ខេត្តបន្ទាយមានជ័យ ៖ សមត្ថកិច្ចចម្រុះ បានចុះចាប់រថយន្ត១គ្រឿងបង្កប់សាច់បង្កកចំរុះ ដែលមានសារធាតុ គីមី ចំនួនជាង១តោន។ ការបង្ក្រាបសាច់បង្កកនេះធ្វើទ្បើងនាវេលាម៉ោង ៥ល្ងាច ថ្ងៃទី ១៥ ខែមិថុនា ឆ្នាំ២០២៤ នៅចំណុចសាលាក្រហម ស្ថិតនៅភូមិសូរិយាថ្មី ឃុំកូប ស្រុកអូរជ្រៅ ខេត្តបន្ទាយមានជ័យ។
បើតាមការអះអាង ពីមន្ត្រីចុះបង្ក្របផលិតផលទាំងអស់នេះ ដែលត្រូវបានឈ្មួញដឹកចេញពីប្រទេសថៃ លួចដឹកចូលមកប្រទេសកម្ពុជា តាមច្រករបៀង ពុំមានលិខិតអនុញាតិនោះទេ ហើយផលិតផលទាំងនោះ ភាគច្រើនខូចគុណភាពព្រោះតែការរក្សាទុកក្នុងសីតុណ្ហភាព ការវេចខ្ចប់មិនសមស្របនិងមានរយ:ពេលច្រើនថ្ងៃទៀតផង។
ក្នុងការបង្ក្រាបនោះ សមត្ថកិច្ចចម្រុះបានដកហូតផលិតផលសាច់បង្កកដែលមានសាធាតុគីមីចំនួន
១.២៥៤គីឡូក្រាម ក្នុងនោះ ១-ជើងមាន់បង្កក ៨ កេស ស្មើ ៥៦០ គ.ក, ២-កោះមាន់បង្កក ៨ កេស ស្មើ៦២៤ គ.ក,
៣-ខួរគោបង្កក ១ កេស ស្មើ៥៦ គ.ក, ៤-ពោះវៀនជ្រូក ១ កេស ស្មើ៧០ គ.ក។
ចំពោះផលិតផលខាងលើ ត្រូវសមត្ថកិច្ចចម្រុះធ្វើកំណត់ហេតុដកហូត រួចស្នើសុំគោលការណ៍តាមនិតិវិធីពីព្រះរាជអាជ្ញានៃអយ្យការអមសាលាដំបូងខេត្តបន្ទាយមានជ័យ ដើម្បីយកទៅកម្ទេចចោលនៅព្រឹកថ្ងៃទី ១៦ ខែមិថុនា ឆ្នាំ ២០២៤៕
