រាជធានីភ្នំពេញ ៖ ឯកឧត្តម ឆាយ ឫទ្ធិសែន រដ្ធមន្ត្រីក្រសួងអភិវឌ្ឍន៍ជនបទ បានបញ្ជាក់ឪ្យដឹងថា ក្រសួងអភិវឌ្ឍន៍ជនបទមានគោលដៅសំខាន់ៗចំនួន៣ ដើម្បីលើកកម្ពស់គុណភាពប្រជាពលរដ្ឋនៅជនបទ មានបេសកកម្ម និងការងារចំបងៗសំដៅលើកកម្ពស់គុណភាព និងគុណតម្លៃនៃជីវិតរបស់ប្រជាពលរដ្ឋនៅជនបទ ប្រកបដោយបរិយាបន្នទាំងផ្នែកសេដ្ឋកិច្ច សង្គមកិច្ច និងវប្បធម៌ ពោលធ្វើយ៉ាងណាកាត់បន្ថយគម្លាតសង្គម គម្លាតរវាងអ្នកទីក្រុង និងជនបទ។
លោក ឆាយ ឫទ្ធិសែន បានបន្ដថា ក្រសួងបាន និងកំពុងយកចិត្តទុកដាក់ អនុវត្តបេសកកម្មសំខាន់ៗ របស់ខ្លួនចំនួនបួនគឺ៖
ទី១ ការអភិវឌ្ឍហេដ្ឋារចនាសម្ព័ន្ធរូបវន្ត និងគមនាគមន៍ជនបទប្រទាក់ក្រឡា ដើម្បីឱ្យគ្រប់ភូមិទាំងអស់មានផ្លូវតភ្ជាប់ និងក្លាយជាតំបន់ជនបទសមាហរណកម្ម ជាពិសេសតំបន់ដែលមានសក្តានុពលសេដ្ឋកិច្ចខ្ពស់។
ទី២ ការកែលម្អលក្ខខណ្ឌនៃការរស់នៅរបស់សហគមន៍ជនបទតាមរយៈការផ្គត់ផ្គង់ទឹកស្អាត ការផ្ដល់បង្គន់អនាម័យ ការអប់រំផ្នត់គំនិត ដើម្បីឱ្យប្រជាជនជនបទកែប្រែឥរិយាបថ និងរស់នៅប្រកបដោយអនាម័យល្អ និងមានផាសុកភាព។ទី៣ ការធ្វើពិពិធកម្មសកម្មភាពសេដ្ឋកិច្ចជនបទ តាមរយៈការបណ្តុះបណ្តាលជំនាញមូលដ្ឋាន បំណិនជីវិត ដើម្បីបង្កើតការងារ និងមុខរបរ ដើម្បីបង្កើនប្រាក់ចំណូល។ បន្ថែមពីនេះ ក្រសួងបានផ្ដោតទៅលើការបង្កើត ភូមិគំរូ ដោយផ្អែកទៅលើសក្តានុពល និងអំណោយផលផ្នែកសេដ្ឋកិច្ច ទេសចរណ៍ ឬកសិកម្មនៅតាមសហគមន៍ជនបទ ។ទី៤ ការពង្រឹងស្ថាប័នទាំងថ្នាក់ជាតិ និងថ្នាក់ក្រោមជាតិ ដើម្បីពង្រឹងសមត្ថភាពមន្ត្រីរាជការក្នុងគោលបំណងបម្រើប្រជាជននៅតំបន់ជនបទប្រកបដោយសុចរិតភាព និងការទទួលខុសត្រូវខ្ពស់។
សូមបញ្ជាក់ថា នាព្រឹកថ្ងៃទី៤ ខែមិថុនា ឆ្នាំ២០២ក្រសួងអភិវឌ្ឍន៍ជនបទបានបើកវេទិកាសារព័ត៌មានលើប្រធានបទ «អ្វីទៅជាកិច្ចការអាទិភាពជនបទនៅកម្ពុជា» នៅទីស្តីការក្រសួងអភិវឌ្ឍន៍ជនបទ សហការរៀបចំដោយក្លឹបអ្នកកាសែតកម្ពុជា(ក អ.ក) ៕
