្រ្គោះ ព្រមទាំងជួបជុំសំណេះសំណាល សួរសុខទុក្ខគ្នា ជាមួយអតីតយុទ្ធជន ជាជនពិការ និងមន្ត្រីរាជការ រដ្ឋបាលខេត្តសៀមរាប នៅក្នុងឱកាសបុណ្យភ្ជុំបិណ្ឌ ប្រពៃណីជាតិ ។
ឯកឧត្តមនាយឧត្តមសេនីយ៍ គន់ គីម អគ្គមេបញ្ជាការរង ជានាយសេនាធិការចម្រុះ នៃកងយោធពល ខេមរភូមិន្ទ អនុប្រធាន សមាគមអតីតយុទ្ធជនកម្ពុជា និង ជាលេខាធិការសមាគមអតីតយុទ្ធជនកម្ពុជា មានវត្ត មានចូលរួមក្នុងឱកាសនោះ នារសៀលថ្ងៃទី០៩ ខែតុលា ឆ្នាំ២០១៥ នៅសាលមហោស្រពស្នាមញញឹមអង្គរ ខេត្តសៀមរាប ។
តាមរបាយការណ៍ របស់សមាគមអតីតយុទ្ធជនកម្ពុជាខេត្តសៀមរាប បានឲ្យដឹងថា សមាជិកសមាគម អតីតយុទ្ធជនខេត្ត គិតមកត្រឹមខែឧសភា ឆ្នាំ២០១៥នេះ មានចំនួនសរុប ៦ពាន់៥៨៣នាក់ ។ ក្នុងរយៈពេល ០៨ឆ្នាំចុងក្រោយនោះ មានមរណជនសមាជិកសមាគម ចំនួន ២៨៦នាក់ ក្នុងនេះទទួលបាន ប្រាក់មរណៈ សង្រ្គោះ ចំនួន ១១៩នាក់ ហើយត្រូវអនុវត្តថវិកាបេឡា មរណៈសង្រ្គោះចំនួន ១៧៧នាក់ បន្តទៀត ។
ឯ.ឧ ឃឹម ប៊ុនសុង អភិបាលនៃគណៈអភិបាលខេត្ត និង ជាសមាជិកគណៈកម្មាធិការកណ្តាល សមាគមអតីតយុទ្ធជនកម្ពុជា បានបញ្ជាក់ថា យន្តការនេះគឺជាគោលដៅ លើកកម្ពស់ស្មារតីនៃក្តីសង្ឃឹម របស់ បងប្អូនអតីតយុទ្ធជន គ្រួសារពលីមរណៈពិការ និងសោវត្តន៍ជន ដែលបានលះបង់អ្វីៗគ្រប់យ៉ាង ក្នុងការបម្រើជាតិមាតុ ភូមិ កន្លងមក។ ឯកឧត្តមបានបញ្ជាក់ថា សមាគមអតីតយុទ្ធជនខេត្ត នឹងខិតខំអំពាវនាវដល់ថ្នាក់ដឹកនាំ សប្បុរសជននានាក្នុងខេត្ត ឲ្យចូលរួមបរិច្ចាកធនធាន ទៅតាមគោលការណ៍ស្ម័គ្រចិត្តរបស់ខ្លួន ដើម្បីចូលរួមចំណែក ដោះទុក្ខលំបាកដល់គ្រួសារពលីមរណៈ ។ ការផ្តល់ថវិកាមរណៈសង្រ្គោះថ្ងៃនេះ ដល់បងប្អូនគ្រួសាសព សមាជិកសមាគមអតីតយុទ្ធជនកម្ពុជា គឺស្របពេលដែលតម្រូវការចាំបាច់ របស់បងប្អូន យកទៅប្រើប្រាស់ ក្នុងឱកាសពេលបុណ្យភ្ជុំបិណ្ឌ ផងដែរ ។
ឯ.ឧ គន់ គីម បានបញ្ជាក់ថា ក្រោយមហាសន្និបាតសមាគមអតីតយុទ្ធជន សម្តេចតេជោ ហ៊ុន សែន នាយករដ្ឋមន្ត្រី និងជាប្រធានសមាគមអតីតយុទ្ធជនកម្ពុជា បានផ្តល់នូវកញ្ចប់ថវិកា បើកជូនដល់គ្រួសារសព សមាជិកសមាគមអតីតយុទ្ធជនកម្ពុជា នៅគ្រប់រាជធានី-ខេត្ត ។ ឯ.ឧ គន់ គឹម បានបង្ហាញថា សមាគមអតីតយុទ្ធជនកម្ពុជា ដែលបានបង្កើតឡើងនេះ គឺដើម្បីរួមគ្នាដោះស្រាយ ចែករំលែកទុក្ខលំបាកនៃ គ្រួសារអតីត យុទ្ធជនពលី-មរណៈ ដោយឥតរើសអើង ហើយបេឡាមរណៈសង្គ្រោះ របស់សមាគម គឺបានមកពីការចូលរួម របស់សមាជិក ។ សមាជិកណាដែលបានទទួលមរណៈភាព គឺ ទទួលបានប្រាក់មរណៈសង្រ្គោះម្នាក់៤លានរៀល ។
ជាមួយនឹងការប្រគល់ថវិកាបេឡាមរណសង្គ្រោះនោះ សម្រាប់ការជួបជុំសំណេះសំណាល ឱកាស បុណ្យភ្ជុំបិណ្ឌនោះដែរ ឯ.ឧ គន់ គីម , ឯ.ឧ ឃឹម ប៊ុន សុង និង ឯកឧត្តមឧកញ៉ា សៀង ណាំ តំណាង រាស្រ្តសៀមរាប ក្នុងនាមសម្តេចតេជោ ហ៊ុន សែន បានឧបត្ថម្ភអតីតយុទ្ធជនចំនួន៦០០នាក់ ដោយក្នុងម្នាក់ៗ ទទួលបានថវិកា ៥ម៉ឺនរៀល ។ ជនពិការជើង ពិការដៃ និង ពិការភ្នែក ត្រូវទទួលបានការឧបត្ថម្ភបន្ថែម ក្នុងម្នាក់ៗ ១០ម៉ឺនរៀល ៕
ប៊ុនធឿន (សៀមរាប)
