បន្ទាយមានជ័យ ៖ គ្រោះថ្នាក់ចរាចរណ៍នេះបានកើតឡើង កាលពីវេលាម៉ោង ១៨ និង ១០ នាទី ថ្ងៃទី១៧ ខែ ឧសភា ឆ្នាំ២០១៤ លើកំណាត់ផ្លូវជាតិលេខ៦ ស្ថិតនៅក្នុងភូមិចក ឃុំរហាល ស្រុកព្រះនេត្រព្រះ ខេត្តបន្ទាយមានជ័យ ដោយការបើករថយន្តព្រហ៊ើន បើកបរក្នុងល្បឿនលឿនជ្រុល មិនមើល សណ្ឋានភាពផ្លូវ ទីបំផុតប៉ះរថយន្តធុនធំ ទាំង ២ គ្រឿង សាកកំលាំងគ្នា លើផ្លូវជាតិលេខ ៦ ផ្អើលប្រជាពលរដ្ឋ ទាំងយប់ ។ ហេតុការណ៍នេះបណ្តាលឲ្យព្រូរឡានម្នាក់របួសធ្ងន់ (បាក់ជើងឆ្វេង) ចំណែកអ្នកបើកបរទាំងសងខាងរងរបួសស្រាលដូចគ្នា។
ប្រភពពីសមត្ថកិច្ចនគរបាលចរាចរណ៍ស្រុកព្រះនេត្រព្រះបានប្រាប់ថា នៅមុនពេលកើតហេតុគេបានឃើញរថយន្ត ធំ១គ្រឿង ពាក់ស្លាកលេខព្រះសីហនុ 3A1776 បើកបរដោយឈ្មោះ អូន វ៉ាន ភេទប្រុស អាយុ ២៨ ឆ្នាំ រស់នៅភូមិស្នួលឃុំស្ពឺ ស្រុកបាភ្នំ ខេត្តព្រៃវែង បានដឹកឈ្មោះ ធី វុទ្ធតី ភេទប្រុសអាយុ ១៩ ឆ្នាំ ជាព្រូរថយន្ត រស់នៅភូមិភ្នៀតឃុំ ស្វាយជ្រុំ ស្រុកមេសាង ខេត្តព្រៃវែង
របួសធ្ងន់បាក់ស្នងជើងឆ្វេង ។
ដោយបានបើកបរក្នុងទិសដៅពីទិសខាងកើត ឆ្ពោះទៅលិច មកដល់ចំណុចកើតហេតុ ក៏រអិលរេចង្កូតទៅបុករថយន្តធុនធំមួយ គ្រឿងទៀតដែលមានស្លាកលេខ 3A0288 បើកបរដោយឈ្មោះ អាន ផល្លា ភេទប្រុស អាយុ ២២ ឆ្នាំ រស់នៅភូមិព្រៃតាហូ ឃុំ ស្ទឹងសែន ស្រុកស្ទឹងសែន ខេត្តកំពង់ធំ ដែលបើកបរក្នុងទិសដៅពីទិសខាងលិចឆ្ពោះមកកើត (ក្នុងទិសដៅច្រាស់គ្នា) ។ ចំណែកអ្នកបើកបររថយន្តទាំងសងខាងរងរបួសស្រាលទាំងអស់គ្នា។
ក្រោយហេតុការណ៍នេះសមត្ថកិច្ចនគរបាលចរាចរណ៍ស្រុកព្រះនេត្រព្រះក៏បានចុះមកកាន់កន្លែងកើតហេតុដើម្បីត្រួតពិនិត្យ និងបញ្ជូនជនរងគ្រោះទៅកាន់មន្ទីរបង្អែក ដើម្បីសំរាកព្យាបាល ។
ក្រោយពីសមត្ថកិច្ចនគរបាលចរាចរណ៍យករថយន្តទាំងសងខាងទៅរក្សាទុកនៅអធិការដ្ឋានស្រុកព្រះនេត្រព្រះ បណ្តោះអាសន្ន រង់ចាំការដោះស្រាយគ្នាតាមច្បាប់ ៕
