រាជធានីភ្នំពេញ ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានថ្លែងថា ប្រទេសខ្លះគេហាមមិនឱ្យនាំរថយន្តចាស់ចូល ដើម្បីលើកស្ទួយឧស្សាហកម្មរថយន្តក្នុងស្រុក តែយើងមិនចាំបាច់ទេ យើងលើកទឹកចិត្តចំពោះឧស្សាហកម្មតម្លើងរថយន្តនៅប្រទេសរបស់យើង ក៏ប៉ុន្តែត្រូវមានការប្រកួតប្រជែងជាមួយនឹងរថយន្តនាំចូល ជាពិសេសរថយន្តមួយទឹក ដោយត្រូវធានាថារថយន្តថ្មីដែលតម្លើងក្នុងស្រុកមានតម្លៃសមរម្យ និងមានគុណភាពនោះ គឺប្រជាជននឹងទិញប្រើប្រាស់ហើយ ខណៈដែលរាជរដ្ឋាភិបាលកំពុងចង់បានរថយន្តដែលល្អ និងមានតម្លៃកាន់តែធូរថ្លៃ ដើម្បីឱ្យបងប្អូនប្រជាពលរដ្ឋរបស់យើងអាចមានលទ្ធភាពទិញជិះឱ្យបានកាន់តែច្រើន។
ក្នុងឱកាសអញ្ជើញជាអធិបតីក្នុងពិធី “បើកការដ្ឋានស្ថាបនា ស្ពានអាកាសភ្លោះ តាមបណ្តោយមហាវិថីសម្តេចតេជោ ហ៊ុន សែន ប្រសព្វជាមួយនិងផ្លូវជាតិលេខ ២ ស្ថិតនៅព្រំប្រទល់រវាងរាជធានីភ្នំពេញ និងខេត្តកណ្តាល” នាព្រឹកថ្ងៃទី១៧ ខែមិថុនា ឆ្នាំ២០២៤នេះ សម្តេចធិបតីនាយករដ្ឋមន្ត្រី បានបញ្ជាក់ថា កម្ពុជាគឺមិនទាន់ឈានទៅដល់ការកំណត់ថា គ្រួសារមួយត្រូវតែមានឡានត្រឹមតែប៉ុន្មានគ្រឿងនោះទេ។
សម្តេចធិបតីនាយករដ្ឋមន្ត្រីបានបន្តថា រាជរដ្ឋាភិបាលកំពុងតែខិតខំក្នុងការដោះស្រាយបញ្ហាផ្លូវគមនាគមន៍ឱ្យបានល្អប្រសើរជូនប្រជាពលរដ្ឋ ដោយសម្តេចបានលើកឡើងថា ទាំងឡាន ទាំងម៉ូតូ ប្រសិនបើបងប្អូនមានលទ្ធភាព ចង់ទិញប៉ុន្មានក៏ទិញទៅដោយរដ្ឋគឺជាអ្នកដោះស្រាយផ្លូវគមនាគមន៍ ដើម្បីឱ្យប្រជាពលរដ្ឋបានរស់នៅក្នុងសន្តិភាពទាំងផ្លូវកាយ ទាំងផ្លូវចិត្ត ដែលយើងត្រូវតែធានាឱ្យបានជាដាច់ខាតនូវសុខសន្តិភាព កុំឱ្យផ្ទុះសង្គ្រាមឡើងវិញ៕ប្រភពអាកាប៉េ
