ក្រុងប៉ោយប៉ែត ៖ កម្លាំងនគបាលក្រុងប៉ោយប៉ែតបានឃាត់ខ្លួន ជនសង្ស័យចំនួន០៥នាក់ដែលជាមុខសញ្ញា និងប្រើប្រាស់គ្រឿងញៀន និងឃាត់បានបក្សពួកចំនួន៩នាក់ថែមទៀត នៅវេលាម៉ោង៤និង៣០នាទីព្រឹក ថ្ងៃទី៣១ ខែឧសភា ស្ថិតក្នុងភូមិបាលិលេយ្យ២ សង្កាត់ប៉ោយប៉ែត ក្រុងប៉ោយប៉ែត ។
លោកវរសេនីយ៍ត្រី អ៊ុំ សុផល អធិការក្រុងប៉ោយប៉ែត បានឲ្យដឹងថា ក្រោយពីសមត្ថកិច្ចឃាត់ខ្លួនជនសង្ស័យ៥នាក់កាលពីម្សិលមិញបានសារភាពថាខ្លួនមានបក្សពួកបន្ថែមទៀត ។ ក្រោយមកលោកបានបញ្ជាកម្លាំងដោយផ្ទាល់ដើម្បីទៅស្រាវជ្រាវរកមុខសញ្ញា និងឃាត់ខ្លួន បានជនសង្ស័យប្រុស ស្រី៩នាក់ថែមទៀត។
លោកអធិការបានបន្តថា ឃាត់ខ្លួនជនសង្ស័យបាន៩នាក់នេះ ទី១ឈ្មោះកែវ លីជេន ភេទប្រុស អាយុ១៨ឆ្នាំ សេពគ្រឿងញៀន ទី២ ឈ្មោះ ផាត វិចិត្រ ភេទប្រុស អាយុ១៩ឆ្នាំ សេពគ្រឿងញៀន ទី៣ ភាព គន្ធា ភេទស្រី អាយុ២២ឆ្នាំ សេពគ្រឿងញៀន ទី៤ ឈ្មោះ ទូច ស្រីពៅ ភេទស្រី អាយុ៣០ឆ្នាំ សេពគ្រឿងញៀន ទី៥ អ៊ាម ស៊ីផេង ភេទប្រុស អាយុ២០ឆ្នាំ សេពគ្រឿងញៀន ទី៦ ឈ្មោះ សុខ ជា ភេទប្រុស អាយុ២១ឆ្នាំ ចែកចាយគ្រឿងញៀន និងម្ចាស់ម៉ូតូ ម៉ាកស្គុបពី ទី៧
ឈ្មោះ ស៊ុន សៀង ភេទប្រុស អាយុ១៦ឆ្នាំ សេពគ្រឿងញៀន និងលួច ទី៨ឈ្មោះ សុខ ជាថា ភេទប្រុស អាយុ២០ឆ្នាំ សេពគ្រឿងញៀន និងលួច ទី៩ ឈ្មោះឃុន សុភាព ភេទប្រុស អាយុ២៦ឆ្នាំ សេពគ្រឿងញៀន និងលួច ជនសង្ស័យទាំងនេះរស់នៅក្នុងក្រុងប៉ោយប៉ែត បច្ចុប្បន្ន ត្រូវបានសមត្ថកិច្ចសាកសួរនាំនៅអធិការដ្ឋាននគរបាលក្រុងប៉ោយប៉ែត។
លោកវរសេនីយ៍ត្រី អ៊ុំ សុផល អធិការក្រុងប៉ោយប៉ែតបានបញ្ជាក់ថា ក្រុមជនសង្ស័យ ជាមុខសញ្ញាចោរលួចកាច់សោរ ក ម៉ូតូ និងប្រើប្រាស់ថ្នាំញៀន ទាំងអស់នេះ ក្រោយពីកម្លាំងសមត្ថកិច្ចរបស់លោកបានឃាត់ខ្លួនសួរនាំរួចមក ពួកគេបានឆ្លើយ សារភាពថា ខ្លួនពិតជាបានប្រព្រឹត្តល្មើសច្បាប់ពិតប្រាកដមែន។
បើយោងតាមចំលើយសារភាព របស់ជនសង្ស័យទាំង៩នាក់ខាងលើ និងរួមទាំងវត្ថុតាងមួយចំនួនផងនោះ ត្រូវបានសមត្ថកិច្ចកសាងសុំណុំរឿងបញ្ជូនទៅតុលាការ ចាត់ការតាមនិតិវិធីច្បាប់ ៕
