អន្តរជាតិ ៖ រដ្ឋមន្ត្រីក្រសួងការពារជាតិចិនបានព្រមានថា អ្នកណាដែលព្យាយាមបំបែកតៃវ៉ាន់ចេញពីប្រទេសចិននោះ អ្នកនោះនឹងត្រូវបញ្ចប់ដោយការបំផ្លិចបំផ្លាញដោយខ្លួនឯង។ ការនិយាយបែបនោះគឺសំដៅលើសហរដ្ឋអាមេរិក។
លោក Dong Jun រដ្ឋមន្ត្រីក្រសួងការពារជាតិចិនបានធ្វើការកត់សម្គាល់បែបនោះ ក្នុងអំឡុងពេលថ្លែងសុន្ទរកថានៅក្នុងកិច្ចប្រជុំកំពូលសន្តិសុខអាស៊ី ដែលគេស្គាល់ថាជាកិច្ចសន្ទនា Shangri-La ក្នុងប្រទេសសិង្ហបុរីកាលពីថ្ងៃអាទិត្យ។
សន្និសីទនេះត្រូវបានធ្វើឡើងខណៈដែលចិនបង្កើនសម្ពាធយោធាលើតៃវ៉ាន់ ចំពេលមានការចូលរួមរបស់អាមេរិកកាន់តែខ្លាំងនៅតៃវ៉ាន់ផងដែរ។
លោក Dong បាននិយាយថា ពិភពលោកឥឡូវស្ថិតនៅផ្លូវបំបែក។ ការនិយាយបែបនោះក៏សំដៅទៅលើទំនាក់ទំនងរបស់ប្រទេសលោកជាមួយសហរដ្ឋអាមេរិកដូចគ្នា។ លោកក៏បានស្នើថា វាជារឿងសំខាន់ក្នុងការស្វែងរកមធ្យោបាយដើម្បីកសាងទំនាក់ទំនងល្អរវាងចិន និងអាមេរិកទ្បើងវិញ។
គួររម្លឹកថា យោធាចិនបានធ្វើសមយុទ្ធនៅជុំវិញកោះតៃវ៉ាន់បន្ទាប់ពីប្រធានាធិបតីតៃវ៉ាន់លោក Lai Chin-te នៃគណបក្សវឌ្ឍនភាពប្រជាធិបតេយ្យចូលកាន់តំណែងកាលពីខែមុន។
លោក Dong បាននិយាយថា តៃវ៉ាន់គឺជាស្នូលនៃបញ្ហាស្នូលសម្រាប់ប្រទេសចិន ហើយបញ្ហាបច្ចុប្បន្នគឺថា អាជ្ញាធរ DPP កំពុងកាន់អំណាច កំពុងបន្តស្វែងរកឯករាជ្យភាពរបស់តៃវ៉ាន់។
រដ្ឋមន្ត្រីក្រសួងការពារជាតិបាននិយាយថា តៃវ៉ាន់ស្ថិតនៅក្នុងកិច្ចការផ្ទៃក្នុងរបស់ចិនទាំងស្រុង ហើយកងកម្លាំងខាងក្រៅមិនមានសិទ្ធិជ្រៀតជ្រែកឡើយ។ លោក Dong បានអះអាងជំហររបស់ប្រទេសលោក ខណៈលោកបានចូលរួមក្នុងសន្និសីទនេះជាលើកដំបូង ខណអ្នកចូលរួមខ្លះបានរិះគន់ជំហររបស់ចិនក្នុងការធ្វើសមយុទ្ធយោធាជុំវិញកោះតៃវ៉ាន់។
នៅថ្ងៃមុននៅឯសន្និសីទ រដ្ឋមន្ត្រីការពារជាតិជប៉ុន លោក Kihara Minoru បានសង្កត់ធ្ងន់លើសារៈសំខាន់នៃសន្តិភាព និងស្ថិរភាពនៅទូទាំងច្រកសមុទ្រតៃវ៉ាន់ ក្នុងអំឡុងសុន្ទរកថាមួយ។ ជាក់ស្តែង លោកបានសំដៅទៅលើសកម្មភាពដែនសមុទ្រដែលកំពុងកើនឡើងរបស់ចិននៅក្នុងសមុទ្រចិនខាងកើត និងខាងត្បូង៕