ខេត្តបន្ទាយមានជ័យ ៖ នៅវេលាម៉ោង ២:០០រសៀល ត្រូវនិងថ្ងៃទី ១៤ ខែឧសភា ឆ្នាំ២០២៤ មានរថយន្ត ម៉ាកកាមេរី កាត់ទ្រុង ពណ៌ស ពាក់ស្លាកលេខ 2B : 8463 បានដឹកគ្រឿងក្នុងជ្រូកប្រហែល ២តោន ដែលសង្ស័យថា ជា (គ្រឿងក្នុងគ្មានច្បាប់អនុញាត និង ខូចគុណភាព ឬ វិចខ្ចប់គ្មានអនាម័យ ) បានដឹកយកទៅចែកចាយតាមគោលដៅនានា ក្នុងក្រុងប៉ោយប៉ែត ។
នៅចំណុចមួយកន្លែងចំងាយពីសាលារៀនដុនបុស្កូ ប្រហែល ២០០ម៉ែត្រ ទៅ ៣០០ម៉ែត្រ ក្នុងភូមិប៉ាលិលេយ្យ២ សង្កាត់ប៉ោយប៉ែត ក្រុងប៉ោយប៉ែត រថយន្តមួយគ្រឿងនេះ បានឈប់និងសាងគ្រឿងក្នុងជ្រូកមួយចំនួន បន្តទៅរថយន្តមួយគ្រឿង ម៉ាកស៊ីណា ពណ៌ ស ពាក់ស្លាកលេខ ភ្នំពេញ 2AC: 7918 ។បន្ទាប់ពីឃើញសកម្មភាពបែបនេះ ប្រជាពលរដ្ឋបានខលទំនាក់ទំនងទៅមន្ត្រីជំនាញ ដើម្បីសុំកិច្ចសហការ។
លោក ហ៊ុយ ទូច ប្រធានការិយាល័យបសុពេទ្យ ខេត្តបន្ទាយមានជ័យ បានអោយដឹងថា ក្រោយពីបានទទួលព័ត៌មាន លោកបានចាត់មន្ត្រីក្រោមឱវាទរបស់លោកទៅត្រួតពិនិត្យ តែមិនទាន់មកដល់ផង ការសាងទំនិញនេះរួចរាល់ ត្រូវ រថយន្តស៊ីណាបានដឹងខ្លួន បើករត់មកតាមផ្លូវបេតុង ឆ្លងកាត់មុខសាលាសង្កាត់ប៉ោយប៉ែត ដល់ផ្លូវបំបែកចូលសាលាសុវណ្ណភូមិ ទល់មុខនិងផ្សារ ហ៊ុយ ឡេង បត់ឆ្វេងបានប្រហែល ១០០ម៉ែត្រ តៃកុងរថយន្ត ស៊ីណា ភ័យស្លន់ស្លោ បានលើកគ្រឿងក្នុងជ្រូក ចំនួន ៥ កេស ទម្លាក់ចោល នៅលើដីឡូត៍មួយកន្លែង ស្ថិតនៅក្នុងភូមិ មិត្តភាព សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ រួចបើកគេចខ្លួនបាត់ស្រមោល មុនពេលមន្ត្រីជំនាញមកដល់ ។
មួយសន្ទុះក្រោយមក មន្ត្រីបសុពេទ្យបានមកដល់ ធ្វើការត្រួតពិនិត្យ និងធ្វើកំណត់ហេតុ ដោយលទ្ធផលឃើញថា មានគ្រឿងក្នុងជ្រូកទាំងនេះមាន ពោះ ក្រពះ អណ្តាត សរុប៥កេស មានទម្ងន់ប្រហែល ៣០០គីឡូក្រាម ទៅ៤០០គីឡូក្រាម យកទៅកាន់ស្នាក់ការក្បែរសាលាក្រុងប៉ោយប៉ែត រួចដុតកម្ទេចចោល នារសៀលថ្ងៃទី ១៤ ខែឧសភា ឆ្នាំ២០២៤ នេះផងដែរ ៕
