ខេត្តសៀមរាប៖ នៅចុងសប្តាហ៍ នាព្រឹកថ្ងៃទី២០ ខែកញ្ញា ឆ្នាំ២០១៥ ម្សិលមិញ លោក ខាំ លឿ ប្រធានក្រុមប្រឹក្សាឃុំកណ្តែកស្រុក ប្រាសាទបាគង ខេត្តសៀមរាប បានដឹកនាំសមាគមន៍ឃុំ និងមានការចូលរួមពីសំណាក់ លោកតាអាចារ្យដូនជី ព្រមទាំងប្រជាពលរដ្ឋ ជាច្រើននាក់ផងដែរ បានរៀបចំពិធី ព្រលែងកូនត្រី ទុកសម្រាប់ធ្វើពូជ នៅក្នុងត្រពាំងកណ្តែកធម្មជាតិ តាំងពីបូរាណដែល មានទីតាំងស្ថិត នៅក្នុងភូមិគោកធ្លក ឃុំកណ្តែក ស្រុកប្រាសាទបាគង ខេត្តសៀមរាប ។
លោក ខាំ លឿ ប្រធានក្រុមប្រឹក្សាឃុំ បានរៀបរាប់ថា ត្រពាំងកណ្តែកមួយនេះ កកើតឡើងតាំងពីសម័យបូរាណ ហើយមានទំហំ៩០ម៉ែត្របួនជ្រុងមានជំរៅ ជិត៤ ម៉ែត្រ ។ លោកបន្តថា កាលពីមុនត្រពាំងកណ្តែក ម្តងម្កាលតែងតែ រីងទឹក នៅរដូវប្រាំង ដោយសាត្រពាំងមួយនេះ ដីហូរចូលពីមួយឆ្នាំទៅមួយឆ្នាំ បណ្តាលឲ្យរាក់ ! ដោយឃើញសភាពបែប នេះ នៅរដូវប្រាំងកន្លងមក លោកបានបូមទឹកស្តា ដើម្បីដាក់ពូជត្រីបន្ត កុំឲ្យដាច់ពូជ ទុក្ខឲ្យសមាគមន៍ឃុំ អភិរក្សសម្រាប់ បម្រើប្រយោជន៍រួម ជូនប្រជាពលរដ្ឋចំនួន៤ភូមិគឺ ១ភូមិត្រគោកធ្លក ២ភូមិត្រពាំងទឹម ៣ភូមិបុស្សក្រឡាញ់ ៤ភូមិល្អក់ ។
លោកមេឃុំបានបញ្ជាក់ថា ការលែងកូនត្រីនេះ មិនមែនឲ្យប្រជាពលរដ្ឋមកអាស្រ័យផលស្រាប់ នៅក្នុងត្រពាំងនេះទេ!
គឺសម្រាប់ត្រីពងកូន នៅពេលរដូវវស្សាទឹកសាយភាយ ត្រីឡើងទៅប្រជាពលរដ្ឋ បានដាក់ទ្រូ ដាក់លាយ ឫបង់សំណាញ់បានសម្រាប់ផ្គត់ផ្គង់ជាប្រចាំ ។ លោកបានបន្ថែមថា នៅរដូវប្រាំងនាពេលខាងមុខ លោកនឹងធ្វើលូ ដាក់សន្ទះទឹកសម្រាប់បើកបិទ ជាបន្តទៀត ដើម្បីងាយស្រួលក្នុងការបញ្ចេញត្រី នៅពេលទឹកភ្លៀងជន់លិចនារដូវវស្សា ។
តំណាងប្រជាពលរដ្ឋ បានលើកឡើងថា កន្លងមកពួកគាត់រស់នៅ ក្នុងភូមិដែលមានទីតាំង ជិតត្រពាំងនេះ តែងតែរកត្រី ដើម្បីដោះស្រាយ ក្នុងជីវភាពគ្រួសា បានជាប្រចាំគ្រប់រដូវវស្សា ៕
ប៊ុនធឿន (សៀមរាប )
