ខេត្តត្បូងឃ្មុំ ៖ ប្រជាពលរដ្ឋ បានឲ្យដឹង ថា សព្វថ្ងៃនៅច្រកដូង ៧ដើម មានទំនិញគេចពន្ធ ជាច្រើនប្រភេទ ដែលឈ្មួញធំៗនាំឆ្លងកាត់ គឺមន្ត្រីគយ របស់លោក យឹម វណ្ណៈ មេគយច្រកដូងដើម បានឃុបឃិត ជួយសំរបសំរួលជាមួយឈ្មួញ បង់ពន្ធទំនិញរបៀបជាទំនិញក្លែងភេទ និងបង់ពន្ធមិនគ្រប់ជាដើមដែលបង្ហាញពី
អំពើពុករលួយស៊ីជំរៅតាមជំនាញរបស់គយច្រកដូង៧ដើម។
តាមប្រភពឲ្យដឹងថា ពេលខ្លះឈ្មួញ ដឹកសុទ្ធតែថ្នាំពេទ្យ គ្រឿងសំណង់ និងទំនិញមានតម្លៃ តែគេរៀបចំបង់ពន្ធ ជារបៀបទំនិញចាប់ហួយ ឬតុ កៅអី ជ័រ ទៅវិញ ហើយការបង់ពន្ធ ក្លែងភេទទំនិញនេះ ក៏គេមិនបង់ទាំងស្រុង មិនគ្រប់ចំនួននោះដែរ យ៉ាងច្រើនគេបង់ ត្រឹមតែ ៤០ទៅ៥០ភាគរយប៉ុណ្ណោះ ដោយមានការឃុបឃិត
សំរបសំរួលរបស់គយ ធ្វើឲ្យរដ្ឋខាតបង់ ចំណូលថវិកាជាតិ យ៉ាងច្រើនសម្បើម ក្នុងមួយខែៗ ហើយប្រាក់បាត់បង់ទាំងនោះ ត្រូវធ្លាក់ទៅលើដៃលោក យឹម វណ្ណៈ យ៉ាងរំភើយ។
បន្ទាប់ពីពេលដែល លោក យឹម វណ្ណៈ ត្រូវបានប្រកាសតែងតាំង ជាប្រធានស្តីទី ការិយាល័យគយ និងរដ្ឋាករ ច្រកដូង ៧ដើម នៅឃុំដារ ស្រុកមេមត់ ខេត្តត្បូងឃ្មុំ គេសង្កេតឃើញ ឈ្មួញរកស៊ី តូចតាច រអ៊ូរទាំយ៉ាងខ្លាំង ដោយគយបង្ខំឲ្យបង់លុយ ដោយគ្មានការយោគយល់ ប៉ុន្តែសម្រាប់ក្រុមឈ្មួញធំៗ ដែលរកស៊ីនាំចូល ទំនិញគេចពន្ធ និងអ្នករកស៊ី ដឹកជញ្ជូនឈើខុសច្បាប់ ចេញទៅប្រទេសវៀតណាម តាមច្រកដូង៧ដើម ទទួលបានការយោគយល់ និងសំរបសំរួល ពីមេគយច្រក ព្រោះការដឹកជញ្ជូន បទល្មើសទាំងនោះ គឺជាប្រភពចំណូលដ៏មហាសាល ដែលលោក យឹម វណ្ណៈ ប្រមូលយកទៅធ្វើមានធ្វើបានផ្ទាល់ខ្លួនដោយមិនញញើតច្បាប់រដ្ឋ
និងច្បាប់ប្រឆាំងអំពើពុករលួយនោះឡើយ។
គេហទំពរ័យើង មិនអាចសុំការបំភ្លឺពីលោក យឹម វណ្ណៈ បានឡើយតែនឹងព្យាយាម សុំការពន្យល់ពី ករណីរងការចោទប្រកាន់ ប្រព្រិត្តអំពើពុករលួយខាងលើនេះ។
ទន្ទឹមនោះ ប្រជាពលរដ្ឋ ស្នើឲ្យលោក គុណ ញឹម ស្រាវជ្រាវករណី មិនប្រក្រតី របស់មេគយច្រកដូង៧ដើមផង៕
