ការបង្កើត រដ្ឋបាលប្រមូលផ្តុំ គឺជាការងាយស្រួល ក្នុងការផ្តល់សេវាសាធារណៈ

ខេត្តសៀមរាប៖ក្នុងឱកាសដែលសម្តេចក្រឡាហោម ស ខេង នាយករដ្ឋមន្ត្រីស្តីទី បានអញ្ជើញជាអធិបតីដ៏ខ្ពង់ខ្ពស់ ក្នុងពិធី ប្រគល់សញ្ញាបត្រថ្នាក់បរិញ្ញាបត្រ និងបរិញ្ញាបត្រថ្នាក់ជាន់ខ្ពស់ជូនដល់និសិ្សតជ័យលាភីនៃសាកលវិទ្យាល័យសៅស៍ អ៊ីសថ៍អេយសៀ ខេត្តសៀមរាប កាលពីថ្ងៃទី២៨ ខែ កញ្ញា ឆ្នាំ២០១៥ សម្តេចក្រឡាហោម បានបន្តអញ្ជើញចុះត្រួត ពិនិត្យការដ្ឋានសាងសង់សំណង់មន្ទីររដ្ឋបាលទាំង២៦ នៃរដ្ឋបាលខេត្តសៀមរាប ។

តាមការបញ្ជាក់របស់ឯ.ឧ ឃឹម ប៊ុនសុង បានឲ្យដឹងថា សំណង់អគាររដ្ឋបាលទាំង២៦មន្ទីរនេះសាងសង់បាន ៥២% មានមន្ទីរ មួយចំនួន ត្រូវបានរៀបចំកែសម្រួល ឲ្យត្រូវទៅ តាមស្តង់ដាបច្ចេកទេសទៅនឹងតម្រូវការរបស់សាមី អង្គភាពនោះ ហើយត្រូវបានគណៈកម្មការត្រួតពិនិត្យ និង វាយតម្លៃលើគម្រោងការងារសាងសង់ នៃសំណង់អគារនៃមន្ទីរ ជំនាញទាំង២៦របស់រដ្ឋបាលខេត្តសៀមរាបនេះ ។

ទីតាំងស្ថិតនៅជិតទីប្រជុំជន ធ្វើឲ្យមន្ត្រីរាជការធ្វើដំណើរ ទៅ មកបម្រើការងារមានភាពងាយស្រួលក្នុងការទំនាក់ទំនងគ្នា ព្រោះជាការប្រមូលផ្តុំ របស់ថ្នាក់ដឹកនាំគ្រប់ស្ថាប័នមន្ទីរអង្គភាពផងដែរ ។

មានប្រសាសន៍នោះដែរសម្តេចក្រឡាហោម ស ខេង បានលើកឡើងថា ការរៀបចំរដ្ឋបាលប្រមូលផ្តុំនេះ ឡើង គឺជាភាពងាយស្រួល ក្នុងការដឹកនាំលើការដោះស្រាយនូវរាល់បញ្ហាផ្សេងៗ ដែលកើតឡើង បានទាន់ពេល វេលា ។ ក្នុងនោះដែរសម្តេចក្រឡាហោម ក៏បានបញ្ជាក់ឲ្យដឹងផងដែរ អំពីរបៀបរបបបំពេញការងាររដ្ឋបាលនៅ តាមបណ្តា ប្រទេសជឿនលឿនលើសកលលោក ដែលមានលក្ខណៈប្រហាក់ប្រហែល ក្នុងការកែទម្រង់រដ្ឋបាល នៅកម្ពុជា ។ ម៉្យាងទៀតការរៀបចំរដ្ឋបាលប្រមូលផ្តុំនេះឡើងនៅខេត្តសៀមរាប គឺជាគំរូមួយដ៏ល្អសម្រាប់បណ្តា ខេត្តនានាមួយចំនួន ដើមី្បក្នុងការបម្រើសេវាសាធារណៈ ជូនដល់ប្រជាពលរដ្ឋ ឲ្យមានភាពងាយស្រួល និង កាត់ បន្ថយនូវពេលវេលាក្នុង ការមកធ្វើទំនាក់ទំនងទៀតផង ។

សម្តេចក្រឡាហោម ស ខេង បានគូសបញ្ជាក់ថា ការប្រមូលផ្តុំគ្នាធ្វើការងារនេះ ធ្វើឲ្យកិច្ចការងាររដ្ឋបាលយើងខ្លាំង នោះគឺជាការប្រសើរបំផុត ។ ក្នុងនោះដែរសម្តេចក្រឡាហោម ក៏ បានធ្វើការណែ នាំដល់ធានក្រុមហ៊ុន សាងសង់សំណង់ ត្រូវធ្វើយ៉ាងណាឲ្យអគារសំណង់យើងនេះ ឲ្យត្រឹម ត្រូវទៅតាមស្តង់ដា បច្ចេកទេស និង ធានាបាននូវគុណភាព ប្រើប្រាស់បានយូរអង្វែង ។ ម៉្យាងទៀតលក្ខណៈដ៏ សំខាន់នោះ ក្រុមហ៊ុន និង ក្រុមវិស្វករសំណង់ ត្រូវយកចិត្តទុកដាក់ខ្ពស់ លើការសាងសង់ឲ្យត្រូវតាមនូវរចនាបទដ្ឋានជាលក្ខណៈរបស់ខ្មែរ ព្រោះខេត្តសៀមរាប ជាជង្រុកនៃសម្បត្តិវប្បធម៌ អរីយធម៌ជាតិខ្មែរ ហើយបានកំពុងទាក់ទាញនូវអារម្មណ៍ភ្ញៀវ ទេសចរណ៍ ចូលមកទស្សនាកម្សាន្តមកពីគ្រប់មជ្ឈដ្ឋាននៅលើពិភពលោក ៕

ប៊ុនធឿន ( សៀមរាប )