បន្ទាយមានជ័យ ៖ កាលពីវេលាម៉ោង១១និង៥នាទី យប់ថ្ងៃទី១៦ ខែឧសភាឆ្នាំ២០១៤ នៅចំណុចផ្លូវកោងស្ថិតក្នុងភូមព្រែកជីក ឃុំបត់ត្រង់ ស្រុកមង្គលបូរី ខេត្តបន្ទាយមានជ័យ រថយន្តហ៊ីយ៉ាន់ដាយមួយគ្រឿង បានបើកបរនៅពេលយប់ ទំនងជាម្ចាស់ងងុយដេក ទៅបុករះស្លាកគណៈបក្សប្រជាជនកម្ពុជា ដាក់នៅលើចិញ្ចើមផ្លូវ បណ្តាលឲ្យបាក់ រួចរថយន្តក៏ជ្រុលចង្កូតទៅបុកផ្ទះលក់ឥវ៉ាន់ចាប់ហួយក្បែរនោះ បណ្តាលឲ្យបាក់រំលំសង្កត់ម្ចាស់ផ្ទះរងរបួសស្រាល ចំណែកអ្នកបើកបរបង្ករទុករថយន្តចោលរត់គេចខ្លួនគេចស្រមោល ។
បើតាមប្រភពសាក្សីនៅកន្លែងកើតហេតុ បានឲ្យដឹងថានៅមុនពេលកើតហេតុគេបានឃើញរថយន្តម៉ាកហ៊ីយ៉ាន់ដាយ ពណ៌ស ពាក់ស្លាកលេខ បាត់ដំបង 3A-1031បើកបរលើកំណាត់ផ្លូវជាតិលេខ៥ ក្នងទិសដៅពីជើងទៅត្បូងក្នុងស្ថានភាព យប់ស្ងាត់លុះមកដល់កន្លែងកើតហេតុជាចំណុចផ្លូវកោង ទំនងជារថយន្តលឿនជ្រុលគួបផ្សំនិងអ្នកបើកបរងងុយដេកផងបានបោះពួយបុករះយ៉ាងកំរោលតែម្រ៉ង ។
លោកវរសេនិយ៍ត្រី យ៉ត សុផល អធិការនគរបាលស្រុកមង្គលបូរីបានឲ្យដឹងថា រថយន្តបង្កស្លាកសញ្ញាគណបក្សប្រជាជនកម្ពុជាបាក់១ផ្ទាំង រួចរេចង្កូតជ្រុលទៅបុក ផ្ទះលក់ចាប់ហួយស្ទើរទាំងស្រុង ឬពមទាំងបណ្តាលឲ្យម្ចាស់ផ្ទះឈ្មោះស សឿន ភេទប្រុស អាយុ៤៣ឆ្នាំ បណ្តាលឲ្យរងរបួសស្រាល។
ចំណែកអ្នកបើកបររថយន្តបង្ករហេតុឃើញសភាពការណ៍មិនស្រួលក៏គេចខ្លួនបាត់ស្រមោលទាំងយប់ដោយបន្សល់ទុករថយន្តនៅនិងកន្លែងកើតហេតុ។
លុះព្រឹកឡើងទើបលោកឲ្យកម្លាំងនគរបាលចរាចរណ៍ ស្រុកមង្គលបូរីចុះទៅពិនិត្យ វាស់វែង និងបានយករថយន្តនោះមករក្សាទុកនៅអធិការដ្ឋាននគរបាលស្រុកមង្គលបូរី ដើម្បីស្រាវជ្រាវរកម្ចាស់រថយន្តមកដោះស្រាយតាមផ្លូវច្បាប់៕
