លោកវរៈសេនីយ៍ឯក កុយ នឹម មេបញ្ជាការរង តំណាងឲ្យ ឧត្តមសេនីយ៍ទោ នាង ឃីម មេបញ្ជាការ កងពលតូចថ្មើរជើងលេខ៤១ បានអញ្ជើញចូលរួម ក្នុងពិធីបំពាក់ឋានន្តរស័ក្ត ជូននាយទាហាន ថ្នាក់អនុសេនីយ៏ ចំនួន ១៤៩ រូបនៅ គ្រប់បណ្តាវរៈសេនាតូច នៃកងពលតូចថ្មើរជើងលេខ៤១ ដែលមានស្នារដៃឆ្នើមនៅក្នុងជួរអង្គភាពដើម្បីចូលកាន់មុខ តំណែងក្នុងការ បំពេញភារកិច្ច ក្នុងកិច្ចការពារសន្តិសុខ ដើម្បីសុខសុវត្ថិភាពេជួនប្រជាពលរដ្ឋ និងការពារជាតិមាតុភូមិផងដែរ ។
បន្ទាប់ពីបំពាក់ឋានន្តរស័ក្ត ជូននាយទាហានឆ្នើម ដែលមានស្នាដៃល្អរួចមក លោកវរៈសេនីយ៍ឯក កុយ នឹម មេបញ្ជារងកងពលតូចថ្មើរជើងលេខ៤១ មានប្រសាសន៍ផ្តាំផ្ញើរ ដល់កងកម្លាំងរបស់កងពលទាំងអស់ ពីភារកិច្ចយ៉ាង សំខាន់ក្នុង ការចូលរួមសហប្រតិបត្តិការ ជាមួយអាជ្ញាធរ និងសមត្ថកិច្ចគ្រប់ស្ថាប័ន ដើម្បីចូលរួមអនុវត្ត ភូមិឃុំមាន សុវត្ថិភាព នៅតាមមូលដ្ឋាន ដែលជាចំណុចឈរជើង នៅក្នុងភូមិសាស្រ្តរបស់ខ្លួន ។
មេបញ្ជាការរង មានប្រសាសន៍បន្តថា ឋានន្តរស័ក្តដែលត្រូវតំឡើងជូន ដល់នាយទាហាននេះ គឺធ្វើទៅតាមក្រឹតក្រមច្បាប់ នៃការតែងតាំង របស់ក្រសួងការពារជាតិ ដល់យោធិនដែលមានស្នាដៃល្អ ក្នុងការបម្រើជាតិមាតុភូមិ ជាពិសេសយោធិន យើងធ្លាប់ បានចូលរួម ក្នុងព្រឹត្តិការណ៍ ការពារព្រំដែន នៅប្រាសាទព្រះវិហារ ប្រាសាទតាមាន់ និងប្រាសាទតាក្របី រយៈកាលកន្លងមក ក្នុងការ រក្សាការពារបានស្ថេរភាព នៅខ្សែរបន្ទាត់ព្រំដែនទៀតផង ។
លោកវរៈសេនីយ៍ឯក កុយ នឹម បានសង្កត់ធ្ងន់ថា ទោះបីជាស្ថានភាពព្រំដែន មានភាពស្ងប់ស្ងាត់ក្តី ក្រៅពីភារកិច្ច ការពារបូរណភាពដែនដី កងទ័ពក៏មានភារកិច្ច ចូលរួមអនុវត្តន៍ ភូមិឃុំមានសុវត្ថិភាពតាមមូលដ្ឋាន ជាការឆ្លើយតបទៅ តាមគោល នយោបាយរបស់រាជរដ្ឋាភិបាល និងការពារប្រជាជន ដូច្នេះជំនាញការិយាល័យពាក់ព័ន្ធ របស់កងពល មាន ភារកិច្ចយ៉ាងសំខាន់ សហការជាមួយអាជ្ញាធរ និងសមត្ថកិច្ចជំនាញ ក្នុងការចូលរួម រក្សាទប់ស្កាត់រាល់បទល្មើសដែលកើត មានឡើង ជាពិសេសបទល្មើសគ្រឿងញៀន ដែលកើតឡើងនៅគ្រប់ទីកន្លែង ហើយរាជរដ្ឋាភិបាលកំពុងយកចិត្តទុក ដាក់ទប់ស្កាត់ ចំពោះបញ្ហាគ្រឿងញៀននេះ ដែលសព្វថ្ងៃ កំពុងតែកំរើកឡើង យ៉ាងខ្លាំងផងនោះ។
លោកបានបញ្ជាក់បន្ថែមថា នាយទាហានដែលទទួលបាន ឋានន្តរស័ក្តថ្មី ត្រូវមានការផ្លាស់ប្តូរ អត្តចរឹក និងទំលាប់ ចាស់មិនល្អ ដែលមានកន្លងមក ដើម្បីមកអនុវត្តន៍ច្បាប់ របស់ក្រសួងការពារជាតិ ៕
ដោយ៖ ប៊ុនធឿន
