រាជធានីភ្នំពេញ ៖ ក្រសួងអធិការកិច្ច មានសមត្ថកិច្ចចុះត្រួតពិនិត្យស្រាវជ្រាវនៅតាមស្ថាប័ន ទាំងរឿងល្អ និងមិនល្អ។ បើឃើញថាស្ថាប័ននោះល្អ ក្រសួងនឹងជួយផ្សព្វផ្សាយឲ្យយកជាគម្រូ តែបើធ្វើអធិការកិច្ចទៅមានកំហុស ក្រសួងអធិការកិច្ច នឹងបន្តនីតិវិធី។ នីតិវិធីនោះ បើកំហុសតូចតាច ស្ថាប័ននោះនឹងត្រូវណែនាំអប់រំ និងកែប្រែ តែបើធ្ងន់ធ្ងរ ត្រូវស្រាវជ្រាវឲ្យច្បាស់ ធ្វើរបាយការណ៍ជូនសម្តេចនាយករដ្ឋមន្ត្រី ដើម្បីចាត់វិធានការ។
ឯកឧត្តម ហួត ហាក់ រដ្ឋមន្ត្រីក្រសួងអធិការកិច្ច មានប្រសាសន៍បែបនេះ នៅក្នុងកិច្ចប្រជុំវេទិកាពិភាក្សាលើប្រធានបទ អធិការកិច្ចក្នុងបរិបទកំណែទម្រង់ រៀបចំដោយក្រសួងអធិការកិច្ច នៅទីស្តីការក្រសួង នៅថ្ងៃទី 4 ខែមករា ឆ្នាំ 2024 ខណះក្លិបអ្នកកាសែតកម្ពុជា (ក.អ.ក) សហការជាមួយក្រសួងអធិការកិច្ច ដោយមានអ្នកសារព័ត៌មានចូលរួម។
ការងារនេះដើម្បីរួមចំណែកជាមួយរាជរដ្ឋាភិបាល ក្នុងការអនុវត្តឲ្យបានជោគជ័យនូវកម្មវិធីនយោបាយរបស់រាជរដ្ឋាភិបាលឲ្យបានជោគជ័យ ក៏ដូចជាយុទ្ធសាស្ត្របញ្ចកោណ។ នេះជាការបញ្ជាក់បន្ថែម របស់លោករដ្ឋមន្ត្រី។
ចំពោះបណ្តឹងវិវាទដីធ្លី រយៈបីឆ្នាំចុងក្រោយនេះ ក្រសួងអធិការកិច្ចទទួលបានបណ្ដឹងចំនួន 47 បណ្ដឹង ក្នុងនោះ 40 បណ្ដឹងបានដោះស្រាយបញ្ចប់តាមគោលនយោបាយឈ្នះឈ្នះ នៅសល់ 7 បណ្ដឹងកំពុងពិនិត្យដោះស្រាយនិងគោរពសុំការដោះស្រាយពីរាជរដ្ឋាភិបាល។
សូមជម្រាបថា កាលពីថ្ងៃទី៥ ខែតុលា ឆ្នាំ២០២៣ ព្រះករុណា ព្រះបាទសម្ដេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា បានចេញព្រះរាជក្រមប្រកាសឱ្យប្រើច្បាប់ស្ដីពីការបង្កើត «ក្រសួងអធិការកិច្ច» ដែលត្រូវបានប្តូរឈ្មោះពីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច ក្រោយពីរាជរដ្ឋាភិបាលអាណត្តិទី៧បង្កើតឡើង៕
