ក្រុងប៉ោយប៉ែត៖ ជនសង្ស័យម្នាក់បានដើរ ឆបោកប្រាក់ពីពលរដ្ឋណា ចង់ធ្វើជាមន្ត្រីកងរាជអាវុធហត្ថប្រចាំខេត្តបន្ទាយមានជ័យ អោយស្លៀកពាក់ ឯកសណ្ឋាន ពាក់សក្ក័ពីរលើស្មារផង៏ដែរ ។
ហេតុការណ៍ឃាត់ខ្លួនជនសង្ស័យនៅវេលា ម៉ោង11ព្រឹកថ្ងៃទី15 ខែឧសភា ឆ្នាំ2014 នៅចំនុចមុខផ្សាប៉ោយប៉ែតថ្មី ស្ថិតក្នុងភូមិបាលិលេយ្យ 2 សង្កាត់-ក្រុងប៉ោយប៉ែត ខេត្តបន្ទាយមានជ័យ។
លោកវរសេនីយ៌ទោ ហម មុត មេបញ្ជាការកងរាជអាវុធហត្ថក្រុងប៉ោយប៉ែត បានឲ្យដឹងនៅល្ងាចថ្ងៃទី16 ខែឧសភានេះថា ជនសង្ស័យនេះ បានមកធ្វើសកម្មភាពដើរប្រមូលរើសមនុស្សដើម្បីចូលធ្វើមន្ត្រីកងកម្លាំងអ ហ គ្រប់ខណ្ឌ័រដ្ឋ បានចំនួនប្រាំនាក់ ដោយសន្យាថាអោយស្លៀកពាក់ឯកសណ្ឋានពាក់សក្ក័ពីរលើស្មារទៀតផង ហើយនិងបានថតរូប អ្នកដែលចង់ធ្វើមន្ត្រីអ ហ ដោយប្រមូលយកប្រាក់ បានប្រាក់ចំនួន300ដុល្លា និងប្រាក់ថៃចំនួន42000បាត ។
លោកមេបញ្ជាការបានបន្តថា ជនសង្ស័យមានឈ្មោះ លឹម ម៉េង ភេទប្រុសអាយុ23ឆ្នាំ រស់នៅភូមិបឹងវែង សង្កាត់វាលរេញ ខណ្ឌព្រៃនប់ ក្រុងកំពង់សោម ។ ចំណែកអត្តសញ្ញាណរបស់ជនរងគ្រោះលោកមេបញ្ជាការអ ហពុំបង្ហាញឡើយ។
លោកមេបញ្ជាការបានបន្ថែមថា ក្រោយពីបានទទួលដំណឹងពីពលរដ្ឋលោកក៏បានដាក់កម្លាំងជាច្រើននាក់តាមប្រមាញ់ និងឃាត់ខ្លួនជនសង្ស័យបានសម្រេច រួចយកមកសាកសួរនៅមូលដ្ឋាន កងរាជអាវុធហត្ថក្រុង។
ក្រោយពីបានសាកសួរជនសង្ស័យខាងលើនេះបានសារភាពចំពោះមុខសមត្ថកិច្ចថាខ្លួនពិតជាបានប្រព្រឹត្តឆបោកខាងលើមែន ដោយខ្លួនគ្មានលុយចាយវាយ ។ បច្ចុប្បន្នជនសង្ស័យខាងលើនេះ ត្រូវបានសមត្ថកិច្ចជំនាញកសាងសំណំរឿងបញ្ជូនទៅកាន់តុលាការដើម្បីចាត់ការតាមច្បាប់ ៕
ដោយ ចិន្តា
