រាជធានីភ្នំពេញ ៖ តាមរបាយការណ៍ក្រសួងទេសចរណ៍បានឲ្យដឹងថា ស្ថានភាពទេសចរណ៍ និងបងប្អូនប្រជាពលរដ្ឋដែលបានដើរកម្សាន្តនាឱកាសពិធីបុណ្យភ្ជុំបិណ្ឌ គិតចាប់ពីថ្ងៃទី១៣ ដល់ ថ្ងៃទី១៥ ខែតុលា ឆ្នាំ២០២៣ រួមមាន៖ ភ្ញៀវទេសចរជាតិប្រមាណ ១.៨៩ លាននាក់ កើនឡើង ៥២,២% ធៀបរយៈពេលដូចគ្នាឆ្នាំ២០២២ ខណដែលភ្ញៀវទេសចរបរទេស មានប្រមាណ ២.៧ ម៉ឺននាក់ កើនឡើងប្រមាណ ៩០,៥% ធៀបរយៈពេលដូចគ្នាឆ្នាំ២០២២។
ក្រសួងក៏បានបញ្ជាក់ដែរថា គោលដៅទេសចរណ៍សំខាន់ៗរយៈពេល០៣ថ្ងៃនៃពិធីបុណ្យភ្ជុំបិណ្ឌនេះ រួមមាន៖ ១. ខេត្តត្បូងឃ្មុំទទួលបានភ្ញៀវទេសចរចំនួន៤៤០.៣០០ នាក់។ ២. ខេត្តបាត់ដំបង ទទួលបានចំនួន ២១១.៣២៩ នាក់។ ៣. ខេត្តកំពង់ឆ្នាំង ទទួលបាន ១៦៨.០៦១ នាក់។ ៤. ខេត្តព្រះសីហនុ ទទួលបាន ១៥៧.០៤៦ នាក់។ ៥. ខេត្តសៀមរាប ទទួលបាន ១២៥.៤៤៩ នាក់ ។
ទន្ទឹមនោះ ក្រសួងក៏បានធ្វើការកត់សម្គាល់ថាចំពោះរបាយការណ៍ខាងលើគឺចំនួនភ្ញៀវទេសចរផ្ទៃក្នុងសរុបប្រមាណ ១,៩២ លាននាក់នេះ គឺរដ្ឋបាលរាជធានីខេត្តបានរាប់បញ្ចូលចំនួន ទេសចរជាតិ និងចំនួនបងប្អូនប្រជាពលរដ្ឋដែលបានធ្វើដំណើរកម្សាន្តនៅតាមរមណីយដ្ឋាន និងគោលដៅទេសចរណ៍ទូទាំងប្រទេស ព្រមជាមួយបងប្អូនប្រជាពលរដ្ឋដែលលេងកម្សាន្តនៅតាមភូមិស្រុក និងតាមទីតាំងរៀបចំកម្មវិធីនានាក្នុងទូទាំងប្រទេស។
សូមជម្រាបថា តាមគោលដៅទេសចរណ៍ខេត្តមួយចំនួនបានរៀបចំព្រឹត្តិការណ៍ផ្សេងៗ ដើម្បីទាក់ទាញទេសចរណ៍ឲ្យមកកម្សាន្តនៅខេត្តរបស់ខ្លួន ក្នុងនោះ ខេត្តត្បូងឃ្មុំបានរៀបចំព្រឹត្តិការណ៍បុណ្យអុំទូកបណ្តែតប្រទីប ភូមិមួយផលិតផលមួយ ការប្រគុំតន្ដ្រីខ្នាតយក្ស និងការបាញ់កាំជ្រួច ខណដែលខេត្តកំពង់ឆ្នាំង មានរៀបចំព្រឹត្តិការណ៍ទេសចរណ៍ជំនឿព្រះពុទ្ធសាសនាដែលមានការចូលរួមពីទេសចរបរទេសផងដែរ។ ក្រៅពីនោះខេត្តផ្សេងៗទៀតក៏បានរៀបចំកម្មវិធីកម្សាន្តសប្បាយនៅគ្រប់រាជធានីខេត្ត ពិសេសនៅតាមទីប្រជុំជនទីរួមខេត្ត ទីរួមស្រុក តំបន់គោលដៅទេសចរណ៍សំខាន់ៗ វត្តអារាម និងនៅតាមភូមិស្រុកនានា ដែលជាកត្តាទាក់ទាញភ្ញៀវទេសចរ និងបងប្អូនប្រជាពលរដ្ឋដើរកម្សាន្តយ៉ាងច្រើនកុះករ។
ដោយទ្បែកចំពោះសភាពការណ៍សន្តិសុខ សណ្តាប់ធា្នប់ សុវត្ថិភាព ការគ្រប់គ្រងចរន្តភ្ញៀវ និងការគ្រប់គ្រងគុណភាព និងតម្លៃសេវាទេសចរណ៍នានា មានភាពល្អប្រសើរ កម្លាំងមានសមត្ថកិច្ចទាំងនៅថ្នាក់ជាតិ និងគណៈបញ្ជាការឯកភាពរាជធានីខេត្ត បានអនុវត្តការងារប្រកបដោយការទទួលខុសត្រូវខ្ពស់៕
