ខេត្តសៀមរាប៖ មានកសិដ្ឋានចិញ្ចឹមត្រីឆ្តោ រនៅក្នុងក្រុងសៀមរាប បាននិងកំពុងបន្តអាជីវកម្មរបស់ខ្លួនយ៉ាងរលូន ក្នុងនេះ ម្ចាស់កសិដ្ឋាន ចិញ្ចឹមត្រីឆ្តោរ១កន្លែង បានអះអាងថា គាត់មានសិទ្ធដោយស្របច្បាប់ ក្នុ្ឋងការប្រកបអាជីវកម្មចិញ្ចឹមត្រីឆ្តោរ នោះ ។ កសិដ្ឋានមួយនេះ មានទីតាំងនៅខាងក្រោយវត្តអារញ្ញ ស្ថិតក្នុងភូមិប្រឡាយ សង្កាត់សៀមរាប ក្រុងសៀមរាប ដែល ម្ចាស់ ឈ្មោះ យី ជាជនជាតិវៀតណាម ។ ស្របនឹងការអះអាងនេះ គេឃើញមានលិខិតរបស់រដ្ឋបាលជលផល លេខ ១៩៣៨ ជផ ចុះថ្ងៃទី២៨ ខែសីហា ឆ្នាំ២០១៤ ចុះហត្ថលេខា ដោយឯកឧត្តមបណ្ឌិត ណៅ ធួក ប្រតិភូរាជរដ្ឋាភិបាល ទទួលបន្ទុក ប្រធានរដ្ឋបាលជលផល គោរពជូនរដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ ដែលមានចែងនៅក្នុង កម្មវត្ថុថា ៖ សំណើរសុំអនុញ្ញាតិ ចិញ្ចឹមត្រីឆ្តោរពិសោធន៍ ដោយផ្តល់ចំណីជាត្រីល្អិតៗមកពីសមុទ្រ ។ សំណើរនេះធ្វើឡើង ដោយ យោងតាមលិខិតលេខ ៣១៨៤ កសក ចុះថ្ងៃទី០៩ ខែឧសភា ឆ្នាំ២០១៤ របស់ក្រសួងកសិកម្ម និង លិខិតលេខ ១២២ ខរជ.សរ ចុះថ្ងៃទី១៨ ខែសីហា ឆ្នាំ២០១៤ របស់ខណ្ឌរដ្ឋបាល ជលផលសៀមរាប ចុះហត្ថលេខាដោយលោកនាយខណ្ឌ ព្រិន សាវិន ។
សំណើររបស់ ឯកឧត្តម ណៅ ធួក ផ្ញើជូនរដ្ឋមន្រ្តីក្រសួងកសិកម្មនោះ បានបង្ហាញថា នៅខេត្តសៀមរាប មានប្រជាពលរដ្ឋ ស្នើសុំចិញ្ចឹមត្រីឆ្តោរពិសោធន៍ ចំនួន១០គ្រួសារ គឺនៅភូមិតាចេក ឃុំសំរោងយា នៅស្រុកពួក ៧គ្រួសារ និងនៅភូមិថ្មី សង្កាត់ ស្វាយដង្គំ ក្រុងសៀមរាប ចំនួន ៣គ្រួសារ ឥតមាននៅភូមិប្រឡាយ សង្កាត់សៀមរាប នោះទេ ។ បើទោះជាយ៉ាងណាក៏ដោយ លិខិតស្នើនោះ មិនដឹងថា រដ្ឋមន្រ្តីក្រសួងកសិកម្ម ឆ្លើយតបដោយការយល់ព្រមអនុញ្ញាតិ ឬក៏យ៉ាងណានោះទេ ព្រោះគ្មានឯកសារណាមួយ ដើម្បីបញ្ជាក់បន្ថែមនោះឡើយ ។
ដោយឡែក កសិដ្ឋានចិញ្ចឹមត្រីឆ្តោរដុះស្លែរមួយកន្លែងទៀត ម្ចាស់ឈ្មោះ វើក ជាជនជាតិវៀតណាម មានទីតាំងស្ថិត នៅក្នុង ភូមិទ្រៀក សង្កាត់ស្វាយដង្គំ ក្រុង-ខេត្តសៀមរាប ។ កសិដ្ឋានចិញ្ចឹមត្រីឆ្តោរមួយនេះ មានការរីកចំរើនខ្លាំងណាស់ កាលពីមុនមានតែ៣ស្រះទេ តែបច្ចុប្បន្ន កើនឡើងបាន៧ស្រះហើយ ហើយថ្មីៗនេះ កសិដ្ឋានមួយនេះ ទើបនឹងបានដាក់ ចិញ្ចឹមកូនត្រីឆ្តោរ ចំនួន ៣ស្រះ បន្តទៀត ។
