ខេត្តប៉ៃលិនៈ នៅក្នុងពិធី ប្រកាសផ្ទេរភារកិច្ច តែងតាំងមុខតំណែង និង បំពាក់ឋានន្តរសក្តិ ជូនដល់នាយនគរបាលជាតិ នៃស្នងការដ្ឋាននគរបាលខេត្តប៉ៃលិន នារសៀលថ្ងៃទី១៥ ខែកញ្ញា ឆ្នាំ២០១៥នេះ នាយឧត្តមសេនីយ៍ ខេង សុមេធ អគ្គស្នងការរង និងជាមេបញ្ជាការនគរបាលជាតិ ប្រចាំទិសភូមិភាគទី៤ និងទី៥ បានលើកឡើងថា ព្រឹត្តិការណ៍ផ្ទៀងផ្ទាត់ផែនទី Bonne ខ្នាត 1/100.000 រវាងផែនទី ដែលអង្គការសហប្រជាជាតិ និងផែនទី ដែលបារាំងឲ្យខ្ចី ជាមួយផែនទីផ្លូវការ ដែលរាជរដ្ឋាភិបាលកម្ពុជា កំពុងប្រើប្រាស់ គឺជាកំណត់ត្រាប្រវត្តិសាស្រ្ត ធានាតម្លាភាព ត្រឹមត្រូវ ពិតប្រាកដ ក្នុងកិច្ចទទួលខុសត្រូវរបស់រាជរដ្ឋាភិបាល ជាមួយនឹងការបោះ បង្គោល សីមា ព្រំដែនកម្ពុជា-វៀតណាម ហើយឯកឧត្តមបានបញ្ជាក់ថា ការផ្ទៀងផ្ទាត់ផែនទីទាំងអស់នេះ វាមិនមែនជាកម្រាលផ្លូវ សម្រាប់ការធ្វើនយោបាយប្រជាភិថុតនោះទេ ។
នាយឧត្តមសេនីយ៍ ខេង សុមេធ បានគូសបញ្ជាក់ថា ការផ្ទៀងផ្ទាត់ផែនទីចុងក្រោយ ដែលបារាំងឲ្យខ្ចី ជាមួយនឹងផែនទីផ្លូវការ ដែលរាជរដ្ឋាភិបាលកម្ពុជាកំពុងប្រើប្រាស់ គឺជាការស្វែងរកការពិត ប្តូរដោយតម្លៃនៃ សេចក្តីក្លាហាន របស់សម្តេចតេជោ នាយករដ្ឋមន្រ្តី ដើម្បីបញ្ជៀសនិងបញ្ចប់ការញុះញ៉ង់ ដោយគ្មានការទទួល ខុសត្រូវនៃជនអគតិ ដែលមានបំណងបំផុស បង្កើតស្មារតីជាតិនិយមជ្រុល បំបែកបំបាក់ជាតិ ។
ការផ្ទៀងផ្ទាត់ផែនទីទាំង២លើកកន្លងមកនេះ ក៏ជាការបង្ហាញនូវឆន្ទៈ របស់រាជរដ្ឋាភិបាលកម្ពុជាផងដែរ ក្នុងការកសាងខ្សែបន្ទាត់ព្រំដែន ឲ្យបានច្បាស់លាស់ ព្រំដែនសន្តិភាព មិត្តភាព កិច្ចសហប្រតិបត្តិការណ៍ និង ការអភិវឌ្ឍន៍ ។
គួរបញ្ជាក់ថា នៅក្នុងពិធីនេះ ស្នងការដ្ឋាននគរបាលខេត្តប៉ៃលិន បានរៀបចំការប្រកាសផ្ទេរភារកិច្ច តែងតាំងមុខតំណែង ជូនដល់មន្រ្តីនគរបាលជាតិចំនួន៣៤រូប តម្លើងឋានន្តរសក្តិចំនួន ១៤១រូប ចាប់ពីថ្នាក់ ពលបាលទោ ដល់ថ្នាក់ ឧត្តមសេនីយ៍ទោ រួមទាំងបានជួបសំណេះសំណាល ជាមួយមន្រ្តីនគរបាល ចូលនិវត្តន៍ផងដែរ ។
នាយឧត្តមសេនីយ៍ ខេង សុមេធ វាយតម្លៃខ្ពស់ថា និវត្តន៍ជនទាំងអស់ ត្រូវបានបូជា កម្លាំងកាយចិត្ត លះបង់អ្វីៗគ្រប់បែបយ៉ាងនៅក្នុងជីវិតការងាររបស់ខ្លួន បំពេញតួរនាទីជា មន្រ្តីនគរបាលជាតិ កសាងបាននូវស្ពានសន្តិភាព ចម្លងជោគវាសនាប្រទេសជាតិ ឆ្ពោះមកដល់តំណាក់កាលនៃការអភិវឌ្ឍន៍ ។ ឯកឧត្តម បានសង្កត់ធ្ងន់ថា ទាំងនេះ គឺពិតជាវីរកម្មមិនអាចបំភ្លេចបាននោះឡើយ ។ ឯកឧត្តមបានបន្តថា មន្រ្តីនគរបាលជាតិជំនាន់ក្រោយៗនេះ ដែលបាននឹងកំពុងពុះពារបន្តវេន ដើម្បីសង្គមជាតិ នីតិរដ្ឋ ប្តេជ្ញាការពារ សមិទ្ធផលដែលរៀមច្បង បានកសាងទុកឲ្យ នោះគឺ ការពារដាច់ខាតរដ្ឋធម្មនុញ្ញ ការពារព្រះមហាក្សត្រ ការពាររាជរដ្ឋាភិបាលស្របច្បាប់ ដែលប្រសូត្រចេញពីឆន្ទៈរបស់រាស្រ្ត ។
ជាមួយឱកាសនោះ ទឹកប្រាក់ប្រមាណជា ជាង ៥០លានរៀល ត្រូវបាននាយឧត្តមសេនីយ៍ ខេង សុមេធ ឧបត្ថម្ភជូនដល់មន្រ្តីនគរបាលជាតិ ដែលត្រូវបានបំពាក់ឋានន្តរសក្តិ តែងតាំងមុខតំណែងថ្មី និងមន្រ្តីនគរបាល ចូលនិវត្តន៍ ព្រមជាមួយនឹងការឧបត្ថម្ភ សម្រាប់ការរៀបចំ កម្មវិធីជួបជុំ អបអរសាទរពីធីនោះផងដែរ ៕
ប៊ុនធឿន ( សៀមរាប )
