ព្រះរាជពិធីថ្វាយព្រះភ្លើងព្រះបរមសពសម្តេចព្រះអគ្គមហាសង្ឃរាជាធិបតី កិត្តិឧទ្ទេសបណ្ឌិត ទេព វង្ស សម្តេចព្រះមហាសង្ឃរាជនៃព្រះរាជាណាចក្រកម្ពុជា បានប្រព្រឹត្តិទៅយ៉ាងអធិកអធមក្រោមព្រះរាជាធិបតីភាពដ៏ខ្ពង់ខ្ពស់ជាទីបំផុត ព្រះករុណា ព្រះបាទសម្តេចព្រះបរមនាថនរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា និងមានការអញ្ជើញចូលរួមពីសម្តេចអគ្គមហាសេនាបតីតេជោហ៊ុន សែន ប្រធានព្រឹទ្ធសភា សម្តេចមហារដ្ឋសភាធិបតី ឃួន សុដារី ប្រធានរដ្ឋសភា សម្តេចមហាបវរធិបតី ហ៊ុនម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ឥស្សរជនជាន់ខ្ពស់ក្នុងស្ថាប័ន ព្រឹទ្ធសភា រដ្ឋសភា រាជរដ្ឋាភិបាល ព្រមទាំងមានការចូលរួមផងដែរពីសំណាក់អង្គទូត នៃបណ្ដាប្រទេសជាមិត្តប្រចាំនៅកម្ពុជា និងមន្រ្តីរាជការ ព្រះសង្ឃ និងពុទ្ធបរិស័ទជាច្រើនអង្គនាក់។
នាព្រឹកព្រលឹមថ្ងៃទី៣ ខែមិថុនា ឆ្នាំ២០២៤នេះ ព្រះបរមសពសម្តេចព្រះអគ្គមហាសង្ឃរាជាធិបតី កិត្តិឧទ្ទេសបណ្ឌិត ទេព វង្ស សម្តេចព្រះមហាសង្ឃរាជនៃព្រះរាជាណាចក្រកម្ពុជាបានដង្ហែចេញពីវត្តឧណ្ណាលោមមកកាន់ទីតាំងព្រះមេរុ(នៅខាងមុខវត្តបទុមវតី) ដើម្បីរៀបចំព្រះរាជពិធីថ្វាយព្រះ ភ្លើងព្រះបរមសព បានប្រព្រឹត្តទៅប្រកបដោយភាពអធិកអធមខ្ពង់ខ្ពស់ និងជាទីសក្ការៈ ស្របតាម ប្រពៃណីជាតិស័ក្តិសមនឹងព្រះកិត្តិនាម និងព្រះកិត្តិយសរបស់សម្តេចព្រះអគ្គមហាសង្ឃរាជាធិបតីកិត្តិឧទ្ទេសបណ្ឌិត ទេព វង្ស សម្តេចព្រះមហាសង្ឃរាជ នៃព្រះរាជាណាចក្រកម្ពុជា។
ក្បួនដង្ហែព្រះបរមសពដែលមានចម្ងាយផ្លូវប្រមាណជា ៥គីឡូម៉ែត្រ មានក្បួនថ្មើរជើងចំនួន៥ផែន និងមានការចូលរួមពីមន្រ្តី យោធាមន្រ្តីប៉ូលិសកងរាជអាវុធហត្ថ និងមន្ត្រីរាជការអ្នកមុខអ្នកការ សមាជិក សមាជិកា ព្រឹទ្ធសភា រដ្ឋសភា រាជរដ្ឋាភិបាល កងកាយរិទ្ធ សហភាពសហព័ន្ធយុវជនកម្ពុជា យុវជនកាកបាទក្រហមកម្ពុជា មន្រ្តីសង្ឃមកពីបណ្តាប្រទេសនានា ក្បួនឥស្លាមសាសនា និងក្បួនគ្រឹស្តិសាសនាផង។
តាមតម្រាយផ្លូវនៃក្បួនដង្ហែព្រះបរមសព មានមហាជន ពុទ្ធបរិស័ទអង្គុយលើកដៃប្រណម ដោយទឹកចិត្តក្រៀមក្រំ និងបានបង្ហាញអារម្មណ៍សោកស្តាយ អាឡោះអាល័យចំពោះការយាងសោយ ព្រះទិវង្គតរបស់ម្តេចព្រះអគ្គមហាសង្ឃរាជាធិបតី កិត្តិឧទ្ទេសបណ្ឌិត ទេព វង្ស សម្តេចព្រះមហាសង្ឃរាជនៃព្រះរាជាណាចក្រកម្ពុជា។
