អន្តរជាតិ ៖ យន្តហោះចម្បាំងអ៊ីស្រាអែលនៅតែបន្តការវាយប្រហារកាន់តែសាហាវលើជំរំជនភៀសខ្លួននៅ Gaza ខណៈដែលអ៊ីស្រាអែលបដិសេធការជំរុញរបស់អាមេរិកឱ្យផ្អាកក្នុងការប្រយុទ្ធ។
ទាហានអ៊ីស្រាអែលបាននឹងកំពុងរឹតបន្តឹងការឡោមព័ទ្ធទីក្រុង Gaza ជាមួយនឹងការបង្ហោះខ្សែវីដេអូកងទ័ពដែលបង្ហាញពីការប្រយុទ្ធដែលកំពុងបន្តជាមួយក្រុមសកម្មប្រយុទ្ធហាម៉ាស់ ។
យន្តហោះចម្បាំងអ៊ីស្រាអែលបានវាយប្រហារជំរុំជនភៀសខ្លួននៅតំបន់ហ្គាហ្សាស្ទ្រីបកាលពីព្រឹកថ្ងៃអាទិត្យដោយបានសម្លាប់មនុស្សយ៉ាងហោចណាស់ ៤០នាក់ និងរាប់សិបនាក់រងរបួស។ ការវាយប្រហារនេះបានកើតឡើងនៅពេលដែលអ៊ីស្រាអែលបាននិយាយថា ខ្លួននឹងបន្តជាមួយនឹងការវាយលុករបស់ខ្លួនដើម្បីកម្ទេចមេដឹកនាំក្រុមហាម៉ាស់ក្នុងទឹកដី ទោះបីជាមានការអំពាវនាវរបស់សហរដ្ឋអាមេរិកឱ្យផ្អាកបទឈប់បាញ់ដើម្បីទទួលបានជំនួយដល់ជនស៊ីវិលដែលអស់សង្ឃឹមក៏ដោយ។
ប៉ុន្តែអ៊ីស្រាអែលបានច្រានចោលគំនិតនៃការបញ្ឈប់ការវាយលុករបស់ខ្លួន សូម្បីតែសម្រាប់ការផ្អាកមនុស្សធម៌រយៈពេលខ្លីដែលស្នើឡើងដោយរដ្ឋមន្ត្រីការបរទេសសហរដ្ឋអាមេរិកលោក Antony Blinken ក្នុងអំឡុងពេលដំណើរទស្សនកិច្ចបច្ចុប្បន្នរបស់គាត់នៅក្នុងតំបន់ក៏អ៊ីស្រាអែលមិនស្តាប់ដែរ។
ក្រសួងសុខាភិបាលនៃតំបន់ហ្គាហ្សាបាននិយាយថា ជនជាតិប៉ាឡេស្ទីនជាង ៩,៧០០ នាក់ត្រូវបានសម្លាប់នៅក្នុងទឹកដីនេះ ក្នុងរយៈពេលជិតមួយខែនៃសង្គ្រាម ហើយចំនួននោះទំនងជាកើនឡើងនៅពេលដែលកងទ័ពអ៊ីស្រាអែលឈានចូលទៅក្នុងសង្កាត់ដែលមានមនុស្សដ៏កុះករ។
ក្រសួងសុខាភិបាលបាននិយាយថា ការវាយប្រហារតាមអាកាសបានវាយប្រហារជំរុំជនភៀសខ្លួន Maghazi នៅកណ្តាលហ្គាហ្សាពេញមួយយប់ ដោយបានសម្លាប់មនុស្សយ៉ាងហោចណាស់ ៤០ នាក់ និង ៣៤ នាក់ផ្សេងទៀតរងរបួស។ ក្រសួងបានឲ្យដឹងថា អ្នកសង្គ្រោះបន្ទាន់ និងអ្នកស្រុកនៅតែជីកតាមគំនរបាក់បែកដោយសង្ឃឹមថា នឹងរកឃើញអ្នកនៅរស់រានមានជីវិត។
អ្នកយកព័ត៌មាន Associated Press នៅឯមន្ទីរពេទ្យក្បែរនោះបានឃើញកុមារចំនួនប្រាំបីនាក់បានស្លាប់ រួមទាំងទារកម្នាក់ផងដែរ។ ក្មេងម្នាក់ដែលនៅរស់រានមានជីវិតត្រូវបាននាំចុះតាមច្រករបៀងមន្ទីរពេទ្យដោយមនុស្សពេញវ័យកាន់ដៃនាង សម្លៀកបំពាក់របស់នាងមានធូលីដី បង្ហាញការតក់ស្លុតនៅលើមុខរបស់នាងផងដែរ៕
