ស្នងការដ្ឋាន នគរបាលខេត្តសៀមរាប បំពាក់ឯកសណ្ឋាន ប្រកាសទទួលស្គាល ប្រជាការពារស្ម័គ្រចិត្ត របស់ឃុំកណ្តែក ស្រុកប្រាសាទបាគង

ខេត្តសៀមរាប៖ ប្រជាពលរដ្ឋឃុំសណ្តែក ស្រុកប្រាសាទបាគង ចំនួន៦០នាក់ ដែលបានស្ម័គ្រចិត្តចូលបំរើ ជាកងរក្សា សន្តិសុខប្រចាំមូលដ្ឋានឃុំរបស់ខ្លួន ដែលគេហៅឈ្មោះថា ប្រជាការពារនោះ ត្រូវបានឧត្តមសេនីយ៍ទោ សត ណាឌី ស្នងការនៃស្នងការដ្ឋាននគរបាលខេត្តសៀមរាប អញ្ជើញចូលរួមក្នុងពិធីប្រកាសទទួលស្គាល់ និងបំពាក់ឯកសណ្ឋាន នាព្រឹកថ្ងៃទី២៥ ខែកញ្ញានេះ សាលាឃុំកណ្តែក ។

​ លោក ខាំ លឿ ប្រធានក្រុមប្រឹក្សាឃុំកណ្តែក បានលើកឡើងថា សម្រាប់ថ្ងៃនេះ គឺជាលទ្ធផលនៃការ ព្យាយាមរបស់ក្រុមប្រឹក្សាឃុំ ដែលបានខិតខំ បំពេញតួនាទី និងយកចិត្តទុកដាក់ ស្វែងរកទុនបន្ថែម ដើម្បីធ្វើ ឲ្យការអនុវត្តគោលនយោបាយភូមិឃុំមានសុវត្តិភាព ឲ្យកាន់តែមានប្រសិទ្ធិភាពថែមទៀត ។ ជាមួយគ្នានោះ ដែរលោកក៏បានថ្លែងនូវការកោតសរសើរដោយស្មោះចំពោះប្រជាការពារស្ម័គ្រចិត្តទាំង៦០រូប ដែលបានលះ បង់សេចក្តីសុខផ្ទាល់ខ្លួន បំរើ ការពារសន្តិសុខ សុវត្តិភាព ក្នុងមូលដ្ឋាន រួមចំណែកជាមួយអាជ្ញាធរដែនដី សហការជាមួយកម្លាំងប៉ុស្ថិនគរបាលរដ្ឋបាល ដើម្បីការសេចក្តីសុខសាន្តជូនប្រជាពលរដ្ឋ ។ លោកក៏បានសម្តែងនូវអំណរគុណផងដែរ ចំពោះភរិយា និងក្រុមគ្រួសារនៃកងប្រជាការពារស័្មគ្រចិត្តទាំងអស់ ដែលបានគាំទ្រ និងបង្កឱកាសឲ្យស្វាមី បានបំពេញកាតព្វកិច្ចជាពលរដ្ឋរដ្ឋល្អ ដែលទាំងអស់នេះ គឺជាធនធានមនសិកា ដ៏មានតម្លៃបំផុត ។

​​​​ ​​ឧត្តមសេនីយ៍ទោ សត ណាឌី ស្នងការនៃស្នងការដ្ឋាននគរបាលខេត្តសៀមរាប បានថ្លែងថា ការពិតជា ប្រការដែលប្រសើរបំផុត ដែលឃុំកណ្តែក អនុវត្តន៍បាននូវគោលការណ៍ពង្រឹងសន្តិសុខ សុវត្តិភាព នៅក្នុង មូលដ្ឋានរបស់ខ្លួន ជាមួយនឹងការខិតខំប្រឹងប្រែងរៀបចំឲ្យមានកងប្រជាការពារស្ម័គ្រចិត្តនេះ ។ ឯកឧត្តម បានលើកឡើងថា វាពិតជា មិនអាចស្វែងរកឃើញនោះទេ នូវការរីកចំរើនមួយ ឲ្យស្ថិតនៅក្នុងភាពអវិជ្ជមាន នៃសន្តិសុខសង្គម ឬក៏អាចនិយាយបានថា អសន្តិសុខ គឺជាសត្រូវនៃវឌ្ឍនភាព ។

ជាមួយនឹងការកើតចេញនៃកម្លាំងប្រជាការពារស័្មគ្រចិត្តនេះ ឧត្តមសេនីយ៍ទោស្នងការ ( សត ណាឌី ) បានលើកបង្ហាញថា ថ្វីត្បិតកម្លាំងប្រជាការពារ មិនមែនជាកម្លាំងជំនាញ ហើយកើតចេញពីការស័្មគ្រចិត្ត នៃ ប្រជាពលរដ្ឋ តែម្លាំងប្រជាការពារគឺស្នូលរបស់ម្លាំងសមត្ថកិច្ចជំនាញ ពួកគាត់គឺជាកត្តាជោគជ័យ និងជាស្នូល នៃប្រតិបត្តិការរក្សាសន្តិសុខក្នុងមូលដ្ឋាន ក្នុងនោះគោលនយោបាយភូមិឃុំមានសុវត្តិភាព គឺជាត្រីវិស័យ ។ ជាមួយឱកាសនោះដែរ ឧត្តមសេនីយ៍ទោ សត ណាឌី បានជម្រុញឲ្យអាជ្ញាធរស្រុក ពិនិត្យមើលលទ្ធភាព នៃបណ្តាឃុំដទៃទៀត នឹងនាំយកបទពិសោធន៍ នៃការរៀបចំកម្លាំងប្រជាការពាររបស់ឃុំកណ្តែក ដើម្បីអនុវត្ត ឲ្យបានជោគជ័យ ធានាបានថា នៅគ្រប់បណ្តាឃុំទូទាំងស្រុក មានវត្តមានប្រជាការពារ បំពេញតួនាទី ជាស្នូល នៃសន្តិសុខមូលដ្ឋានរបស់ខ្លួន ។ ឯកឧត្តម ក៏បានថ្លែងនូវការអរគុណផងដែរ ចំពោះលោក ខាំ លឿ មេឃុំ កណ្តែក ដែលបានផ្តល់ការឧបត្ថម្ភ នូវគ្រឿងបំពាក់ឯកសណ្ឋាន សម្រាប់ការរៀបចំបង្កើតកងកម្លាំង ប្រជាការពារមូលដ្ឋាននេះ រួមមាន សម្លៀកបំពាក់ មួក អាវភ្លៀង ពិល និងវិទ្យុទាក់ទង ជាដើម សម្រាប់ចេញប្រតិបត្តិការណ៍ ៕
ប៊ុនធឿន ( សៀមរាប )