រាជធានីភ្នំពេញ ៖ អ្នកនាំពាក្យអគ្គស្នងការដ្ឋាននគរបាលជាតិ លោកឧត្តមសេនីយ៍ ឆាយ គឹមខឿន បានបញ្ជាក់ប្រាប់បណ្តាញសារពត័ត៌មានថា កម្លាំងសមត្ថកិច្ចប្រមាណជិត១០ម៉ឺននាក់ បានត្រៀមរួចរាល់ហើយ សម្រាប់ការពារ យុទ្ធនាការឃោសនាបោះឆ្នោត និង ការបោះឆ្នោតជ្រើសតាំងតំណាងរាស្ត្រអាណត្តិទី៧ ឆ្នាំ២០២៣ ខាងមុខ។
អ្នកនាំពាក្យអគ្គស្នងការដ្ឋាននគរបាលជាតិបានថ្លែងបន្តថា ក្នុងចំណោមកម្លាំងសមត្ថកិច្ចជិត ១០ម៉ឺននាក់នេះ គឺកម្លាំងជាង២ម៉ឺននាក់សម្រាប់ការពារការឃោសនាបោះឆ្នោត ខណដែលកម្លាំងជាង ៧ម៉ឺននាក់ទៀត សម្រាប់ការពារនៅថ្ងៃបោះឆ្នោត និងរាប់សន្លឹកឆ្នោត។ លោកបន្ថែមថា ក្រៅពីកម្លាំងជិត ១០ម៉ឺននាក់នេះ យើងក៏មានត្រៀមកម្លាំងអន្តរាគមន៍នៅតាម មូលដ្ឋានសរុបប្រមាណជាង ៦ពាន់នាក់ និងមានត្រៀមកម្លាំងថ្នាក់ ជាតិប្រមាណជាង ១ពាន់នាក់ទៀត ដើម្បីត្រៀមចេញប្រតិបត្តិការនៅក្នុងករណីមានហេតុការណ៍ចៃដន្យយថាហេតុកើតឡើងក្នុងដំណាក់កាលឃោសនាបោះឆ្នោត ការបោះឆ្នោត និងរាប់សន្លឹកឆ្នោត។
គួររំលឹកថា គណៈកម្មាធិការជាតិរៀបចំការបោះឆ្នោត ( គ.ជ.ប ) កាលពីថ្ងៃទី២៦ ខែមិថុនា ឆ្នាំ២០២៣ បានចេញសេចក្តីអំពាវនាវដល់គណបក្សនយោបាយ បេក្ខជន អ្នកគាំទ្រគណបក្សនយោបាយទាំងអស់ ត្រូវគោរពតាមវិធាន បទប្បញ្ញត្តិ និងគោលការណ៍ដែលមានចែងក្នុង ច្បាប់ស្តីពីការបោះឆ្នោតតំណាងរាស្ត្រ គោរពតាមបទបញ្ជា និងនីតិវិធី សម្រាប់ការបោះឆ្នោតជ្រើសតាំងតំណាងរាស្ត្រ នីតិកាលទី៧ ឆ្នាំ២០២៣ ក្រមសីលធម៌ និងគោលការណ៍នានា ដែលបានកំណត់ដោយ គ.ជ.ប ដើម្បីឱ្យការឃោសនាបោះឆ្នោតរបស់គណបក្សនយោបាយប្រព្រឹត្តទៅដោយ សន្តិវិធី អហិង្សា សន្តិសុខ និងសុវត្ថិភាព ៕
