រាជធានីភ្នំពេញ ៖ ឧបនាយករដ្ឋមន្ត្រី លោក ស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានបញ្ជាក់ថា យោងតាមការសិក្សាបង្ហាញថា ផលចំណេញសេដ្ឋកិច្ចសម្រាប់គម្រោងព្រែកជីកហ្វូណនតេជោ គឺចន្លោះពី ២១%ទៅ ៣០% ដែលជាអត្រាខ្ពស់មួយសម្រាប់គម្រោង ដែលផ្តល់ផលចំណេញសេដ្ឋកិច្ចក្នុងកម្រិតនេះ។
លោក ឧបនាយករដ្ឋមន្ត្រី បានលើកឡើងបែបនេះ នៅក្នុងវេទិកាពិភាក្សាដែលរៀបចំដោយក្លិបអ្នកកាសែតកម្ពុជាស្តីអំពី “ស្ថានភាពវិនិយោគនៅកម្ពុជា និងវឌ្ឍនភាពព្រែកជីកហ្វូណនតេជោ” នាព្រឹកថ្ងៃទី៣ខែឧសភា ឆ្នាំ ២០២៤។
លោកថា គម្រោងព្រែកជីកហ្វូណនតេជោ នឹងផ្តល់ផលចំណេញផ្នែកដឹកជញ្ជូនសរុបចន្លោះពី ៨៨ទៅ ៥៧០លានដុល្លារអាមេរិក ក្នុងមួយឆ្នាំ។ លោកបម្ថែមថា គម្រោងព្រែកជីកហ្វូណនតេជោ មិនត្រឹមតែផ្តល់ផលប្រយោជន៍សម្រាប់កម្ពុជាប៉ុណ្ណោះទេ តែក៏ផ្តល់សម្រាប់តំបន់ និងពិភពលោកផងដែរ។
លោកស៊ុន ចាន់ថុល បញ្ជាក់បន្ថែមថា គម្រោងព្រែកជីកនេះ នឹងធ្វើឲ្យប្រសើរឡើងនូវប្រព័ន្ធធារាសាស្ត្រ ដែលនឹងកាត់បន្ថយការជន់លិចភាគខាងត្បូងប្រទេសកម្ពុជា, ការធ្វើឲ្យប្រសើរឡើង និងលើកកម្ពស់ការតភ្ជាប់បៃតង តាមកំពង់ផែនៅកម្ពុជា ទៅកាន់កំពង់ផែសមុទ្រកម្ពុជា និងតភ្ជាប់ជាមួយអាស៊ាន និងចម្ងាយផ្លូវទឹកដឹកជញ្ជូនរវាងកំពង់ផែទឹកសាបក្នុងរាជធានីភ្នំពេញ ទៅកំពង់ផែទឹកជ្រៅក្នុងខេត្តកែប មានចម្ងាយ ២០០គីឡូម៉ែត្រ តិចជាងផ្លូវដឹកចញ្ជូនតាមប្រទេសវៀតណាមបច្ចុប្បន្ន។ ដូច្នេះកម្ពុជា នឹងជួយកាត់បន្ថយការបំភាយឧស្ម័នផ្ទះកញ្ចក់ទៅក្នុងបរិស្ថាន ជាពិសេសកាត់បន្ថយថ្លៃដើម ភស្តុភារកម្ម ដែលនឹងធ្វើឲ្យការវិនិយោគក្នុងប្រទេសកម្ពុជាកាន់តែប្រសើរឡើង។
លោកឧបនាយករដ្ឋមន្ត្រី បានថ្លែងថា ជីវភាពរបស់ប្រជាពលរដ្ឋកម្ពុជាចំនួន ១,៦លាននាក់ ដែលរស់នៅតាមបណ្តោយព្រែកជីកនេះ នឹងមានភាពប្រសើរឡើង ជាមួយប្រព័ន្ធធារាសាស្ត្រ និងការផ្គត់ផ្គង់ទឹកកាន់តែប្រសើរឡើង។
