អង្គសិក្ខាសាលារយៈពេល២ថ្ងៃ បានផ្តល់ឱកាសជូនសវនករ ទទួលបាននូវបទពិសោធន៍ និង ជំនាញ សវនកម្មមួយថ្មីទៀតដើម្បីឆ្លើយតបទៅនឹងតម្រូវការ
នៃសកម្មភាពស្នូល របស់តំណាក់កាលទី៣ នៃកំណែ ទម្រង់ ការគ្រប់គ្រងហិរញ្ញវត្ថុសាធារណៈ នោះគឺការផ្សារភ្ជាប់ថវិកាទៅនឹងគោលនយោបាយ ដែលកម្មវិធីនេះ នឹងត្រូវបានដាក់ឲ្យអនុវត្ត នៅដើមឆ្នាំ២០១៦ ខាងមុខ នៅតាមបណ្តាក្រសួង-ស្ថាប័នរបស់រដ្ឋ ។
ឯកឧត្តម ជា វុធណា អគ្គនាយក នៃ អគ្គនាយកដ្ឋានសវនកម្មផ្ទៃក្នុងនៃក្រសួងសេដ្ឋកិច្ចនិងហិរញ្ញវត្ថុ បានថ្លែងបើកអង្គសិក្ខាសាលានេះ នាព្រឹកថ្ងៃទី០៦ ខែតុលា នៅអេមព្រីសអង្គរ-ក្រុងសៀមរាប ដោយបាន បញ្ចាក់យ៉ាងដូច្នេះថា សិក្ខាសាលានេះ គឺជាលើកទី១២ហើយ ក្នុងរយៈពេល១០ឆ្នាំ នៃអត្ថិភាពរបស់ខ្លួន ដើម្បីពង្រឹងសវនកម្មផ្ទៃក្នុង ដែលក្នុងនោះត្រូវបានឆ្លងកាត់នីតិវិធីគ្រប់ជំហាននៃវដ្តសវនកម្មផ្ទៃក្នុងទូទៅ រួមជាមួយបច្ចេកទេសលម្អិតមួយចំនួន សម្រាប់គាំទ្រការអនុវត្តសវនកម្ម ឲ្យកាន់តែមានលក្ខណៈជំនាញ ប្រសើរឡើង ។ កិច្ចដំណើការនៃអង្គសិក្ខាសាលានេះ មានការចូលរួមដោយមន្រ្តីមកពីក្រសួង ស្ថាប័ន និងសហគ្រាសសាធារណៈចំនួន ៤៨ ។
ឯកឧត្តម ងី តាយី រដ្ឋលេខាធិការក្រសួងសេដ្ឋកិច្ចនិងហិរញ្ញវត្ថុ បានលើកឡើងថា អត្ថិភាពនៃការរីក ចម្រើន វាពិតជាពុំអាចសម្រេចបាននោះទេ បើគ្មានការផ្លស់ប្តូរទៅរកគុណភាពថ្មីជាប្រចាំនោះ ។ ឯកឧត្តមបានបញ្ជាក់ថា ៖ អត្ថន័យទស្សនវិជ្ជាប្រកបដោយតក្កៈនេះ បានឆ្លុះបញ្ចាំងយ៉ាងច្បាស់តាម រយៈនៃប្រសាសន៍ របស់សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ដែលបានលើកឡើងថា ( ការកែទម្រង់គឺរស់ មិនកែទម្រង់គឺស្លាប់ ) ។
ឯកឧត្តម គូសបញ្ចាក់ដែរថា ស្របតាមទស្សនវិជ្ជាមូលដ្ឋាននេះ រាជរដ្ឋាភិបាលកម្ពុជា ដែលមានក្រសួង សេដ្ឋកិច្ចនិងហិរញ្ញវត្ថុ ជាសេនាធិការ បានដាក់ចេញនូវកំណែរទម្រង់ ការគ្រប់គ្រងហិរញ្ញវត្ថុសាធារណៈ ជា៤ តំណាក់កាល គឺទី១ ភាពជឿជាក់បាន នៃថវិកា ទី២ ការធើ្វឲ្យប្រសើរឡើង គណនេយ្យភាពហិរញ្ញវត្ថុ ទី៣ ការផ្សារភ្ជាប់ថវិកា ទៅនឹងគោលនយោបាយ និងតំណាក់កាលទី៤ គឺ គណនេយ្យភាពសមិទ្ធកម្ម ។ ទាំងនេះ គឺដើម្បីចាកចេញពីគុណភាពគ្រប់គ្រងចាស់ ឆ្ពោះទៅរកស្តង់ដារនៃការគ្រប់គ្រងមួយថ្មី ប្រកបដោយគុណភាព ខ្ពស់ជាង និង រឹងមាំជាង ហើយដែលគ្រោងនឹងសម្រេចឲ្យបាន នៅឆ្នាំ២០១៥ ខាងមុខ ៕
ប៊ុនធឿន (សៀមរាប)
