អន្តរជាតិ ៖ ថ្លែងទៅកាន់អ្នកសារព័ត៌មាន លោក Salama Marouf ប្រធានការិយាល័យប្រព័ន្ធផ្សព្វផ្សាយរបស់រដ្ឋាភិបាលប៉ាឡេស្ទីនបាននិយាយថា កងកម្លាំងអ៊ីស្រាអែលបានបំផ្លាញអគាររដ្ឋាភិបាលចំនួន ៨៥ នៅតំបន់ហ្គាហ្សាផងដែរ ។ លោកបន្ថែមថា នៅតំបន់ហ្គាហ្សា អ៊ីស្រាអែលបានរុះរើវិហារឥស្លាមចំនួន ៤៧ កន្លែង និងបានបង្កការខូចខាតយ៉ាងធ្ងន់ធ្ងរដល់ព្រះវិហារចំនួនបីថែមទៀត។ ការវាយប្រហារបានបណ្តាលអគារដែលរងការខូចខាតជាង ២០០,០០០ កន្លែង ដែលក្នុងនោះ ៣២,៥០០ អគារ មិនអាចមានមនុស្សរស់នៅបាន សាលារៀនចំនួន ២០៣ បានរងការខូចខាតយ៉ាងធ្ងន់ធ្ងរ ហើយសាលារៀនចំនួន ៤៥ ឥឡូវនេះមិនមានដំណើរការទាំងស្រុង។ ដោយសារតែការវាយប្រហារខ្លាំងពេក ស្ថិតិមិនទាន់ស្រង់បានពេញលេញនៅឡើយ។
លោកថា កងទ័ពអ៊ីស្រាអែលបានទម្លាក់គ្រាប់បែក ១៨,០០០ តោននៅលើតំបន់ហ្គាហ្សាស្ទ្រីប ចាប់តាំងពីថ្ងៃទី ៧ ខែតុលា ឬប្រហែល ១,៥ ដងនៃកម្លាំងផ្ទុះរបស់គ្រាប់បែកដែលបានទម្លាក់លើទីក្រុងហ៊ីរ៉ូស៊ីម៉ា ប្រទេសជប៉ុន ក្នុងសង្គ្រាមលោកលើកទី ២ នេះបើយោងតាមមន្ត្រីស្ថិតនៅក្នុងតំបន់ឡោមព័ទ្ធ។
នៅក្រោមអនុសញ្ញាទីក្រុងហ្សឺណែវ ការវាយប្រហារលើវិហារគោរពបូជា និងសាលារៀន និងសំណង់ស៊ីវិលផ្សេងទៀតត្រូវបានហាមឃាត់។ ប៉ុន្តែពួកអ៊ីស្រាអែលបានអះអាងថា ពួកសកម្មប្រយុទ្ធកំពុងជ្រកនៅក្នុង ឬជុំវិញអគារទាំងនេះ។
លោក Marouf បានបន្ថែមថា កងទ័ពអ៊ីស្រាអែលបានសម្លាប់មនុស្សរង្គាលប្រមាណ ៩០៩ គ្រួសារ ដែលបណ្តាលឱ្យមនុស្សរាប់ពាន់នាក់ស្លាប់។ លោកបាននិយាយថា អ្នកសារព័ត៌មានសរុបចំនួន ៣៥ នាក់ បុគ្គលិកថែទាំសុខភាព ១២៤ នាក់ និងបុគ្គលិកការពារជនស៊ីវិល ១៨ នាក់មកពីក្រុមសង្គ្រោះបន្ទាន់ក៏ត្រូវបានសម្លាប់នៅក្នុងការវាយប្រហារផងដែរ៕