ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ នៅថ្ងៃទី១៧ ខែកក្កដា ឆ្នាំ២០២៤នេះ បានអញ្ជើញចុះពិនិត្យផ្ទាល់នៅតំបន់ប្រតិបត្តិការរុករក ឧទ្ធម្ភាគចក្រ ដែលបានបាត់ការទាក់ទងនៅតំបន់ជួរភ្នំក្រវាញ ពេលកំពុងហ្វឹកហ្វឺន។ដោយឡែកអ្នកនាំពាក្យក្រសួងការពារបានបញ្ជាក់ថា ការរុករកកំពុងបន្ត បើទោះបីជាអាកាសធាតុតំបន់នោះកំពុងបង្កការលំបាកយ៉ាងណាក៏ដោយ។
ប្រភពព័ត៌មានបញ្ជាក់ថា វត្តមានឯកឧត្តមនាយឧត្តមសេនីយ៍ ទៀ សីហា ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិនេះទៅកាន់តំបន់ប្រតិបត្តិការនេះ ខណៈថ្ងៃនេះ ជាថ្ងៃទី៥ហើយសម្រាប់ប្រតិបត្តិការស្វែងរកឧទ្ធម្ភាគចក្រ ដែលបានបាត់ដំណឹងតាំងពីល្ងាចថ្ងៃទី១២ ខែកក្កដា ហើយការស្វែងរកពុំទាន់ឃើញនៅឡើយ ។
ដោយឡែកឯកឧត្តមនាយឧត្តមសេនីយ៍ ឈុំ សុជាតិ អ្នកនាំពាក្យក្រសួងក្រសួងការពារបានបញ្ជាក់លើទំព័រហ្វេសប៊ុកផ្លូវការរបស់ក្រសួងការពារជាតិថា នៅព្រឹកថ្ងៃពុធទី១៧ ខែកក្កដានេះ កម្លាំងចម្រុះនៃកងយោធពលខេមរភូមិន្ទ កំពុងបន្តបេសកកម្មយ៉ាងសកម្មក្នុងការរុករកឧទ្ធម្ភាគចក្រ ដែលបានបាត់ការទាក់ទងនៅតំបន់ជួរភ្នំក្រវាញ ទោះបីជាអាកាសធាតុតំបន់នោះ កំពុងបង្កការលំបាកយ៉ាងណាក៏ដោយ។ នេះជាថ្ងៃទី៥ហើយ សម្រាប់ប្រតិបត្តិការស្វែងរកឧទ្ធម្ភាគចក្រ មួយគ្រឿង ដែលបានបាត់ដំណឹង តាំងពីល្ងាចថ្ងៃទី១២ ខែកក្កដា ។
សូមជម្រាបថា កាលពីថ្ងៃទី១២ ខែកក្កដា ឧទ្ធម្ភាគចក្រមួយគ្រឿងក្នុងពេលកំពុងហាត់ហ្វឹកហ្វឺន បានបាត់បង់ការទាក់ទងជាមួយទីបញ្ជាការទ័ពអាកាស នៅក្នុងភូមិសាស្ត្រជួរភ្នំក្រវាញ ស្ថិតក្នុងខេត្តពោធិ៍សាត់និងខេត្តកោះកុង ។ឧបទ្ទវហេតុនេះ បណ្តាលមកពីដោយសារអាកាសធាតុមិនអំណោយផល ។
ក្រោយហេតុការណ៍នេះនាយឧត្តមសេនីយ៍ម៉ឹង សំផន រដ្ឋលេខាធិការក្រសួងការពារជាតិនិងជាប្រធានគណ:កម្មការជួយសង្គ្រោះមហន្តរាយក្រសួងការពារជាតិនៅម៉ោង៥ទៀបភ្លឺថ្ងៃទី១៣ខែកក្កដា បានចុះត្រួតពិនិត្យនិងចាត់តាំងបញ្ជូនកម្លាំងកងពលតូចដឹកជញ្ជូនលេខ៩៩និងកងពលតូចលេខ៧០ ដើម្បីចេញទៅរុករកឧទ្ធម្ភាគចក្រមួយគ្រឿងដែលបានបាត់កាលពីថ្ងៃទី១២ខែកក្កដា នៅក្នុងភូមិសាស្ត្រស្រុកវាលវែង ខេត្តពោធិសាត់ ។
គួរជម្រាបថា យោងតាមលិខិតស្តីពីផែនការហោះហើររបស់កងទ័ពអាកាសកម្ពុជាលេខ៤១៧/២៤ ចុះថ្ងៃទី១៣ខែកក្កដា ៘បានឱ្យដឹងថា ឧទ្ធម្ភាគចក្រដែលបាត់ពីការទាក់ទងពេលហោះហើរនេះម៉ាកZ-9 លេខMH912 ត្រូវហ្វឹកហ្វឺនផ្លូវឆ្ងាយ : ភ្នំពេញ-ថ្មដា-ពោធិសាត់-ភ្នំពេញ ។ដោយចេញដំណើរពីថ្ងៃទី១២ខែកក្កដា ម៉ោង១១:០០នាទីព្រឹកនិងមកដល់វិញនៅម៉ោង១៤និង០០ នាទីថ្ងៃដដែល ។លើឧទ្ធម្ភាគចក្រមានលោក ស៊ុន ផ្លា ជាប្រធានក្រុមនិងលោកខេង ឆៃយុទ្ធ ជាអាកាសយានិក …៕ប្រភពអាកាប៉េ