ខេត្តកំពង់ឆ្នាំង ៖ ក្របីមួយហ្វូងមានចំនួន១៣ក្បាល ត្រូវម្ចាស់ស្រែ ប្តឹងទៅប៉ូលិសនិងប្រជាកាពារ អោយចាប់បញ្ជូនទៅ ចងខ្សែទុក នៅសាលាឃុំផ្លូវទូក ស្រុកកំពង់លែង ដើម្បីសុំកិច្ចអន្តរាគមន៍ពីសំណាក់អាជ្ញាធរជួយដោះស្រាយរកយុត្តិធម៍ រាល់ការខូចខាតផលដំណាំស្រូវ លើផ្ទៃដីទំហំ៣ហិកតា ត្រូវបំផ្លិចបំផ្លាញដោយហ្វូងក្របីទាំងនោះ។
ស្ត្រីឈ្មោះចេ ង វន រស់នៅភូមិឈើទាល ឃុំផ្លូវទូក ស្រុកកំពង់លែង ខេត្តកំពង់ឆ្នាំងបានរៀបរាប់ថា ផលដំណាំស្រូវគាត់ត្រូវហ្វូងក្របីអាណាធិបតេយ្យចូលស៊ី បំផ្លិចបំផ្លាញមួយលើករួចមកហើយ បានចាប់នាំក្របី ម្ចាស់វាចេញមុខធ្វើការដោះស្រាយគ្នានៅសាលាឃុំផ្លូវទូក ដោយអាជ្ញាធរធ្វើការដោះស្រាយបញ្ចប់រឿង គាត់ម្ចាស់ស្រែមិនទទួលបានសងការខូចខាតផលដំណាំឡើយ។ គ្រានោះដែរ អាជ្ញាធរបានធ្វើកិច្ចសន្យាមានស្នាមមេដៃ ពីភាគីម្ចាស់ស្រែនិងពីភាគីម្ចាស់ក្របី ទទួលដឹងលឺ ពីអាជ្ញាធរឃុំផ្លូវទូក បានបញ្ជាក់ច្បាស់ថា លើកនេះមិនបង់ថ្លៃរាល់ការខូចខាតឡើយ។ ប៉ុន្តែបើម្ចាស់ក្របី ព្រលែងក្របីបែបអាណាធិបតេយ្យ អោយចូលមកស៊ីផលដំណាំស្រូវបន្តទៀត ម្ចាស់ក្របី ត្រូវទទួលខុសត្រូវ សងសំណងខូចខាតអោយទៅខាងម្ចាស់ស្រែក្នុងក្របី១ក្បាលចំនួន១លានរៀល ។
ម្ចាស់ស្រែខាងលើបានរៀបរាប់បន្តថា លុះមកដល់យប់ថ្ងៃទី២៨ ខែមីនា ឆ្នាំ២០២៣ ក៏មានក្របីមួយហ្វូងចូលស៊ីដំណាំស្រូវប្រាំងគាត់រៀបនឹងទទួលផលលើផ្ទៃដីទំហំ៣ហិកតា រងការខូចការខូចខាតស្ទើរទាំងស្រុង ឃើញដូចនេះ ព្រឹកឡើងវេលាម៉ោង៦ជាង គ្រួសារគាត់បានតេទូរស័ព្ឌអាជ្ញាធរឃុំផ្លូវទូកជួយអន្តរាគមន៍ហៅកម្លាំងមកជួយចុះចាប់ហ្វូងក្របី យកទៅសាលាឃុំដើម្បីរកម្ចាស់ចូលមកដោះស្រាយសំណង ថ្លៃបំផ្លិចបំផ្លាញដំណាំស្រូវ។ ក្រោយចាប់បានក្របីចំនួន១៣ក្បាល យកទៅដល់សាលាឃុំ បានលេចមុខម្ចាស់ ចំនួន៥នាក់ មកទាមទារយកហ្វូងក្របីទៅវិញ ឃើញសកម្មភាពបែបនេះមន្ត្រីឃុំ បានរាយការណ៍ទៅលោកប៉ាត់ គន មេឃុំផ្លូវទូក។
សូមបញ្ជាក់ថា កិច្ចអន្តរាគមន៍ដោះស្រាយសម្របម្រួលទាំងកណ្ដាលថ្ងៃត្រង់នេះ មានលោកប៉ាត់ គន មេឃុំ និងការចូលរួម ជំទប់ទី១ ជំទប់ទី២ ក្រុមប្រឹក្សាឃុំ ប្រជាកាពារ អនុប៉ុស្ដិ៍ និងភាគីម្ចាស់ស្រែ ភាគីម្ចាស់ក្របីចំនួន១៣ក្បាល។ ក្នុងដំណោះស្រាយគ្នានោះ មានការជជែកតឹងបំពង់ ក ដាក់គ្នា រហូតដល់ម៉ោង ៤ល្ងាច ភាគីម្ចាស់ស្រែនិងម្ចាស់ហ្វូងក្របីមកសាលាឃុំជាលើកទី២ ដើម្បីសម្របសម្រួលគ្នាបន្ត លើកទី១ដំណោះស្រាយដាច់បាយដាច់ទឹក ខាងដំណាំស្រូវទារសំណងក្របី១៣ក្បាល ចំនួន១០លានរៀលគត់។ ចំណែកខាងម្ចាស់ក្របីទទួលបង់ថ្លៃក្របី១ក្បាល២០ម៉ឺនរៀលប៉ុណ្ណោះ ទើបដំណោះស្រាយមិនត្រូវរ៉ូវគ្នា។ ជាលទ្ធផលបញ្ចប់រឿងត្រឹមសាលាឃុំផ្លូវទូក ភាគីទាំងសងខាងត្រូវរ៉ូវគ្នា ក្នុងក្របី១ក្បាល បង់ការខូចខាតតម្លៃចំនួន២៥ម៉ឺនរៀល ហើយបានធ្វើកិច្ចសន្យា។
ចុងក្រោយផងដែរលោក ប៉ាត់ គន មេឃុំផ្លូវទូក សូមសំណូមពរទៅដល់បងប្អូនប្រជាពលរដ្ឋរស់នៅភូមិច្រណកក៏ដូចរស់នៅភូមិស្ទោងខាងខេត្តកំពង់ធំ។និងខេត្តកំពង់ឆ្នាំង។ សូមមេត្តាកុំព្រលែងសត្វក្របីតាមអំពើចិត្ត ពាក់ព័ន្ធខាងលើធ្វើឲ្យ សត្វក្របីដើរស៊ីស្រូវតាមអំពើចិត្ត អញ្ចឹងហើយសូមបងប្អូនមេត្តាមើលថែសត្វក្របីឲ្យបានល្អ ជៀសវាង វានឹងទៅស៊ីដំណាំស្រូវរបស់ប្រជាពលរដ្ឋ៕
