អន្តរជាតិ ៖ ទីភ្នាក់ងារអង្គការសហប្រជាជាតិទទួលបន្ទុកជនភៀសខ្លួនប៉ាឡេស្ទីនបានឲ្យដឹងកាលពីថ្ងៃអង្គារថា ជនជាតិប៉ាឡេស្ទីនប្រហែល ៤៥០,០០០ នាក់រត់ភៀសខ្លួនចេញពីទីក្រុង Rafah ចាប់តាំងពីអ៊ីស្រាអែល វាយចូលទីក្រុងនេះ។
របាយការណ៍នេះ បានបង្ហាញថា កងកម្លាំងអ៊ីស្រាអែល កំពុងបិទច្រកឆ្លងកាត់ដ៏សំខាន់ និងបំផ្លាញតំបន់មានប្រជាជនរស់នៅយ៉ាងក្រាស់ក្រែល។
កងកម្លាំងការពារអ៊ីស្រាអែល (IDF) បានបញ្ជាឱ្យប្រជាជននៅក្នុងភាគអាគ្នេយ៍នៃទីក្រុង Rafah ចាកចេញពីភ្លាមៗ កាលពីពេលថ្មីៗ ដោយអ្នកនាំពាក្យ IDF លោក Avichai Adraee ព្រមានថា កងកម្លាំងក្រុងយេរ៉ូសាឡឹម កំពុងរៀបចំវាយប្រហារគោលដៅក្រុមហាម៉ាសនៅទីនោះយ៉ាងខ្លាំងក្លា។
នៅក្នុងសេចក្តីថ្លែងការណ៍មួយ កាលពីថ្ងៃអង្គារ ទីភ្នាក់ងារជំនួយ និងការងាររបស់អង្គការសហប្រជាជាតិសម្រាប់ជនភៀសខ្លួនប៉ាឡេស្ទីននៅតំបន់ជិតបូព៌ា (UNRWA) បានបញ្ជាក់ថា មនុស្ស ៤៥០,០០០ នាក់ រត់ភៀសចេញពីទីក្រុង ខណកំពុងប្រឈមនឹងការស្រេកឃ្លាន និងការភ័យខ្លាច។
គួរបញ្ជាក់ថា មុនពេលមានចលនាជម្លៀសនេះ កើតឡើង Rafah មានប្រជាជនប៉ាឡេស្ទីនប្រហែល ១,៤ លាននាក់ដែលភៀសខ្លួនពីទីក្រុងផ្សេងៗ មករស់នៅ បន្ទាប់ពីប្រតិបត្តិការរបស់អ៊ីស្រាអែលនៅភាគខាងជើង និងកណ្តាលហ្គាហ្សា ៕