កាលនៅក្នុងអំឡុងពាក់កណ្តាលឆ្នាំ២០១៣ មានប្រតិបត្តិការដ៏ធំមួយ ដើម្បីលុបបំបាត់អាជីវកម្ម ចិញ្ចឹមត្រីឆ្តោរ នៅខេត្តសៀមរាប ។ ពេលនោះដោយមានការអង្វរ ក ពីសំណាក់ម្ចាស់កសិដ្ឋាន ! អាជ្ញាធរខេត្ត រួមទាំងតំណាងរាស្រ្ត ផងដែរ បានជួយសម្របសម្រួល ជាមួយស្ថាប័នជំនាញ ព្រោះថាបើប្រើវិធានការច្បាប់ក្តៅពេក ម្ចាស់កសិដ្ឋានទាំងនោះត្រូវ ខាតបង់ទាំងស្រុង និងរងការពិន័យបន្ថែមទៀត ដូច្នោះហើយ ទើបអាជ្ញាធរខេត្ត មានការ អនុគ្រោះ ឲ្យម្ចាស់កសិដ្ឋាន ទាំងនោះចិញ្ចឹមបន្ត រហូតត្រីធំអាចចាប់លក់បាន ត្រូវបញ្ឈប់ការចិញ្ចឹមត្រីឆ្តោរ បន្តទៀត ដោយកំណត់ឱសានវាទ នាបំណាច់ខែមិនា ឆ្នាំ២០១៤ ។
នៅដើមខែមករា ឆ្នាំ២០១៤ ឯកឧត្តម ប៊ុន ថាឬទ្ធិ អភិបានរងខេត្ត បានបញ្ជាក់នៅពេលនោះថា កសិដ្ឋានចិញ្ចឹមត្រី ឆ្តោនៅខេត្តសៀមរាប មានប្រមាណជា ២០០កន្លែង សារុបជាស្រះមានប្រហែលជា ១០០០ ស្រះ ក្នុង១ថ្ងៃ សម្រាប់១ ស្រះ ត្រូវប្រើនុយត្រីប្រហែល ១០០ គក្រ ដូច្នេះ ២០០កសិដ្ឋាន ស្មើនឹង ១០០០ស្រះ ក្នុង១ថ្ងៃត្រូវប្រើកូនត្រីជានុយ ចិញ្ចឹមត្រីឆ្តោរ ដែលត្រូវដឹកជញ្ជូន ចេញពីទន្លេសាប ប្រហែលជា ១០០តោន ។ នេះគឺជាតួរលេខ បង្ហាញថា ការចិញ្ចឹមត្រី ឆ្តោរវាជាការបំផ្លាញមច្ឆជាតិ យ៉ាងដូច្នេះ ព្រោះថា ត្រីឆ្តោរ វាស៊ីតែត្រីគ្នាវាប៉ុណ្ណោះ ក្រៅពីត្រី វាមិនទទួលជាអាហាររបស់វា នោះឡើយ ដូច្នោះហើយទើបមានច្បាប់ ដាក់បំរាម មិនឲ្យមានអាជីវកម្មចិញ្ចឹមត្រីឆ្តោរ នោះ ។
គួរបញ្ជាក់ថា ៖ កសិដ្ឋានចិញ្ចឹមត្រីឆ្តោររបស់ឈ្មោះ វ៉ើក ខាងលើ គឺស្ថិតនៅក្នុងចំណោមកសិដ្ឋានទាំង២០០កន្លែង ខាងលើ ដែលត្រូវបញ្ចប់អាជីវកម្មរបស់ខ្លួន តាមឱសានវាទ នាចុងខែមិនា ឆ្នាំ២០១៤កន្លងទៅ ក៏ប៉ុន្តែត្រូវបានបន្តរហូត មកដល់បច្ចុប្បន្ន និងបានបន្ថែមចំនួនស្រះ កាន់តែច្រើនឡើងទៀតផង ។ បើតាមមតិមហាជនបានរិះគន់យ៉ាងខ្លាំង
ពីទីតាំងដុះស្លែរមួយនេះ ដាក់កូនត្រីបន្តវិលជុំ គ្រប់រដូវនៅក្នុងទីក្រុង គ្មានជំនាញណាមួយយកភ្នែកមើល ! ចុះទីតាំងផ្សេងៗរាប់ រយកន្លែងទៀតយ៉ាងម៉េច ! ដែរ ។ តើការអនុញ្ញាតិ ឲ្យចិញ្ចឹមត្រីឆ្តោ រដើម្បីពិសោធន៍ក្នុងខេត្តសៀមរាប របស់លោក ព្រិន សាវិន មានឱសានវាទដែរឫអត់ ! ។ អ្នកព័ត៌មាន ព្យាយាមសុំការបំភ្លឺតាមទូរស័ព្ទ នៅវេលាម៉ោង ១០ និង ២០នាទី ព្រឹកថ្ងៃទី០៥ ខែកញ្ញា ជាច្រើនលើក ក៏ប៉ុន្តែ លោក ព្រិន សាវិន នាយខ័ណរដ្ឋបាល ជលផលសៀមរាប ពុំលើកទូរស័ព្ទ ឡើយ សូមបញ្ជាក់ថាលោក ព្រិន សាវិន គាត់មានទម្លាប់ មិនលើកទទួលទូរស័ព្ទ អ្នកយកព័ត៌មាន នោះឡើយ ៕
ប៊ុនធឿន ( សៀមរាប )
