ខេត្តសៀមរាប៖ នៅព្រឹកថ្ងៃទី១៨ ខែកញ្ញា ឆ្នាំ២០១៥នេះស្ថិតនៅក្នុងភូមិតាវៀន សង្កាត់សាលាកំរើក ក្រុង+ខេត្តសៀមរាប កម្លាំងសមត្ថកិច្ចចំរុះ ចុះបង្ក្រាបសិប្បកម្មកែឆ្នៃ២កន្លែង និងផ្ទះពលរដ្ឋមួយកន្លែង ដែលមានស្តុកឈើក្រញូង ដែលដឹកនាំដោយលោក សំរិទ្ធសុខុន ព្រះរាជអាជ្ញារង តំណាងអយ្យការសាលាដំបូងខេត្ត និងចូលរួមដោយលោក ស៊ុន សេន នាយការិយាយល័យប្រឆាំងបទល្មើសសេដ្ឋកិច្ច នៃស្នងការដ្ឋាននគរបាលខេត្ត និង លោក ម៉ុងប៊ុនលីម នាយផ្នែករដ្ឋបាលព្រៃឈើក្រុងសៀមរាប ព្រមទាំងអាជ្ញាធរដែនដីគ្រប់ជាន់ថ្នាក់។
យោងតាមសម្តី លោកមេភូមិនៃ ភូមិតាវៀន បានអោយដឹងថា ១-ទីតាំងរោងសិប្បកម្មមួយកន្លែងខាងជើងផ្លូវតាអុច ម្ចាស់ឈ្មោះ ចាន់គាន ជាប្តី និង ចាន់សាវិនជាប្រព្ធ។ ២-ទីតាំងរោងសិប្បកម្មទីពីរ ជារបស់ជនជាតិវៀតណាម ដែលរកម្ចាស់មិនទាន់ឃើញ មានតែក្រុមកម្មករវៀតណាម រតគេចខ្លួនអស់។ ៣-ផ្ទះប្រជាពលរដ្ឋ ដែលត្រូវកូនស្រីប្រាប់ថា ឪពុងឈ្មោះ ហេងសោភ័ន ធ្វើការខាងអ្នកដោះមីន (ស៊ីម៉ាក់) និងម្តាយឈ្មោះ តាន់សុខុន តែម្តាយនិងឪពុក មិននៅផ្ទះទេនៅព្រឹកនេះ បើទោះជាសមត្ថកិច្ច រង់ចាំអស់ជាច្រើនម៉ោងក៏ដោយ។
ខាងរដ្ឋបាលព្រៃឈើ បានអោយដឹងថា វត្ថុតាង និងឈើទាំងបីទីតាំងខាងលើនេះ ត្រូវរឹបអូសយកទៅទុកនៅ ផ្នែករដ្ឋបាលព្រៃឈើបន្ទាយស្រី ទៅតាមផ្លូវច្បាប់ ព្រោះសុទ្ធតែជាឈើប្រណិត និងមានបង្កប់លាក់ទុក ឈើក្រញូងដែលជាឈើខុសច្បាប់ មិនអាចលើកលែងអោយបានទេ ហើយចំណែកឯអ្នកពាក់ព័ន្ធ ត្រូវធ្វើសុំណុំរឿងទៅតាមផ្លូវច្បាប់ផងដែរ តែចំនួនឈើ មិនទាន់អាចប្រាប់បាននៅឡើយ។
យោងតាមប្រភពប្រជាពលរដ្ឋ នៅក្បែរៗរោងសិប្បកម្មខាងលើនេះ បានលួចបង្ហើបប្រាប់ថា រោងសិប្បកម្មដែលមានម្ចាស់ឈ្មោះ ចាន់គាន បានបើកជិត១០ឆ្នាំហើយ ឯរោងសិប្បកម្មមួយទៀត នៅទល់មុខជារបស់ជនជាតិវៀតណាម ដែលគេសង្ស័យថា ស្រ្តីជនជាតិវៀតណាមម្នាក់ មានមាឌធំ ឈ្មោះ គាចូវ (ឈ្មោះហៅក្រៅ) នៅក្នុងរូបភាពជាថៅកែ តែស្រ្តីវៀតណាមរូបនោះបដិសេធន៍ថា ខ្លួនមិនមែនជាម្ចាស់ទេ គ្រាន់តែយកឈើមកជួលអោយ ក្រុមកម្មកររោងសិប្បកម្មនេះ កែឆ្នៃតែប៉ុណ្ណោះ។ ចំណែកឯផ្ទះប្រជាពលរដ្ឋ ដែលមានឈ្មោះ ហេងសោភ័ណ ធ្វើការជាអ្នកដោះមីននោះ គេពុំទាន់ដឹងព័ត៌មានច្បាស់នៅឡើយទេ ព្រោះម្ចាស់មិនត្រឡប់មកផ្ទះ នៅតែកូនស្រី ឯប្រភពក៏មិនហ៊ានបង្ហើបដែរ ហាក់មានការទើសទាល់។
សូមបន្ថែមថា ក្រុមឈ្មួញរកស៊ីឈើក្រញូង បានចាប់ផ្តើមកំរើកឡើងវិញ ដោយសមត្ថកិច្ចប្រចាំការតាមដងផ្លូវ ហាក់មើលមិនឃើញ ស្តាប់មិនលឺ ស្នូឡានដឹកឈើក្រញូង ឆ្លងកាត់ខេត្តឧត្តរមានជ័យ ខេត្តសៀមរាប ខេត្តកំពង់ធំ ខេត្តព្រះវិហ៊ារ ខេត្តបន្ទាយមានជ័យ ឆ្ពោះទៅលក់នៅព្រំដែនវៀតណាមនោះទេ ដែលធ្វើអោយគេសង្ស័យថា ប្រហែលជាមានការត្រូវរូវគ្នា ដោយប្រការណាមួយ៕ ដោយ៖ ផ្លុង-រ៉េត
