ភ្នំពេញ ៖ ស្ថានទូតចិនប្រចាំកម្ពុជា និងរាជបណ្ឌិត្យសភាកម្ពុជា នាព្រឹកថ្ងៃទី២៣ ខែកញ្ញា ឆ្នាំ២០២៤ បានរៀបចំកិច្ចសន្ទនារវាងយុវជននៃឆ្នាំផ្លាស់ប្ដូររវាងប្រជាជនកម្ពុជា-ចិនឆ្នាំ២០២៤ ក្រោមប្រធានបទ “ កាន់ដៃធ្វើដំណើររួមគ្នា កសាងអនាគតរួមគ្នា” ។
ពិធីនេះត្រូវបានរៀបចំធ្វើទ្បើងនៅរាជបណ្ឌិត្យសភាកម្ពុជាក្រោមអធិបតីភាពឯកឧត្តមឧបនាយករដ្ឋមន្ត្រីហ៊ុន ម៉ានី រដ្ឋមន្ត្រីក្រសួងមុខងារសាធារណៈ និងជាប្រធានសហភាពសហព័ន្ធយុវជនកម្ពុជា និងឯកឧត្តម វ៉ាង វិនពីន ឯកអគ្គរដ្ឋទូត នៃសាធារណរដ្ឋប្រជាមានិតចិនប្រចាំនៅព្រះរាជាណាចក្រកម្ពុជា ។
ក្នុងឱកាសនោះ ឯកឧត្តមបណ្ឌិត្យសភាចារ្យ សុខ ទូច ប្រធានរាជបណ្ឌិត្យសភាកម្ពុជាបានមានប្រសាសន៍ថា យុវជន គឺជាសសរទ្រូង ជាឆ្អឹងខ្នង ជាចលករសម្រាប់រុញនាវាកម្ពុជា-ចិនឱ្យទៅមុខ។ ដូច្នេះហើយយុវជន ត្រូវតែខិតខំរៀនទាំងប្រវត្តិសាស្ត្រ វប្បធម៌ ភាសា រវាងប្រទេសទាំងពីរឱ្យបានស៊ីជម្រៅដើម្បីបង្កើនចំណងមិត្តភាពកម្ពុជា-ចិនឱ្យកាន់តែរឹងមាំថែមទៀត។
ឯកឧត្តម វ៉ាង វិនពីន ឯកអគ្គរដ្ឋទូត នៃសាធារណរដ្ឋប្រជាមានិតចិនប្រចាំកម្ពុជា មានប្រសាសន៍ថា កម្ពុជា-ចិនជាមិត្តដែកថែប ហើយទំនាក់ទំនងរវាងប្រទេសយើងទាំងពីរ ត្រូវបានពង្រឹងពង្រីកជាលំដាប់។ ដូច្នេះយុវជនជំនាន់ក្រោយត្រូវស្វែងយល់ពីគ្នា សហការគ្នា ចូលរួមសកម្មភាពផ្សេងៗជាមួយគ្នាឱ្យបានច្រើនដើម្បីនាំមកនូវផលប្រយោជន៍សម្រាប់ប្រទេសយើងទាំងពីរ។
ឯកឧត្តមឧបនាយករដ្ឋមន្ត្រី ហ៊ុន ម៉ានី ប្រធានសហភាព សហព័ន្ធយុវជនកម្ពុជាមានប្រសាសន៍ថា យុវជនត្រូវស្វែងយល់ឱ្យបានច្បាស់នូវប្រវត្តិ នៃទំនាក់ទំនងកម្ពុជា-ចិន ហើយត្រូវដឹងពីអត្ថប្រយោជន៍ពិតប្រាកដរបស់ប្រទេសទាំងពីរ ហើយចូលរួមជាមួយគ្នាតាមរយៈវេទិកាកម្ពុជា-ចិនឱ្យកាន់តែជិតស្និទ្ធ ព្រមទាំងផ្សព្វផ្សាយពីគ្នាឱ្យបានទូលំទូលាយ។