លោកយាយ ម៉ម រឿន ប្រជាពលរដ្ឋរស់នៅរាជធានីភ្នំពេញដែលបានអញ្ជើញ ចូលរួមក្នុងព្រះរាជពិធីថ្វាយព្រះភ្លើងព្រះបរមសពសម្តេចព្រះអគ្គមហាសង្ឃរាជាធិបតី កិត្តិឧទ្ទេសបណ្ឌិត ទេព វង្ស សម្តេចព្រះមហាសង្ឃរាជនៃព្រះរាជាណាចក្រកម្ពុជាបានប្រាប់វិទ្យុជាតិកម្ពុជា ដោយបានបង្ហាញអារម្មណ៍ សោកស្តាយជាខ្លាំងចំពោះការបាត់បង់ មហាកំពូលសង្ឃ ព្រះបរមសព ព្រះអគ្គមហាសង្ឃរាជាធិបតី កិត្តិឧទ្ទេសបណ្ឌិត ទេព វង្ស។ អុំស្រីបានបញ្ជាក់ថា កូនខ្មែរគ្រប់រូបមិនអាចបំភ្លេចព្រះអង្គបានឡើយ ព្រោះព្រះអង្គតែងជួយដល់កូនខ្មែរ និងបានលើកកម្ពស់វិស័យព្រះពុទ្ធសាសនាកាន់តែរីកចម្រើនស្ញប់ស្ញែង សម្រាប់កូនចៅជំនាន់ក្រោយដឹងគុណ ដល់ព្រះអង្គជារៀងរហូត។
កាលពីជំនាន់ប៉ុលពតយើងគ្មានវប្បធម៌អីឱ្យយើងគោរពបូជាអីទេ គេបំបាត់ពុទ្ធសាសនាសូម្បីតែចាស់ទុំម៉ែឪយើងក៏គេមិនឱ្យគោរពផង តែដល់ពេលជំនាន់សម្តេច គឺមានការគោរពម៉ែឪ ជីដូនជីតា គឺធ្វើឡើងតាំងពីនៅតូចរហូតដល់ធំ ដូចដែលខ្ញុំតែងតែគោរពព្រះសង្ឃអ៊ីចឹង ដែលនេះគឺជារឿងមួយដែលមិនអាចបំភ្លេចបាន ដោយសម្តេចបានបន្សល់ទុកនូវវប្បធម៌ ចែករំលែកទៅដល់កូនចៅ ។ដូច្នេះសូមផ្ដាំដល់កូនដល់ចៅទាំងអស់ សូមគោរពប្រពៃណីខ្មែរ បុរាណខ្មែរ វប្បធម៌ខ្មែរទាំងអស់ ហើយខ្ញុំមានការសោកស្ដាយជាខ្លាំងដល់ពេលបាត់បង់ព្រះអង្គមួយ។»
សូមបញ្ជាក់ថា សម្តេចព្រះមហាសង្ឃរាជាធិបតីកិត្តិឧទ្ទេសបណ្ឌិត ទេព វង្ស សម្តេចព្រះមហាសង្ឃរាជគណៈមហានិកាយ នៃព្រះរាជាណាចក្រកម្ពុជា បានយាងចូលទិវង្គតកាលពីថ្ងៃទី២៦ ខែកុម្ភៈ ឆ្នាំ២០២៤ ដោយព្រះជរាពាធក្នុងជន្មាយុ ៩៣ព្រះវស្សា។ ព្រះសពរបស់សម្តេចសង្ឃ ត្រូវបានតម្កល់ធ្វើបុណ្យរហូតដល់១០០ថ្ងៃ។
ការយាងចូលព្រះទិវង្គតរបស់សម្តេចព្រះអគ្គមហាសង្ឃរាជាធិបតីកិត្តិឧទ្ទេសបណ្ឌិត ទេព វង្ស សម្តេចព្រះមហាសង្ឃរាជនៃព្រះរាជាណាចក្រកម្ពុជា គឺជាការបាត់បង់មហាវីរសង្ឃកំពូលដែលជាកុលបុត្រដ៏ឧត្តុង្គឧត្តមនៃកសិករ ដែលធ្លាប់រួមចលនាតស៊ូរំដោះជាតិ ប្រជាជន និងសាងព្រះផ្នួសលើកកម្ពស់ការរស់ឡើងវិញ នូវព្រះពុទ្ធសាសនា ក្នុងព្រះរាជាណាចក្រកម្ពុជា ចាប់តាំងពីថ្ងៃរំដោះ ៧ មករា ឆ្នាំ១៩៧៩ រហូតដល់ថ្ងៃអស់ព្រះជន្ម។
សម្ដេចព្រះមហាសង្ឃរាជ ទេព វង្ស គឺជាសម្តេចព្រះសង្ឃខ្មែរមួយអង្គ ដែលត្រូវបានគេស្គាល់ថា ព្រះអង្គមានស្នាព្រហស្ថក្នុងការបង្កើតគណៈសង្ឃកម្ពុជាឡើងវិញក្រោយរបបកម្ពុជាប្រជាធិបតេយ្យ (ខ្មែរក្រហម)។ព្រះអង្គទទួលបានការគោរពស្រឡាញ់ពីមេដឹកនាំខ្មែរ និងប្រជាពលរដ្ឋខ្មែរ ចំពោះទឹកព្រះទ័យដ៏ល្អផូរផង់ មានក្តីសណ្តោសមេត្តាចំពោះពុទ្ធសាសនិកគ្រប់រូប។ សម្ដេចក៏ជាព្រះសង្ឃពុទ្ធសាសនាថេរវាទមួយព្រះអង្គដែលទទួលការគោរពស្រឡាញ់ពីបណ្ដាមេដឹកនាំអ្នកកាន់ពុទ្ធសាសនាជាច្រើននៅលើពិភពលោក ទាំងនិកាយថេរវាទ និកាយមហាយាន និងអន្តរសាសនា។
ជាមួយគ្នានេះដែរ ថ្នាក់ដឹកនាំកំពូលៗ ពុទ្ធបរិស័ទ និងប្រជាពលរដ្ឋខ្មែរទំាងអស់ សូមវន្ទាឧទ្ទិសដល់ដួង ព្រះវិញ្ញាណក្ខន្ធ សម្តេចព្រះ អគ្គមហាសង្ឃរាជាធិបតីកិត្តិឧទ្ទេសបណ្ឌិត ទេព វង្ស សូមយាងទៅកាន់សុគតិភពកុំបីឃ្លៀងឃ្លាតឡើយ៕ប្រភពអាកាប៉េ
