មេបញ្ជាការរង ផ្នែកសឹករង ស្រុកត្រពាំងប្រាសាទ មួយរូប ជា ឈ្មួញរកស៊ីឈើក្រញូង និងជាអ្នកដឹកនាំ ​ពលករកាប់ឈើក្រញូង នៅតាម ខ្សែរបន្ទាត់ព្រុំដែន

ខេត្តឧត្តរមានជ័យ៖ បទល្មើសឈើក្រញូង បានចាប់ផ្តើមកក្រើកឡើងវិញហើយ នៅតាមខ្សែរបន្ទាត់ព្រំដែនកម្ពុជា-ថៃ សមភូមិមុខ ទិសទី២ ស្ថិតក្នុងភូមិសាស្រ្ត ស្រុកត្រពាំងប្រាសាទ ខេត្តឧត្តរមានជ័យ ក្នុងដែនប្រតិបត្តិការ ផ្នែកសឹករងត្រពាំងប្រាសាទ ដែលមានលោក អនុសេនីយ៍ត្រី ជួន រិទ្ធ មានតួរនាទីជាមេបញ្ជាការរង ( គ៤ ) ចេញមុខរកស៊ីយ៉ាងចំហរ តាមរយៈនៃ ការធ្វើសកម្មភាព ជួលកម្លាំងពលករ ឲ្យផ្សងព្រេងឆ្លងដែន ចូលក្នុងដែនដីថៃ ដើម្បីស្ពាយនាំជញ្ជូនឈើក្រញ៉ូង ចេញពី ដែនដីថៃ ចូលដែនដីកម្ពុជាវិញ ហើយប្រមូលយកទៅលក់បន្ត ឲ្យទៅឈ្មួញ ដុះស្លែរ២នាក់ ដែលឈរជើងចាំទទួលទិញ ផ្តាច់មុខនៅស្រុកអន្លង់វែង ហើយឈ្មួញឈើក្រញ៉ូង២នាក់នោះ ទី១ឈ្មោះ គា និងជនទី២ ឈ្មោះ មករា ។
កាលពីវេលាម៉ោង១០និង៣០នាទី ព្រឹកថ្ងៃទី១៣ ខែកញ្ញា ឆ្នាំ២០១៥ កន្លងទៅ នៅចំណុច ភូមិត្រពាំងបី ឃុំព្រះប្រឡាយ ស្រុកត្រពាំងប្រាសាទ គេឃើញមានរថយន្តមួយគ្រឿង ម៉ាកកាមរីសេរី ៩៥ ព៌ណស្លែរ ពាក់ស្លាកលេខ 2A-0332 ផ្ទុកឈើគ្រញូងពេញ បើកបរដោយម្ចាស់ផ្ទាល់ឈ្មោះ ជួន រិទ្ធ បានដឹកជញ្ជូនឈើក្រញ៉ូងទាំងថ្ងៃ ចេញពី តំបន់កាន់កាប់របស់ខ្លួន យកទៅលក់នៅស្រុកអន្លង់វែង ដោយគ្មានសមត្ថកិច្ចណាម្នាក់ ហ៊ានរារាំងនោះឡើយ ។
បើតាមសម្តីរបស់សមត្ថកិច្ច ដែលឈរជើងប្រចាំការនៅតំបន់នោះ បានអោយដឹងថា ឈ្មោះ ជួន រិទ្ធ មានអំនួត ប្រើអំណាចខ្លាំងណាស់ ធ្វើសកម្មភាពមិនខ្លាចញញើត មន្រ្តីជំនាញណាម្នាក់ឡើយ រួមនិងច្បាប់ផងដែរ ។ ជាមួយនេះ ឈ្មួញប្រមូលទិញឈើក្រញូងដុះស្លែរ ( គា និង មករា ) កំពុងតែពង្រីកឥទ្ធិពល កាន់តែខ្លាំងឡើងៗ ថែមទៀត ។
គួរបញ្ជាក់ដែរថា រាជរដ្ឋាភិបាលកម្ពុជា បានចេញបទបញ្ជា ឲ្យកម្លាំងសមត្ថកិច្ចប្រដាប់អាវុធ ទប់ស្កាត់អំពើឆ្លងដែន ខុសច្បាប់ រឹតបន្តឹងតាមខ្សែបន្ទាត់ព្រំដែន ទាំងវិធានការអប់រំនិងវិធានការច្បាប់ ពន្យល់ណែនាំ កុំអោយប្រជាពលរដ្ឋ ប្រថុយប្រថានលួចឆ្លងដែន ពិសេសលើករណីឈើក្រញ៉ូង ដោយកន្លងមក មានប្រជាជនជាច្រើន ត្រូវបានបាត់បង់ជីវិត ព្រោះតែបំរើឈ្មួញឈើក្រញ៉ូង បន្សល់ទុកស្រ្តីមេម៉ាយ កូនកំព្រាគ្មានទីពឹង បង្កើតវិបត្តិសង្គមឥតឈប់ឈរ ។

ផ្លូវក្បាលអូរស្វាយ គឺជាច្រករបៀងធំជាងគេ ក្នុងចំណោមច្រករបៀងទាំងអស់ ដែលមាននៅភូមិសាស្រ្តស្រុកត្រពាំង ប្រាសាទ ដែលបាននិងកំពុងប្រើប្រាស់ ពលករស្ពាយឈើក្រញ៉ូង និងចរាចរណ៍ឈើគ្រញូង យ៉ាងពេញទំហឹង ។
លោកវរសេនីយ៍ត្រី ស៊ុន បូរ៉ាន់ មេបញ្ជាការផ្នែកសឹករង ស្រុកត្រពាំងប្រាសាទ បានបំភ្លឺករណីខាងលើតាមទូរស័ព្ទ នារសៀលថ្ងៃទី ១៦ ខែកញ្ញានេះថា លោកមិនបានអនុញ្ញាតិ ឲ្យកូនចៅរបស់លោកប្រព្រិត្តបទល្មើស អញ្ចឹងនោះទេ ! ៕

ប៊ុនធឿន (សៀមរាប )