រាជធានីភ្នំពេញ ៖ នៅថ្ងៃទី២១ ខែវិច្ឆិកា ឆ្នាំ២០២៣ នៅសណ្ថាគារសុខា លោក កែវ រតនៈ រដ្ឋមន្ត្រីនៃក្រសួងរ៉ែ និងថាមពល បានអញ្ជើញចូលរួមក្នុងវេទិកាពិភាក្សាស្ដីពី «គោលនយោបាយរ៉ែ និងថាមពលនៅកម្ពុជា» ដែលរៀបចំដោយក្លឹបអ្នកកាសែតកម្ពុជា ដោយលោករដ្ឋមន្ត្រីបានឲ្យដឹងថា ក្រសួងរ៉ែ និងស្ថាប័នពាក់ព័ន្ធ បាននិងកំពុង ពិភាក្សាគ្នាក្នុងការលុបបំបាត់ការនាំចូលគ្រឿងអេឡិចត្រូនិក ដែលប្រើប្រាស់ថាមពលច្រើនហួសហេតុ (ស៊ីភ្លើងខ្លាំង) ចេញពីទីផ្សារកម្ពុជា។
លោករដ្ឋមន្រ្ដីបានថ្លែងថា ក្រសួងរ៉ែ និងថាមពល បាននិងកំពុងដាក់ចេញជាមួយដៃគូរអភិវឌ្ឍន៍រួមមាន ធនាគារអភិវឌ្ឍអាស៊ី UNDP ជាមួយប្រទេសអូស្រ្ដាលី ក្នុងការជំរុញគោលនយោបាយប្រសិទ្ធភាពថាមពល ដើម្បីការពារបរិស្ថាន ដើម្បីបំពេញតាមការប្ដេជ្ញារបស់កម្ពុជា ក្នុងការប្រែប្រួលអាកាសធាតុលើពិភពលោក ដោយបានដាក់គោលដៅសន្សំថាមពល។
លោករដ្ឋមន្រ្តី ក៏បានបង្ហាញពីផែនការក្នុងការគ្រប់គ្រងការប្រើប្រាស់ថាមពលអគ្គិសនី ដោយទប់ស្កាត់ការនាំចូលឧបករណ៍អគ្គិសនីដែលស៊ីភ្លើងច្រើនមកទីផ្សារក្នុងស្រុក។ លោក បន្តថា រដ្ឋាភិបាលបានដាក់ផែនការឆ្នាំ ២០២៣ ទៅ ២០៣០ កាត់បន្ថយការប្រើប្រាស់អគ្គិសនីប្រហែលឲ្យបាន ១៩ % ស្មើ ២០០០ មេហ្គាវ៉ាត់។ ការទប់ស្កាត់បានជោគជ័យអាចធ្វើឲ្យកម្ពុជាមិនបាច់បង្កើតរោងចក្រថ្មីផលិតថាមពលថ្មី បន្ថែមចំនួន ២០០០ មេហ្គាវ៉ាត់ ដែលនឹងចូលរួមកិច្ចការពារបរិស្ថាន។
ក្រៅពីលើកពីគម្រោងការហាមឃាត់ការនាំចូលឧបករណ៍ដែលស៊ីភ្លើងច្រើន លោករដ្ឋមន្រ្តី ក៏ចង់ឱ្យពលរដ្ឋប្រើប្រាស់ថាមពលដោយសន្សំសំចៃ ដើម្បីចូលរួមចំណែកសម្រេចបានគោលដៅការប្រើប្រាស់ថាមពលឱ្យមានប្រសិទ្ធភាព។
លោករដ្ឋមន្ត្រីបានបញ្ជាក់ថា ថាមពលអគ្គិសនីបានមកពីវារីអគ្គិសនីជាង៤០%ភាគរយ ពន្លឺព្រះអាទិត្យ១០% និងយកពីប្រទេសឡាវ ដែលក្នុងនោះថាមពលជាង៦០% ជាថាមពលស្អាតដែលអាចទាក់ទាញអ្នកវិនិយោគិនឲ្យមកវិនិយោគនៅកម្ពុជា។
គោលនយោបាយរបស់រាជរដ្ឋាភិបាលអាណត្តិទី៧ និងក្រសួងរ៉ែនិងថាមពលគឺ ៖
១ ផ្គត់ផ្គង់អគ្គិសនីគ្រប់គ្រាន់
២ តម្លៃសមរម្យ
៣ កាត់បន្ថយការដាច់ភ្លើង
៤រុញភ្លើងទៅដល់ទីជនបទ(ការតភ្ជាប់សេវា)
សូមជម្រាបជូនថា ក្លិបអ្នកកាសែតកម្ពុជា (ក.អ.ក) ចាត់ទុក នេះជាលើកទី១ ដែល ក.អ.ក ទទួលបានការគាំទ្រពីក្រសួងរ៉ែ និងថាមពល រៀបចំវេទិកាពិភាក្សាទាក់ទងនឹងវិស័យរ៉ែ និងថាមពលនៅកម្ពុជា ដែលជាវិស័យគន្លឹះយ៉ាងសំខាន់សម្រាប់ការលើកកម្ពស់កម្រិតជីវភាពរបស់ប្រជាពលរដ្ឋ និងសេដ្ឋកិច្ចនៅកម្ពុជា៕