ឯកឧត្តមឧបនាយករដ្ឋមន្ត្រីមានប្រសាសន៍ថា “ ទំនាក់ទំនងកម្ពុជា-ចិនមកដល់ថ្ងៃនេះ បានផ្តល់ឱកាសដល់កម្ពុជាយើងឱ្យមានភាពរឹងមាំ មានឯករាជ្យ អធិបតេយ្យ ភាពហើយម្ចាស់ការក្នុងការអភិវឌ្ឍ ខណដែលមិត្តចិនមិនបានមកណែនាំយើងថាធ្វើយ៉ាងម៉ិចនោះទេ ប៉ុន្តែមិត្តចិនបានស្វែងយល់ពីយើង ហើយជួយគ្នា”។ ឯកឧត្តមសង្ឃឹមថា “ យុវជនជាអ្នកបន្តវេន នឹងបន្តថែរក្សា ពង្រឹងពង្រីក នូវទំនាក់ទំនងប្រទេសយើងទាំងពីរដូចអ្វីដែលសម្តេចតា និងសម្តេចតេជោចាប់ផ្តើម ហើយដូចអ្វី ដែលសម្តេចធិបតីកំពុងតែអនុវត្តន៍។ ដូច្នេះ យើងទាំងអស់គ្នាត្រូវបន្តចូលរួមថែរក្សាចំណងមិត្តភាពកម្ពុជា ចិននេះឱ្យបានគង់វង្ស”។
សូមជម្រាបថា យុវជនកម្ពុជាចំនួន ៣ រូបដែលបានចូលរួមកម្មវិធីនេះ គឺកញ្ញា ធូន ស្រីពៅ កញ្ញា ជាម ហ្គិចឈុង និងកញ្ញាយូ គឹមសេងបានវាយតម្លៃខ្ពស់ហើយចាត់ទុកវេទិកានោះថា មានប្រយោជន៍ច្រើនណាស់ ដូចជាការទទួលបានចំណេះដឹងស្តីពីចំណងមិត្តភាពរវាងកម្ពុជា-ចិន។
ពួកគេលើកទ្បើងថា “ពេលខ្ញុំបានស្តាប់វាគ្មិនធ្វើឱ្យខ្ញុំមានការអភិវឌ្ឍន៏ខ្លួនឯង និងបណ្តុះគំនិតជួយប្រទេសយើងឱ្យកាន់តែមានភាពរីកចម្រើនថែមទៀត”។ ពួកគេបន្តថា “ ខ្ញុំពិតជាសប្បាយរីករាយមែនទែន ដោយយើងបានដឹងកាន់តែស៊ីជម្រៅពីទំនាក់ទំនងរវាងកម្ពុជា-ចិន។ ខ្ញុំដឹងហើយថា យើងជាយុវជនត្រូវត្រៀមខ្លួនបែបណា? ដើម្បីធ្វើឱ្យចំណងមិត្តភាពប្រទេសយើងទាំងពីរហ្នឹងបានរឹងមាំស្ថិតស្ថេរ”។ ពួកគេបន្ថែមថា “ចំពោះកម្មវិធីថ្ងៃនេះ ពិតជាមានអត្ថប្រយោជន៍មែនទែន ជាពិសេសសម្រាប់សិស្សនិស្សិតតែម្តង”។
សូមបញ្ជាក់ថា ប្រទេសចិននិងកម្ពុជាចាប់ផ្តើមមានទំនាក់ទំនងការទូតជាផ្លូវការ នៅថ្ងៃទី១៩ ខែកក្កដា ឆ្នាំ១៩៥៨។ មិត្តភាពជាប្រពៃណីរវាងប្រទេសយើងទាំងពីរ ត្រូវបានត្រួសត្រាយដោយថ្នាក់ដឹកនាំជំនាន់មុន និងថ្នាក់ថ្នមថែរក្សាយ៉ាងយកចិត្តទុកដាក់ដោយថ្នាក់ដឹកនាំជំនាន់ក្រោយៗ។ បច្ចុប្បន្ននេះ ភាគីទាំងពីរមានកិច្ចសហប្រតិបត្តិការយ៉ាងជិតស្និទ្ធជាមួយគ្នា លើគ្រប់វិស័យដូចជា ផ្នែកនយោបាយ សេដ្ឋកិច្ច ពាណិជ្ជកម្ម វប្បធម៌មនុស្សជាតិ ព្រមទាំងកិច្ចការក្នុងតំបន់និងអន្តរជាតិ៕
