ខេត្តព្រះវិហារ៖ សាកសពបុរសម្នាក់ ឈ្មោះ មុំ ឈិន អាយុ៤៨ឆ្នាំ រស់នៅភូមិភារកិច្ច សង្កាត់ប៉ាលហាល ក្រុងព្រះវិហារ ខេត្តព្រះវិហារ ត្រូវបានអ្នកដាក់មងរកត្រី ប្រទះឃើញស្លាប់ ក្នុងបឹង ឋិតក្នុង ភូមិស្រះឈូក សង្កាត់កំពង់ប្រណាក ក្រុងព្រះវិហារ នៅរសៀលថ្ងៃទី១០ ខែកញ្ញា ឆ្នាំ២០១៥នេះ ។ បុរសម្នាក់ ជាអ្នករកត្រី បានអះអាងថា នៅវេលាម៉ោង២នឹង៣០នាទី រសៀលថ្ងៃទី១០ខែកញ្ញានេះ ខ្លួនក៏បានជិះទូកដាក់មងយកត្រី នៅក្នុងបឹងនោះ ក៏ស្រាប់តែ ប្រទះឃើញសាកសព បុរសម្នាក់មិនស្គាល់អត្តសញ្ញាណ ជាប់នឹងមង ដាក់ត្រីរបស់គាត់ បន្ទាប់មកគាត់ ក៏បានរត់ស្លន់ស្លោ ទៅប្តឹងសមត្ថកិច្ច ឲ្យចុះទៅពិនិត្យ នៅកន្លែងកើតហេតុតែម្តង ។ តាមក្រុមគ្រួសារជនរងគ្រោះ បានបញ្ជាក់ ប្រាប់អ្នកយកព័ត៌មាន ថា បុរសរងគ្រោះខាងលើ មានជម្ងឺវិកលចរិក បន្ទាប់បងប្អូនបាននាំទៅ សម្រាកព្យាបាលនៅមន្ទីរពេទ្យបង្អែក១៦មករា ក្រុងព្រះវិហារ តែមកដល់ថ្ងៃទី០៦ ខែកញ្ញានេះ បុរសរងគ្រោះខាងលើជាបងប្អូន បានរត់ចេញពីមន្ទីរពេទ្យ រយៈពេល៣ថ្ងៃមកហើយ បងប្អូនតាមរកដែរតែមិនឃើញ ទើបមកដល់រសៀលថ្ងៃទី១០ ខែកញ្ញា នេះ ក៏បានឮដំណឹងថា ឃើញសពបុរសជា បងប្អូនខាងលើ លង់ទឹកស្លាប់ នៅក្នុងបឹង ឋិតក្នុងភូមិស្រះឈូក សង្កាត់កំពង់ប្រណាក ក្រុងព្រះវិហារ ។ សមត្ថកិច្ច អធិការដ្ឋាននគរបាលក្រុងព្រះវិហារ ក៏បានបញ្ជាក់ឲ្យដឹងដែរថា សាកសពបុរសខាងលើ មានប្រពន្ធឈ្មោះ សាន ធឿន អាយុ៣៧ឆ្នាំ មានជម្ងឺ កំពុងសម្រាកព្យាបាល នៅមន្ទីរពេទ្យបង្អែក១៦មករា មានកូនតូចៗ៣នាក់ ស្រីម្នាក់ នៅក្នុងបន្ទុក មុខរបរធ្វើស្រែចម្ការ ។ សមត្ថកិច្ចបន្តថា តាមការធ្វើកោសល្យវិច្ច័យ បានបញ្ជាក់ថា សាកសពបុរសខាងលើ ពិតជា លង់ទឹកស្លាប់មែន មិនមែនជាករណីឃាតកម្មនោះទេ ។ សូមបញ្ជាក់ផងដែរ មកដល់ពេលនេះ សាកសពបុរសខាងលើ សមត្ថកិច្ចក៏បាន ប្រគល់ ទៅឲ្យក្រុមគ្រួសារ យកទៅធ្វើបុណ្យ ទៅតាមប្រពៃណី ។ដោយមាន វណ្ណដារ៉ា ព្រះវិហារ
