ខេត្តបន្ទាយមានជ័យ ៖កាលពីយប់រំលងអាធ្រាតចាប់ពីម៉ោង២រហូតដល់ម៉ោង៤ថ្ងៃទី៣ ខែមិថុនា ឆ្នាំ២០២៤ នៅទីតាំងក្លឹបកម្សាន្ដ TNL ដែលមានខារ៉ាអូខេ ឌីស្គូ និងស្នុកឃឺ បង្កប់ដោយការប្រើប្រាស់គ្រឿងញៀនស្ថិតនៅភូមិអូរអំបិល (ចំការខ្នុរ)សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ ត្រូវបានរដ្ឋបាលក្រុងសិរីសោភ័ណដឹកនាំដោយលោក ស្រេង សុផល អភិបាលក្រុងសិរីសោភ័ណ និងលោក ស៊ី ឌី អធិការក្រុងសិរីសោភ័ណ ចុះបង្ក្រាបឃាត់ខ្លួនក្មេងទំនើងប្រុសស្រីជាច្រើននាក់ជាមួយគ្រឿងញៀនមួយចំនួន។
លោកស្រេង សុផល អភិបាលក្រុងសិរីសោភ័ណបានបញ្ជាក់ថា ជាការណែនាំពីលោក អ៊ុំ រាត្រី ប្រធានគណៈបញ្ជាការឯកភាពខេត្ត ដើម្បីលុបបំបាតបទល្មើសគ្រឿងញៀន និងក្រុមបងតូចបងធំ លោកបានដឹកនាំកម្លាំងចុះប្រតិបត្តិការបង្ក្រាបក្លឹបកម្សាន្ដ និងហាងខារ៉ាអូខេដែលមានលួចលាក់បង្កប់ ជួញដូរគ្រឿងញៀននឹងបទល្មើសផ្សេងៗត្រូវលុបបំបាត់ហើយចំពោះទីតាំងក្លឹបកម្សាន្តខាងលើ ត្រូវបានបិទជាបណ្តោះអាសន្នសិន។
លោកបន្តថា អាជ្ញាធរ និងសមត្ថកិច្ចនឹងបន្តចុះអនុវត្តក្លឹបកម្សាន្ត និងខារ៉ាអូខេដទៃទៀតដែលសង្ស័យប្រព្រឹត្តល្មើសច្បាប់ដូចភ្លៀងរលឹមដើម្បីលុបបំបាត់ បទល្មើសគ្រឿងញៀន និងក្រុមបងតូចបងធំមិនអោយកើតមានក្នុងមូលដ្ឋាន៕
