ខេត្តបន្ទាយមានជ័យ៖ រថយន្តដឹកអាច់ដីលក់ បើកបរក្នុងទិសដៅច្រាស់ទិសជាមួយរថយន្តម៉ាកតូយ៉ូតាកាមរី បានបោះពួយយ៉ាងលឿនដូចគ្នា បុក គ្នាមួយទំហឹងបណ្តាលអោយអ្នកជិះរថយន្តតូយ៉ូតាកាមរីរងរបួសស្រាល ។ ហេតុការណ៍គ្រោះថ្នាក់ចរាចរណ៍នេះនៅវេលាម៉ោង3រសៀល ថ្ងៃទី21 ខែឧសភា ឆ្នាំ2014នៅលើបណ្តោយផ្លូវលំត្រង់ចំណុចផ្លូវកោង ស្ថិតក្នុងភូមិគោកពន្លៃ ឃុំចំណោម ស្រុកមង្គលបូរី ខេត្តបន្ទាយមានជ័យ។
បើតាមប្រភពីសមត្ថកិច្ចបានឲ្យដឹងថា មុនកើតហេតុគេឃើញ មានរថយន្តដឹកដី 01 គ្រឿង ម៉ាកហ្វុយហ្សូ ពណ៌ស ស្លាកលេខភ្នំពេញ3A-9790 បើកបរពីជើងទៅត្បូង លុះដល់ចំណុចកើតហេតុ មានរថយន្ត01គ្រឿងទៀត ម៉ាកតូយ៉ូតាកាមរីស៊េរីឆ្នាំ1995 ពណ៌ប្រផេះ ស្លាកលេខ បន្ទាយមានជ័យ 2A-2663 បើកបរច្រាស់ទិសគ្នា បានបុកគ្នាចំពីចំហៀងខាងមុខពេញទំហឹង បណ្តាលឲ្យរថយន្តទាំងពីរខូចខាតយ៉ាងតំណំ និងបណ្តាលឲ្យអ្នករួមដំណើររថយន្តម៉ាកតូយ៉ូតាកាមរីរងរបួសស្រាល ។
លោកវរសេនីយ៍ត្រី រស់ សំបូរ មេបញ្ជាការកងរាជអាវុធហត្ថស្រុកមង្គលបូរីបានឲ្យដឹងថា រថយន្តដឹក ដីលក់បើកបរ ដោយឈ្មោះហាក់ សេ រីវុធ ភេទប្រុស អាយុ34ឆ្នាំរស់នៅភូមិវត្តដំណាក់ ឃុំ4 ស្រុក-ខេត្តសៀមរាប មិនបណ្តាលឲ្យរងរបួសទេ ចំណែកតៃកុងរថយន្តតូយ៉ូតាកាមរីបើកបរដោយឈ្មោះផៃ ធួយ ភេទប្រុស អាយុ38ឆ្នាំ រស់នៅភូមិគោកច្រាប ឃុំស្រះរាំង ស្រុកមង្គលបូរី មិនបណ្តាលឲ្យរងរបួសទេ និងអ្នករួមដំណើរឈ្មោះ ហិម សៀម ភេទប្រុស អាយុ53 ឆ្នាំភូមិ-ឃុំជាមួយគ្នា បណ្តាលឲ្យរងរបួស បែកក្បាល ស្រាល ។
ក្រោយពីគ្រោះថា្នក់ចរាចរណ៍គេឃើញមាននគរបាលចរាចរណ៍ និងកម្លាំងអ ហចុះមកវាស់វែង កន្លែងកើតហេតុ និងជួយសង្គ្រោះជនរងគ្រោះម្នាក់ទៅកាន់មន្ទីរពេទ្យ ។ បច្ចុប្បន្នកម្លាំង នគរបាលចរាចណ៍ ស្រុកមង្គលបូរី យករថយន្ត ទាំងពីរដើម្បីរក្សាទុកបណ្តោះអាសន្ន នៅអធិការដ្ឋាននគរបាលស្រុកមង្គលបូរី រងចាំការដោះស្រាយគ្នា តាមនិតិវិធីច្បាប់ ៕
ដោយចិន្តា
