ខេត្តកំពង់ឆ្នាំង ៖ សមត្ថកិច្ចចម្រុះស្រុកបរិបូរណ៌ឃាត់ខ្លួនជនសង្ស័យម្នាក់ និងត្រាក់ទ័រ១គ្រឿង ពាក់ព័ន្ធករណីឈូសឆាយដីតំបន់២ ជាដីហាមឃាត់។
ការឃាត់ខ្លួននេះនៅព្រឹកថ្ងៃទី០១ ខែឧសភា ឆ្នាំ២០២៤ នៅចំណុចព្រែកស្ពាន ស្ថិតក្នុងភូមិសាស្ត្រភូមិកោះតាម៉ូវ ឃុំកំពង់ព្រះគរគី ស្រុកបរិបូរណ៍ ខេត្តកំពង់ឆ្នាំង តាមបទបញ្ជានិងការណែនាំដ៏ម៉ឺងម៉ាត់របស់ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង និងជាប្រធានគណៈបញ្ជាការឯកភាពរដ្ឋបាលខេត្ត។
ប្រភពពីសមត្ថកិច្ចឲ្យដឹងថា កិច្ចប្រតិបត្តិការបង្ក្រាបបទល្មើសខាងលើនេះដឹកនាំដោយលោក ជា ផល្លីន អភិបាលរងស្រុកបរិបូណ៌ សហការជាមួយកម្លាំងកាយាល័យកសិកម្មស្រុក សង្កាត់ជលផលបរិបូរណ៍ នគរបាលស្រុក មេភូមិព្រែកស្ពាន និងសហគមន៍នេសាទកំពង់ព្រះគរគី។
ជាលទ្ធផលឃាត់បានត្រាក់ទ័រ១គ្រឿងម៉ាកគូបូតា៦០,៤០ ពណ៌ក្រហម ដែលគេដឹងថាម្ចាស់ត្រាក់ទ័រនោះមានឈ្មោះ ហែម ថា អាយុ៣៩ឆ្នាំ ភេទប្រុស មានទីលំនៅភូមិព្រៃតាមួង ឃុំផ្សារ ស្រុកបរិបូណ៌ ខេត្តកំពង់ឆ្នាំង បានជួលតៃកុងឈ្មោះ ឈួន គឹមសាន្ត អាយុ៣៦ឆ្នាំ ភេទប្រុស រស់នៅភូមិឃុំជាមួយគ្នា ធ្វើសកម្មភាពឈូសឆាយដីហាមឃាត់ ។បច្ចុប្បន្នជនសង្ស័យទាំង២នាក់ និងវត្ថុតាងត្រូវបានសមត្ថកិច្ចកសាងសំណុំរឿងតាមនីតិវិធី៕