ខេត្តស្ទឹងត្រែង ៖ ប្រជាពលរដ្ឋបានឲ្យដឹងថា សព្វថ្ងៃនេះមានរថយន្តធុនធំតែងតែដឹកលើសទម្ងន់ ដឹកឆ្លងកាត់ស្ពានចំនួន ២កន្លែងក្នុងឃុំអូរៃទាំងយប់ទាំងថ្ងៃ បង្កឲ្យស្ពានដែកបាឡេនៅចំកណ្ដាលស្ពានបាក់ស្រុត ប្រជាពលរដ្ឋខំធ្វើការជួសជុលបណ្ដុះអាសន្នតែមិនអាចទ្រទ្រង់ទម្ងន់រថយន្តដែលផ្ទុកលើសនោះបានឡើយ។ស្ពាន២កន្លែងនៅក្នុងភូមិអន្លង់ស្វាយ ឃុំអូរ៉ៃ ស្រុកថាលាបរិវ៉ាត់ ខេត្តស្ទឹងត្រែងដែលមានចម្ងាយផ្លូវពីទីរួមខេត្តប្រមាណជាង ២០ គីឡូម៉ែត្រស្របតាមដងទន្លេមេគង្គ បានបាក់ស្រុតប្រជាពលរដ្ឋស្នើឲ្យអាជ្ញាធរពាក់ព័ន្ធជួយធ្វើការទប់ស្កាត់នឹងធ្វើការជួសជុលស្ពានឡើងវិញដើម្បីសម្រួលដល់ប្រជាពលរដ្ឋដឹកកសិផលទៅកាន់ទីផ្សារ។
ប្រជាពលរដ្ឋបានលើកឡើងទៀតថា ទោះជាស្ពានដែកនេះសង់រឹងមាំយ៉ាងណាក៏ដោយ មិនអាចទ្រទ្រង់និងការដឹកលើទម្ងន់របស់រថយន្តខ្នាតធំបាននោះឡើយ ពេលដែលរថយន្តឆ្លងកាត់ម្ដងៗធ្វើឲ្យស្ពានរង្គើញ័ររហូតឈានដល់ការបាក់ស្រុតធ្ងន់ធ្ងរថែមទៀត។
ពាក់ព័ន្ធក្នុងករណីស្ពានខាងលើនេះលោក ស គឹមណាត ប្រធានមន្ទីរសាធារណៈការនិងដឹកជញ្ជូនខេត្តក៏បានឲ្យដឹងដែរថា ផ្លូវស្ពានមួយខ្សែក្រាលគ្រោះក្រហមដែលតភ្ជាប់ពីស្រុកថាលាបរិវ៉ាត់ទៅស្រុកសៀមបូកតាមដងទន្លេមេគង្គគឺមិនស្ថិតនៅក្នុងការគ្រប់គ្រងឬចំណាយរបស់មន្ទីរសាធារណការនិងដឹកជញ្ជូនខេត្តនោះទេ។
លោក ម៉ែន គង់ អ្នកនាំពាក្យសាលាខេត្តស្ទឹងត្រែងបានឲ្យដឹងថាដើម្បីថែរក្សាទ្រព្យសម្បត្តិសាធារណៈឲ្យនៅបានល្អស្នើសុំទៅម្ចាស់យានយន្តដែលផ្ទុកលើសទម្ងន់ឬរថយន្តធុនធំទាំងអស់ត្រូវចូលរួមប្រើប្រាស់ផ្លូវកុំឲ្យដឹកលើសទម្ងន់ឆ្លងកាត់ជៀសវាងការប្រើប្រាស់មិនបានយូរអង្វែង។
ដោយឡែកលោក សន សារឿន អភិបាលស្រុកថាឡាបរិវ៉ត់ ក៏បានបញ្ជាក់ឲ្យដឹងដែរថា នៅចំពោះមុខលោកនឹងរៀបចំកម្លាំងធ្វើការជួសជុលស្ពានដែកនេះឡើងវិញ៕
